Penyampau 14:1-45
14 Udah nya, orang Israel rauh-rauh nyabak sepemanjai malam nya.
2 Semua orang Israel berengkah mutap ngagai Moses enggau Aron. Ku sida madahka: “Manah agi kitai mati ba menua Ejip tauka mati ba menua puang tu!
3 Nama kebuah Jehovah deka mai kitai ngagai menua nya? Iya ka kitai mati dibunuh, pia? Bini enggau bala anak kitai deka ditabanka bala munsuh. Manah agi kitai pulai baru ngagai menua Ejip!”
4 Sida indah bejaku ngagai pangan diri: “Aram kitai ngelantik siku tuai lalu pulai baru ngagai menua Ejip!”
5 Pengudah ninga utai ke dipadahka orang Israel, Moses enggau Aron pan nyungkurka diri ba tanah ba depan semua orang Israel ke benung begelumu nya.
6 Dua iku ari bala pengintip nya, iya nya Josua anak Nun enggau Kalep anak Jepuneh, nyarikka gari diri
7 lalu madah ngagai semua orang Israel munyi tu: “Menua ke diintip kami nya amat-amat manah.
8 Enti Jehovah lantang ati enggau kitai, Iya tentu deka mai kitai kia lalu meri kitai menua ke kaya enggau ai tusu sereta madu nya.
9 Tang anang ngelaban Jehovah. Anang takutka orang ke diau ba menua nya, laban senang kitai deka ngalahka sida. Sida nadai sapa-sapa ke nyaga sida, tang kitai bisi Jehovah. Nya alai, anang takutka sida.”
10 Taja pia, semua orang Israel deka nikau seduai iya ngena batu. Tang tiba-tiba, orang Israel meda mulia Jehovah ayan ba atas langkau gempuru.
11 Udah nya, Jehovah bejaku ngagai Moses: “Sida enda bebasaka Aku. Sida enda arapka Aku taja pan Aku udah ngereja mayuh pengawa ti ngalitka ati ba depan sida. Ni pengelama sida deka baka nya?
12 Awakka Aku ngasuh penyakit berampit ninggang sida, lalu ngemunaska semua sida. Manah agi Aku ngaga peturun nuan aja nyadi bansa ti besai agi sereta kering agi ari sida.”
13 Tang ku Moses bejaku ngagai Jehovah: “Nuan udah ngena kuasa Nuan mai nembiak Nuan pansut ari menua Ejip. Enti Nuan amat ngereja nya lalu orang Ejip ninga pasal nya,
14 sida tentu deka madah ngagai orang ke diau ba menua nya. Orang ke diau ba menua nya tentu udah ninga pasal Nuan, Jehovah, ke bisi enggau kami sereta udah ngayanka Diri ngagai kami. Remang* Nuan bisi ba atas kami. Nuan, Jehovah, bejalai dulu ari kami dalam tiang remang maya siang hari, sereta dalam tiang api maya malam hari.
15 Enti Nuan munuh semua nembiak Nuan sekali gus, bansa-bansa ke kala ninga pasal semua pengawa Nuan ti luar biasa deka nyebut munyi tu:
16 ‘Nadai Jehovah ulih mai sida ngagai menua ke udah disemayaka Iya ngagai sida. Nya alai, Iya munuh sida ba menua puang.’
17 Nyadi, aku minta ngagai Nuan, Jehovah, ngambika kuasa Nuan ti besai ulih dipeda enggau terang, baka ke udah disemayaka Nuan suba lebuh Nuan madahka:
18 ‘Aku tu meh, Jehovah, Petara ke lubah ringat sereta ngayanka pengerindu ti setia enggau belimpah. Aku ngampunka penyalah sereta dosa. Tang, Aku enda nejuka orang ke ngereja penyalah lepas ari kena ukum. Orang ke bedosa deka diukum Aku, lalu ukum nya mega deka ninggang bala anak, uchu, enggau ichit sida nyentuk ngagai generasi* ketiga enggau generasi keempat.’
19 Nya alai, ampunka meh penyalah bala orang tu, baka ke udah digaga Nuan kenyau ari maya sida ba Ejip nyentukka diatu, laban Nuan bisi pengerindu ti setia ke belimpah.”
20 Udah nya, Jehovah nyaut: “Aku ngampunka sida baka ke dipinta nuan.
21 Tang Aku, Jehovah, besumpah atas nyawa Aku Empu, serata dunya deka penuh laban mulia Aku.
22 Sida udah meda mulia Aku enggau pengawa ti luar biasa ke udah digaga Aku ba Ejip sereta ba menua puang. Tang, sida majak nguji Aku* lalu enggai mendingka jaku Aku. Ketegal nya nadai siku pan ari sida
23 deka meda menua ke udah disemayaka Aku ngagai aki ini sida. Nadai siku pan orang ke enda bebasaka Aku deka meda menua nya.
24 Tang, nembiak Aku, Kalep, enda baka sida ke bukai. Iya seruran ngasika Aku enggau pengabis ati. Nya alai, Aku tentu deka mai iya ngagai menua ke udah diintip iya, lalu peturun iya deka ngempu menua nya.
25 Ketegal orang Amalek enggau orang Kanaan diau ba kawasan lebak, kita patut nikal baru pagila ngagai menua puang nengah jalai Tasik Mirah.”
26 Udah nya, Jehovah bejaku ngagai Moses enggau Aron:
27 “Berapa lama agi bala orang ke jai tu deka mutap ngelaban Aku? Aku udah ninga semua utai ke disebut sida maya sida mutap ngelaban Aku.
28 Padahka ngagai sida: ‘Jehovah madahka: “Aku besumpah atas nyawa Aku Empu, utai ke didinga Aku ari kita deka dikereja Aku ngagai kita.
29 Bangkai semua kita ke mutap ngelaban Aku deka betegaring ba menua puang tu. Au, semua orang ke beumur 20 taun ke atas sereta ke udah direjista, deka mati magang.
30 Nadai siku pan kita deka tama ngagai menua ke udah disemayaka Aku ngagai kita. Nadai siku pan kita deka diau ba menua nya. Semina Kalep anak Jepuneh enggau Josua anak Nun aja ke deka diau ba dia.
31 “‘“Bala anak kita, ke dipadah kita deka ditaban bala munsuh, deka dibai Aku ngagai menua ke enggai diterima kita. Sida meh ke deka ngasaika pengidup ba menua nya.
32 Tang, bangkai kita deka betegaring ba menua puang tu.
33 Ketegal kita enda setia ngagai Aku, bala anak kita meh ke patut betanggungjawap. Sida deka nyadi pengibun bedus ba menua puang pengelama 40 taun, nyentukka semua kita mati magang.
34 Kita udah ngintip menua nya pengelama 40 hari. Ketegal penyalah kita, kita deka merinsa pengelama 40 taun, iya nya setaun ke sehari. Nya baru kita nemu baka ni asai iya, laban kita udah ngelaban Aku.*
35 “‘“Aku, Jehovah, udah bejaku. Tu meh utai ke deka digaga Aku ngagai semua orang ke jai tu, ke udah bepakat deka ngelaban Aku: Kita deka mati ba menua puang tu.
36 Bala lelaki ke diasuh Moses ngintip menua nya, ke udah nyebut utai ti enda manah pasal menua nya lalu ngasuh orang Israel mutap ngelaban Aku,
37 tentu deka mati. Aku, Jehovah, deka ngukum lalu munuh semua sida ke udah nyebut utai ti enda manah pasal menua nya.
38 Tang Josua anak Nun enggau Kalep anak Jepuneh, ke mega enggau sida ngintip menua nya, deka terus idup.”’”
39 Pengudah Moses madahka jaku nya ngagai semua orang Israel, sida pan balat amat tusah ati.
40 Pagi hari siti, sida dani tumu lalu niki ngagai kawasan ke begunung. Ku sida madahka: “Kami udah bedosa. Tang diatu, kami besedia deka mansang ngagai endur ke dipadahka Jehovah nya.”
41 Tang Moses madahka: “Nama kebuah kita deka ngelaban pesan Jehovah? Kita tentu enda ulih mujur.
42 Anang niki kin, laban Jehovah nadai enggau kita. Kita tentu alah laban munsuh kita.
43 Ba din, orang Amalek enggau orang Kanaan deka ngelaban kita, lalu kita deka dibunuh. Ketegal kita enggai agi nitihka Jehovah, Jehovah enda enggau kita.”
44 Tang, sida degil lalu ngumbaka diri niki ngagai kawasan ke begunung. Taja pia, Moses enggau peti lampang batu Adat Jehovah enda mindah ari kem sida.
45 Udah nya, orang Amalek enggau orang Kanaan ke diau ba kawasan ke begunung nya lalu nyerang sida. Sida pan rari sampai ke Hormah.
Nota Kaki
^ Tauka “Awan.”
^ Tauka “serak.”
^ Jaku Asal, “Tang, udah 10 kali sida nguji Aku.”
^ Tauka “baka ni asai iya nyadi munsuh Aku.”
