Penyampau 15:1-41
15 Ku Jehovah nampung jaku Iya ngagai Moses:
2 “Padah ngagai orang Israel: ‘Kita deka tama ngagai menua ke deka diberi Aku ngagai kita.
3 Maya nya, kita mesti nyerahka sapi, bedus, tauka kambin ngagai Aku, Jehovah. Bau ari pemeri ke ditunu nya ngelantangka ati Aku, Jehovah. Lebuh kita nyerahka pemeri tunu, tauka pemeri kena ngamatka semaya ti istimewa, tauka pemeri sukarela, tauka pemeri maya musin pengerami,
4 kita mega mesti nyerahka pemeri bijirin ngagai Aku, Jehovah. Pemeri bijirin nya, iya nya satu kilogram* tepung ke alus patut dichampurka enggau satu liter* minyak kana.
5 Lebuh kita nyerahka pemeri tunu tauka lebuh kita nyerahka siku anak bedus ke lelaki, kita mega mesti nyerahka satu liter wain nyadika pemeri wain.
6 Enti kita nyerahka siku bedus ke lelaki, kita mega mesti nyerahka pemeri bijirin, iya nya 2 kilogram* tepung ke alus ke dichampurka enggau 1.2 liter* minyak kana.
7 Kita pan mesti nyerahka 1.2 liter wain nyadika pemeri wain ke Aku, Jehovah. Bau ari pemeri nya ngelantangka ati Aku.
8 “‘Tang enti kita nyerahka siku sapi ke lelaki nyadika pemeri tunu, tauka pemeri kena ngamatka semaya ti istimewa, tauka pemeri bebaik ngagai Aku, Jehovah,
9 kita mega mesti nyerahka pemeri bijirin ngagai Aku, iya nya 3.5 kilogram* tepung ke alus ke dichampurka enggau 2 liter* minyak kana.
10 Kita mesti nyerahka dua liter wain ngagai Aku, Jehovah, nyadika pemeri wain ke ditunu. Bau ari pemeri nya ngelantangka ati Aku.
11 Nya meh utai ke patut digaga lebuh kita nyerahka siku sapi ke lelaki, tauka siku bedus ke lelaki, tauka anak bedus ke lelaki, tauka kambin.
12 Nya meh utai ke patut digaga lebuh kita nyerahka tiap iku jelu nya, enda ngira berapa mayuh jelu ke deka diserahka kita nyadika pemeri.
13 Baka nya meh chara tiap iku orang Israel patut nyerahka pemeri sida ngagai Aku, Jehovah. Bau ari pemeri ke ditunu nya ngelantangka ati Aku.
14 “‘Enti bisi orang asing ba bala kita ke deka nyerahka pemeri ngagai Aku, Jehovah, sida mega mesti ngereja utai ti sama, enda ngira sida baru diau enggau kita tauka udah lama diau enggau kita. Bau ari pemeri ke ditunu nya ngelantangka ati Aku.
15 Kita enggau orang asing ke diau enggau kita mesti nitihka siti adat ti sama tu. Nya deka nyadi adat ti tetap ke mesti dititihka kita enggau semua peturun kita. Ba Aku, Jehovah, kita enggau orang asing sama magang.
16 Kita enggau orang asing ke diau enggau kita mesti nitihka adat enggau atur ti sama.’”
17 Ku Jehovah bejaku agi ngagai Moses:
18 “Padah ngagai orang Israel: ‘Lebuh kita tama ngagai menua ke deka diberi Aku ngagai kita
19 lalu kita makai pemakai* ari menua nya, kita mesti meri pemeri ngagai Aku, Jehovah.
20 Kita mesti ngaga roti ti segala baka gelang ari asil bijirin ti keterubah ke diketau kita, lalu nyerahka nya nyadika pemeri ngagai Aku. Kita mesti nyerahka nya sama baka nyerahka asil ke diambi kita ari endur alai ngindik utai ke diketau.
21 Kita enggau bala peturun kita mesti meri sekeda ari bijirin ke baru diketau kita ngagai Aku, Jehovah, nyadika pemeri.
22 “‘Kita engka enda sengaja ngereja penyalah lalu enda nitihka semua pesan ke dipadahka Aku, Jehovah, ngagai Moses.
23 Pesan nya dipadahka Aku, Jehovah, ngagai kita nengah Moses, lalu pesan nya patut seruran dititihka peturun kita kenyau ari maya Aku, Jehovah, meri pesan nya.
24 Enti penyalah nya enda sengaja dikereja kita, lalu nadai orang nemu pasal nya, semua kita mesti nyerahka siku sapi ti lelaki ke biak nyadika pemeri tunu. Kita mega mesti nyerahka pemeri bijirin enggau pemeri wain nitihka atur ke udah ditetapka. Pia mega, kita mesti nyerahka siku anak kambin nyadika pemeri kena ngulihka pengampun dosa. Bau ari pemeri tunu nya ngelantangka ati Aku, Jehovah.
25 Imam deka ngulihka pengampun dosa ke semua orang Israel. Aku, Jehovah, deka ngampunka sida laban sida enda sengaja ngereja penyalah nya, lalu sida udah nyerahka pemeri ke ditunu sereta pemeri kena ngulihka pengampun dosa ngagai Aku, Jehovah.
26 Semua kita orang Israel enggau orang asing ke diau enggau kita deka diampun magang, laban semua kita enda sengaja ngereja penyalah nya.
27 “‘Enti bisi orang enda sengaja bedosa, iya mesti nyerahka siku kambin indu ke beumur setaun tauka kurang nyadika pemeri kena ngulihka pengampun dosa.
28 Imam deka ngulihka pengampun dosa ke orang ke enda sengaja bedosa ba depan Aku, Jehovah, lalu Aku deka ngampunka iya.
29 Enti bisi orang enda sengaja ngereja dosa, orang Israel enggau orang asing ke diau enggau kita patut nitihka adat ti sama tu.
30 “‘Tang enti bisi orang sengaja ngereja dosa, enda ngira iya orang Israel tauka orang asing, iya mesti diukum mati laban iya udah bejaku ngelaban Aku, Jehovah.
31 Orang nya mesti diukum mati, laban iya enda bebasaka jaku Aku, Jehovah, lalu iya udah ngelanggar pesan Aku. Iya mati ketegal penyalah iya empu.’”
32 Lebuh orang Israel ba menua puang, sida tepedaka siku lelaki benung ngumpul kayu maya Hari Sabat.
33 Sida lalu mai lelaki nya ngagai Moses, Aron, enggau semua orang Israel.
34 Lelaki nya ditan dulu, laban sida enda nemu nama utai ke patut digaga sida ngagai iya.
35 Ku Jehovah bejaku ngagai Moses: “Lelaki nya mesti diukum bunuh, lalu semua orang Israel mesti nikau iya ngena batu ba luar kem.”
36 Semua orang Israel pan mai lelaki nya pansut ari kem, lalu sida nikau iya ngena batu sampai iya mati, baka ke udah dipadahka Jehovah ngagai Moses.
37 Ku Jehovah nampung jaku Iya ngagai Moses:
38 “Padah ngagai orang Israel, sida mesti ngaga buchai* ba ujung gari sida, lalu nyait tali biru ba begian atas buchai nya. Sida enggau bala peturun sida mesti nitihka pesan tu:
39 ‘Kita mesti ngaga buchai ba ujung gari kita, ngambika lebuh kita meda nya kita deka ingatka sereta ngasika semua pesan Aku, Jehovah. Anang nitihka pengingin mata enggau ati kita ke ulih ngujungka kita enda setia ngagai Aku.*
40 Pesan tu deka ngingatka kita, ngambika kita ngasika semua pesan Aku, lalu mengkang kudus ba mata Aku.
41 Aku tu meh Jehovah, Petara kita, ke udah mai kita pansut ari menua Ejip, kena nunjuk ngagai kita, Aku tu endang Petara kita. Aku tu meh Jehovah, Petara kita.’”
Nota Kaki
^ Jaku Asal, “satu persepuluh efah.” Peda Rujukan B14.
^ Jaku Asal, “satu perempat hin.” Peda Rujukan B14.
^ Jaku Asal, “dua persepuluh efah.”
^ Jaku Asal, “satu pertiga hin.”
^ Jaku Asal, “tiga persepuluh efah.”
^ Jaku Asal, “setengah hin.”
^ Jaku Asal, “roti.”
^ Tauka “burai; puting.”
^ Tauka “ngujungka kita nyundalka diri secara rohani.”
