Penyampau 19:1-22
-
Sapi mirah; ai kena ngaga nyadi tuchi (1-22)
19 Jehovah bejaku baru ngagai Moses enggau Aron. Ku Iya:
2 “Tu meh adat ke ditetapka Aku, Jehovah: ‘Padah ngagai orang Israel ngambika mai siku sapi mirah ngagai nuan. Sapi nya enda tau bisi penimpang sereta nadai kala dibai ngereja pengawa.
3 Kita patut meri sapi nya ngagai Imam Eleasar. Iya deka mai sapi nya ngagai luar kem, lalu sapi nya patut disayat ba depan iya.
4 Udah nya, Imam Eleasar deka ngambi mimit darah sapi nya ngena tunjuk jari iya, lalu mechikka darah nya tujuh kali ngagai pintu penama langkau gempuru.
5 Sapi nya, nyengkaum kulit, isi, darah, enggau tai sapi nya patut ditunu ba depan iya.
6 Imam nya mesti ngambi kayu sidar, tangkai hisop,* enggau kain mirah, lalu nikauka semua utai nya ngagai api ke dikena nunu sapi nya.
7 Udah nya, imam nya mesti masu gari iya lalu mandi. Nya baru iya ulih tama ngagai kawasan kem. Tang, iya agi tetap enda tuchi nyentukka mata panas padam.
8 “‘Orang ke nunu sapi nya mesti masu gari iya lalu mandi. Tang, iya agi tetap enda tuchi nyentukka mata panas padam.
9 “‘Siku orang ke tuchi deka ngumpul amau sapi nya, lalu ngengkahka amau nya ba endur ti beresi ba luar kem. Orang Israel patut nyimpan amau nya ngambika ulih dikena nyediaka ai ke dikena ngaga orang nyadi tuchi. Nya meh pemeri kena ngulihka pengampun dosa.
10 Orang ke ngumpul amau sapi nya mesti masu gari iya. Tang, iya agi tetap enda tuchi nyentukka mata panas padam.
“‘Tu meh adat ti tetap ke patut dititihka orang Israel enggau orang asing ke diau enggau sida:
11 Sapa-sapa ke negu orang ke udah mati deka nyadi enda tuchi pengelama tujuh hari.
12 Ba hari ti ketiga, orang nya patut nuchi diri ngena ai nya, lalu iya deka nyadi tuchi ba hari ti ketujuh. Tang enti iya enda nuchi diri ba hari ti ketiga, iya enda ulih nyadi tuchi ba hari ti ketujuh.
13 Orang ke enda nuchi diri pengudah negu bangkai orang mati, udah ngamahka langkau sembiang Aku, Jehovah. Nya alai, iya mesti diukum mati. Iya enda tuchi, laban ai ke dikena ngaga orang nyadi tuchi enda dipechikka ngagai iya. Nya alai, iya mengkang enda tuchi.
14 “‘Tu meh adat ke patut dititihka enti bisi orang mati ba dalam langkau kain: Sapa-sapa ke tama ngagai langkau nya, sereta orang ke endang sigi udah ba dalam langkau nya, deka nyadi enda tuchi pengelama tujuh hari.
15 Tiap iti sarang endur nyimpan utai ke enda ditutup, deka nyadi enda tuchi.
16 Enti ba luar kem, bisi orang negu orang mati, tauka negu orang ke dibunuh ngena pedang, tauka negu tulang orang mati, tauka negu kubur, orang nya deka nyadi enda tuchi pengelama tujuh hari.
17 Ngambika orang nya ulih nyadi tuchi, ambi mimit amau ari pemeri kena ngulihka pengampun dosa. Udah nya, engkahka amau nya ba dalam siti sarang, lalu tuangka ai ti beresi ke dalam sarang nya.
18 Udah nya, siku orang ke tuchi mesti ngambi tangkai hisop, nyepuhka tangkai nya ke dalam ai nya, lalu mechikka ai nya ngagai langkau kain, ngagai semua sarang endur nyimpan utai ke bisi ba dalam langkau nya, sereta ngagai semua orang ke bisi ba dalam langkau nya. Iya mega mesti mechikka ai nya ngagai orang ke udah negu orang mati, ngagai orang ke udah negu orang ke dibunuh ngena pedang, ngagai orang ke udah negu tulang orang mati, tauka ngagai orang ke udah negu kubur.
19 Ba hari ketiga enggau ba hari ketujuh, orang ke tuchi deka mechikka ai nya ngagai orang ke enda tuchi nya. Orang nya deka nyadi tuchi ba hari ketujuh. Udah nya, iya mesti masu gari iya lalu mandi. Enggau nya, iya deka nyadi tuchi pengudah mata panas padam.
20 “‘Tang, orang ke enda tuchi sereta ke enda nuchi diri mesti diukum bunuh, laban iya udah ngamahka langkau sembiang Aku, Jehovah. Orang nya enda tuchi, laban ai ke dikena ngaga orang nyadi tuchi enda dipechikka ngagai iya.
21 “‘Tu meh adat ti tetap ke sida: Orang ke mechikka ai nya mesti masu gari iya. Sapa-sapa ke kena pechik ai nya deka nyadi enda tuchi nyentukka mata panas padam.
22 Nama-nama utai ke ditegu orang ke enda tuchi, deka nyadi enda tuchi. Sapa-sapa ke negu utai nya, mega deka nyadi enda tuchi nyentukka mata panas padam.’”
Nota Kaki
^ Peda Penerang Leka Jaku.
