Penyampau 16:1-50
16 Udah nya, Korah anak Izhar, iya nya uchu Kohat anak Lewi, betemu enggau tiga iku orang ari raban bansa Reuben, iya nya On, Datan, enggau Abiram. On nya anak Pelet. Datan enggau Abiram nya anak Eliap.
2 Sida enggau 250 iku bala tuai orang Israel, ke mega orang ke dipilih sereta orang ke tinggi pangkat, lalu angkat ngelaban Moses.
3 Sida mansang ngagai Moses enggau Aron, lalu madahka: “Umbas nya! Semua orang Israel kudus magang, lalu Jehovah bisi enggau kami semua. Nyadi, nama kebuah nuan ngeninggika diri lebih agi ari bala nembiak Jehovah ke bukai?”
4 Lebuh Moses ninga utai ku sida, iya pan nyungkurka diri ke tanah.
5 Udah nya, iya bejaku ngagai Korah enggau semua orang ke nyukung Korah munyi tu: “Pagi pagila, Jehovah deka nunjukka sapa ke enggi Iya, sapa ke kudus, sereta sapa ke patut datai semak ngagai Iya. Sapa-sapa ke dipilih Iya deka datai semak ngagai Iya.
6 Korah, nuan enggau semua orang ke nyukung nuan, patut ngambi pekekas endur engkah bara api.
7 Pagi pagila, engkahka bara api ba pekekas nya lalu engkahka menyan ba atas bara api nya. Udah nya, bai pekekas nya ngagai Jehovah. Barang sapa ke dipilih Jehovah deka dikumbai kudus. Kelalu amat kita tu orang Lewi!”
8 Ku Moses bejaku agi ngagai Korah: “Dinga kita orang Lewi.
9 Jehovah, Petara orang Israel, udah milih kita ari bala orang Israel ke bukai sereta ngemendarka kita datai semak ngagai Iya. Iya udah ngelantik kita ngambika kita ulih bejalaika pengawa ba langkau sembiang Iya sereta ngereja pengawa ke orang Israel. Ba kita, kati kita ngumbai tu pekara ti mit aja?
10 Petara udah ngemendarka nuan enggau bala menyadi nuan ke sama peturun Lewi, datai semak ngagai Iya. Agi ga kita ngumbai tu pekara ti mit? Nama, kita mega deka nyadi imam, pia?
11 Nama utai ke udah digaga Aron sampai kita mutap ngelaban iya? Nuan enggau semua orang ke nyukung nuan, kebendar iya udah ngelaban Jehovah.”
12 Udah nya, Moses ngasuh orang ngangauka Datan enggau Abiram, iya nya anak Eliap. Tang, ku seduai iya madahka: “Enggai kami datai!
13 Kati enda chukup nuan udah mai kami pansut ari menua ke kaya enggau ai tusu sereta madu nya, lalu ngasuh kami mati ba menua puang tu? Nama, diatu nuan deka merintah kami mega?
14 Ni menua ke kaya enggau ai tusu sereta madu ke dipadahka nuan nya? Nuan madah nuan deka meri kami ladang sereta kebun anggur ba menua nya, nyadika pesaka kami. Nuan ka sida nitihka nuan baka orang buta, pia?* Enggai kami datai!”
15 Pengudah ninga nya, Moses pan balat amat ringat. Ku iya madah ngagai Jehovah: “Anang nerima pemeri bijirin ke diserahka sida. Aku enda kala jai enggau sida. Aku nadai kala ngambi siku pan keledai ari sida.”
16 Udah nya, Moses bejaku ngagai Korah: “Pagila, nuan, bala orang ke nyukung nuan, sereta Aron mesti datai ngagai Jehovah.
17 Tiap iku kita mesti mai pekekas endur engkah bara api, lalu engkahka menyan ba pekekas nya. Kesemua 250 iti pekekas nya mesti dibai ngagai Jehovah. Nuan enggau Aron mega mesti mai pekekas nya siti siku.”
18 Nya alai, tiap iku sida ngambi pekekas sida empu, lalu ngengkahka bara api enggau menyan ba pekekas nya. Udah nya, sida bediri ba pintu penama langkau gempuru sama enggau Moses seduai Aron.
19 Lebuh Korah ngempuruka bala penyukung iya ba pintu penama langkau gempuru ketegal deka ngelaban Moses seduai Aron, mulia Jehovah ayan lalu ulih dipeda semua orang Israel.
20 Ku Jehovah madah ngagai Moses seduai Aron:
21 “Seduai mesti nyeraraka diri ari bala orang nya, ngambika Aku ulih ngemunaska semua sida tekala nya.”
22 Moses seduai Aron pan nyungkurka diri ke tanah lalu bejaku: “O Petara, Nuan meh ke meri nyawa ngagai semua mensia. Kati semina ketegal dosa siku orang, Nuan ringat ngagai semua orang Israel?”
23 Udah nya, Jehovah madah ngagai Moses:
24 “Padah ngagai orang Israel: ‘Jauhka diri ari langkau kain Korah, Datan, enggau Abiram!’”
25 Moses enggau bala tuai orang Israel pan mansang ngagai Datan enggau Abiram.
26 Ku Moses bejaku ngagai orang Israel: “Jauhka diri ari langkau kain orang ke jai nya. Anang negu nama-nama utai ke enggi sida, ngambika kita enda sama dipunaska ketegal dosa sida.”
27 Nya alai, sida pan jampat-jampat ngenyauhka diri ari langkau kain Korah, Datan, enggau Abiram. Datan enggau Abiram pansut lalu bediri ba penama langkau kain seduai iya, sama enggau bini sereta anak seduai iya.
28 Udah nya, Moses madahka: “Tu meh chara kita deka nemu Jehovah meh ke udah ngasuh aku ngereja semua tu, lalu aku ukai ngereja utai nitihka pengingin aku empu:
29 Enti orang tu mati baka biasa baka ke nyadi ba semua orang, lalu enti ukum ke diterima sida sama enggau ukum ke diterima orang bukai, reti iya ukai Jehovah ke nganjung aku.
30 Tang enti Jehovah ngereja utai ti luar biasa, lalu enti tanah tebelah lalu nelan sida enggau semua utai ke diempu sida, lalu sida tama idup-idup ngagai Kubur,* nya baru kita nemu sida enda bebasaka Jehovah.”
31 Pengudah Moses bejaku munyi nya, tanah alai sida bediri pan lalu tebelah.
32 Tanah nya nelan seduai iya enggau ruang bilik seduai iya, nyengkaum semua penyukung Korah sereta semua utai ke enggi sida.
33 Sida enggau semua orang ke nyukung sida tama idup-idup ngagai Kubur.* Udah nya, tanah tutup lalu pulai baru baka selama. Semua sida mati magang.
34 Semua orang Israel ke ba dia rari magang lebuh ninga sida nyerauh. Ku orang Israel: “Kami takut enggaika tanah nelan kami!”
35 Udah nya, Jehovah ngasuh api nurun lalu nganguska 250 iku orang ke nyerahka menyan.
36 Ku Jehovah bejaku ngagai Moses:
37 “Asuh Eleasar anak Imam Aron ngambi semua pekekas endur engkah bara api ari api nya, laban pekekas nya kudus. Asuh iya muai amau nya ba endur ti jauh.
38 Pekekas endur engkah bara api ke dibai orang nya, iya nya sida ke udah mati ketegal dosa, mesti digaga nyadi keping besi ti nipis kena ngelapis alta. Utai nya udah diserahka ngagai Aku, Jehovah. Nya alai, utai nya kudus. Utai nya deka nyadi tanda amaran ke orang Israel.”
39 Nyadi, Imam Eleasar pan ngambi semua pekekas temaga nya. Nya meh pekekas ke udah diserahka semua orang ke mati diempa api nya. Pekekas nya digaga iya nyadi keping besi kena ngelapis alta,
40 baka ke udah dipadahka Jehovah ngagai iya nengah Moses. Keping besi nya deka nyadi tanda amaran ngagai semua orang Israel, ngambika sida nemu orang bukai enda tau nyerahka menyan ngagai Jehovah. Semina peturun Aron aja ke ulih ngereja nya. Tanda amaran nya mega nunjukka nadai siku pan orang tau nunda Korah enggau bala penyukung iya.
41 Hari siti, semua orang Israel berengkah mutap ngelaban Moses enggau Aron. Ku sida: “Parai magang nembiak Jehovah laban seduai.”
42 Semua sida begelumu ketegal deka ngelaban Moses seduai Aron. Tang lebuh sida malik ngagai langkau gempuru, sida meda remang* ba atas langkau nya lalu mulia Jehovah pan ayan.
43 Moses enggau Aron pan mansang ngagai langkau gempuru.
44 Ku Jehovah madah ngagai Moses:
45 “Seraraka diri ari sida tu laban Aku deka terus ngemunaska sida.” Lebuh seduai iya ninga nya, seduai iya pan nyungkurka diri ke tanah.
46 Moses lalu bejaku ngagai Aron: “Ambi pekekas endur engkah bara api. Engkahka bara api ari alta ba pekekas nya, lalu engkahka menyan ba bara api nya. Alai nuan mansang jampat ngagai orang Israel, lalu minta pengampun dosa ke sida laban Jehovah balat amat ringat. Kereja meh tu enggau jampat laban penulah udah berengkah!”
47 Nyadi, Aron pan ngambi pekekas nya baka ke diasuh Moses, lalu iya belanda ngagai tengah-tengah orang ke benung begelumu. Lebuh iya meda penulah nya udah berengkah, iya enggau jampat ngengkahka menyan ba pekekas nya lalu minta pengampun dosa ke sida.
48 Iya bediri ba tengah-tengah orang ke udah mati sereta orang ke agi idup. Lalu pengujung iya, penulah nya pan ngetu.
49 Bisi 14,700 iku orang ke mati ketegal penulah nya. Tu enda nyengkaum orang ke udah mati ketegal pengawa Korah.
50 Pengudah penulah nya ngetu, Aron pan pulai baru ngagai Moses ba pintu penama langkau gempuru.
Nota Kaki
^ Jaku Asal, “Nuan ka ngeruk mata sida, pia?”
^ Tauka “Sheol,” iya nya pendam ke mensia. Peda Penerang Leka Jaku.
^ Tauka “Sheol,” iya nya pendam ke mensia. Peda Penerang Leka Jaku.
^ Tauka “awan.”
