Penyampau 18:1-32
18 Ku Jehovah bejaku ngagai Aron: “Nuan, bala anak lelaki nuan, enggau semua peturun nuan mesti betanggungjawap enti atur ke bekaul enggau Langkau Sembiang enda dititihka. Nuan enggau bala anak lelaki nuan mega mesti betanggungjawap enti atur ke bekaul enggau pengawa imam enda dititihka.
2 Bai mega bala menyadi nuan,* iya nya orang Lewi, ngambika sida ulih nulung nuan enggau bala anak lelaki nuan gawa ba langkau alai peti lampang batu Adat disimpan.
3 Sida mesti ngereja tanggung pengawa ke diberi nuan ngagai sida. Sida mega mesti ngereja semua pengawa ke bekaul enggau Langkau Sembiang. Tang, sida enda tau datai semak ngagai pekekas ke dikena ba endur ti kudus sereta ba alta, ngambika semua kita enda mati.
4 Sida deka nulung nuan ngereja semua tanggung pengawa ke bekaul enggau langkau gempuru. Tang, orang bukai* enda tau datai semak ngagai kita.
5 Kita mesti ngereja tanggung pengawa kita bekaul enggau endur ti kudus sereta alta, ngambika Aku enda ringat agi ngagai orang Israel.
6 Ari semua orang Israel, Aku udah milih bala menyadi kita, orang Lewi, nyadika pemeri ke kita. Sida enggi Aku, Jehovah, lalu sida deka gawa ba langkau gempuru.
7 Nuan enggau bala anak lelaki nuan mesti ngereja tanggung pengawa kita nyadi imam, sereta ngereja pengawa ke bekaul enggau alta sereta utai ke bisi ba belakang tirai. Kita meh ke mesti ngereja pengawa nya. Aku udah meri kita pemeri, iya nya pengawa kita ke nyadi imam. Orang bukai* ke datai semak ngagai Langkau Sembiang mesti diukum bunuh.”
8 Ku Jehovah nampung jaku Iya ngagai Aron: “Aku Empu ngelantik nuan ngatur pemeri ke diberi ngagai Aku. Ari semua pemeri ti kudus ke diberi orang Israel ngagai Aku, Aku deka meri sebagi ari pemeri nya ngagai nuan enggau bala anak lelaki nuan. Begian nya deka seruran diempu kita.
9 Nuan deka ngempu sebagi ari pemeri ti pemadu kudus ke ditunu ba alta. Nuan deka ngempu sebagi ari semua pemeri ke diberi orang Israel ngagai Aku, nyengkaum pemeri bijirin, pemeri kena ngulihka pengampun dosa, enggau pemeri ganti rugi. Pemeri nya utai ti pemadu kudus ke nuan enggau bala anak lelaki nuan.
10 Semua lelaki ari bala kita mesti makai nya ba endur ti kudus. Nya deka nyadi utai ti kudus ke kita.
11 Kita mega deka ngempu sebagi ari pemeri ke diberi orang Israel begulai enggau pemeri ke diayun. Aku udah meri nya ngagai nuan enggau ngagai anak lelaki sereta anak indu nuan. Begian nya deka seruran diempu kita. Semua orang ke tuchi ari ruang bilik nuan tau makai nya.
12 “Semua asil ti keterubah sereta ke pemadu manah ke diberi orang Israel ngagai Aku, Jehovah, deka diberi Aku ngagai nuan. Semua minyak, bijirin, sereta wain ti pemadu manah deka diberi Aku ngagai nuan.
13 Semua asil ti keterubah ari ladang sida, ke diberi sida ngagai Aku, Jehovah, deka diempu nuan. Semua orang ke tuchi ari ruang bilik nuan tau makai nya.
14 “Semua utai ke udah dikuduska* ba Israel deka diempu nuan.
15 “Semua anak tuai ke diserahka ngagai Aku, Jehovah, enda ngira nya anak mensia tauka anak jelu, deka diempu nuan. Tang, tiap iku anak tuai mensia mesti ditebus. Pia mega, tiap iku anak tuai jelu ke enda tuchi mesti ditebus.
16 Nuan mesti nebus tiap iku anak tuai ke beumur sebulan ke atas nitihka rega ke udah ditetapka, iya nya lima shekel* pirak, nitihka timbang berat ke biasa dikena ba endur ti kudus. Penyampau nya sama enggau 20 gera.*
17 Tang, nuan enda tau nebus anak tuai sapi, bedus, enggau kambin, laban anak tuai jelu nya ke lelaki kudus ba Aku. Nuan mesti mechikka darah jelu nya ba alta, lalu nunu lemak jelu nya ngambika asap niki ke atas. Bau ari pemeri nya ngelantangka ati Aku, Jehovah.
18 Dagin jelu nya deka diempu nuan, sama baka nuan ke ngempu kaki kanan jelu nya enggau dada jelu nya ke diserah nyadika pemeri ke diayun.
19 Semua pemeri ti kudus ke diberi orang Israel ngagai Aku, Jehovah, deka diberi Aku ngagai nuan enggau anak lelaki sereta anak indu nuan, lalu nya deka seruran diempu kita. Nya sempekat ti meruan* entara Aku, Jehovah, enggau nuan sereta peturun nuan.”
20 Ku Jehovah bejaku ngagai Aron: “Ba menua Israel nuan nadai pesaka, lalu nadai tanah ba menua nya deka diempu nuan. Aku deka nyaga nuan sereta nyediaka utai ke diguna nuan.*
21 “Sepuluh peratus ari pemeri ke diserahka orang Israel ngagai Aku, deka diberi Aku ngagai orang Lewi. Nya meh pesaka sida, laban sida bejalaika pengawa ke bekaul enggau langkau gempuru.
22 Orang Israel ke bukai enda tau semak langkau gempuru, enggaika sida bedosa lalu mati.
23 Semina orang Lewi aja ke tau bejalaika pengawa ke bekaul enggau langkau gempuru. Sida meh ke betanggungjawap enti orang Israel ngereja penyalah. Orang Lewi enda ulih ngempu tanah ba menua Israel nyadika pesaka. Nya adat ti tetap ke semua peturun kita.
24 Aku udah meri ngagai orang Lewi 10 peratus ari pemeri ke diserahka orang Israel ngagai Aku, Jehovah, nyadika pesaka sida. Nya kebuah Aku madah ngagai sida: ‘Orang Lewi enda tau ngempu tanah ba menua Israel nyadika pesaka.’”
25 Udah nya Jehovah bejaku ngagai Moses:
26 “Padah ngagai orang Lewi: ‘Sepuluh peratus ari pemeri ke diserahka orang Israel ngagai Aku, deka diberi Aku ngagai kita nyadika pesaka kita. Udah nya, 10 peratus ari utai ke diterima kita nya patut diberi ngagai Aku, Jehovah.
27 Ba Aku, pemeri nya diberi kita. Pemeri nya baka ke datai ari bijirin, minyak, enggau wain kita empu.
28 Ngena chara nya, kita mega ulih nyerahka pemeri ngagai Aku, Jehovah. Kita deka nerima 10 peratus ari utai ke diserahka orang Israel, lalu sebagi ari nya patut diberi ngagai Imam Aron nyadika pemeri ngagai Aku, Jehovah.
29 Ari semua pemeri ti kudus ke diterima kita, kita mesti nyerahka pemeri ti pemadu manah ngagai Aku, Jehovah.’
30 “Nuan mesti madah ngagai sida: ‘Lebuh kita meri pemeri ke pemadu manah nya, ba Aku pemeri nya baka ke datai ari bijirin, minyak, enggau wain kita empu. Begian ke enda diserah kita ulih diempu kita.
31 Begian nya ulih diempa kita sebilik ba dini-dini endur, laban nya upah kita ke pengawa kita ba langkau gempuru.
32 Kita enda bedosa enti kita nyerahka begian ti pemadu manah ngagai Aku. Kita enda tau ngamahka pemeri ti kudus ari orang Israel. Enti kita ngereja nya, kita deka mati.’”
Nota Kaki
^ Tauka “bala menyadi nuan ari raban bansa apai nuan.”
^ Iya nya, orang ke ukai ari peturun Aron.
^ Iya nya, orang ke ukai ari peturun Aron.
^ Iya nya, semua utai ke udah diserahka ngagai Petara ke enda ulih dikinsil tauka ditebus baru.
^ Peda Rujukan B14.
^ Peda Rujukan B14.
^ Jaku Asal, “sempekat garam.”
^ Tauka “Aku meh pesaka nuan.”
