Penyampau 17:1-13
-
Tungkat Aron mansutka bungai nyadi tanda (1-13)
17 Ku Jehovah bejaku ngagai Moses:
2 “Pinta siti tungkat ari tiap iku tuai raban bansa Israel. Kesemua nya bisi 12 iti tungkat. Tuliska nama sida ba tungkat sida iya empu.
3 Pia mega, tuliska nama Aron ba tungkat orang Lewi. Tiap iku tuai raban bansa mesti bisi siti tungkat.
4 Engkah semua tungkat nya ba depan peti lampang batu Adat, ke ba dalam langkau gempuru, iya nya endur alai Aku suah ngayanka Diri ngagai nuan.
5 Tungkat orang ke dipilih Aku deka mansutka bungai. Nya meh chara Aku ngasuh orang Israel badu mutap ngelaban Aku enggau nuan.”
6 Nya alai, Moses madahka semua nya ngagai orang Israel. Semua tuai raban bansa Israel meri tungkat sida ngagai Moses. Kesemua nya bisi 12 iti tungkat, nyengkaum tungkat Aron.
7 Udah nya, Moses ngengkahka semua tungkat nya ba depan Jehovah, ba dalam langkau alai peti lampang batu Adat disimpan.
8 Hari siti, Moses tama baru ngagai langkau nya. Iya meda tungkat Aron, iya nya tungkat orang Lewi, mansutka bungai. Ba tungkat nya, bisi kuntum bungai, bungai, enggau almond ke udah mansau.
9 Semua tungkat ke ba depan Jehovah nya dibai Moses pansut lalu ditunjukka iya ngagai semua orang Israel. Sida meda tungkat nya, lalu bala tuai raban bansa ngambi tungkat sida empu.
10 Udah nya, Jehovah bejaku ngagai Moses: “Simpan baru tungkat Aron nya ba depan peti lampang batu Adat, nyadika tanda amaran ngagai orang Israel ke rindu ngelaban, ngambika sida badu agi mutap ngelaban Aku lalu enda mati.”
11 Moses lalu jampat ngereja nya, sama baka ke udah dipadahka Jehovah ngagai iya.
12 Udah nya, orang Israel bejaku munyi tu ngagai Moses: “Kami tentu deka mati. Kami tentu deka dipunaska. Parai magang meh kami tu!
13 Sapa-sapa ke datai semak ngagai langkau sembiang Jehovah tentu deka mati. Kati semua kami deka mati?”
