Penyampau 2:1-34
2 Ku Jehovah bejaku ngagai Moses enggau Aron:
2 “Orang Israel patut nirika kem sida ba endur ke udah ditetapka ke raban kem* sida. Tiap iku orang mesti nirika kem sida semak bendira* suku sida. Sida mesti nirika kem sida ngelingi langkau gempuru, lalu kem sida mesti nunga ngagai langkau gempuru nya.
3 “Tiga iti raban bansa patut nirika kem ba begian timur* nitihka raban soldadu sida, lalu raban bansa Judah deka nguluka raban kem tu. Nason anak Aminadap nyadi tuai raban bansa Judah.
4 Bisi 74,600 iku orang udah direjista nyadi soldadu dalam raban iya.
5 Raban bansa Isakar nirika kem ba sepiak raban bansa Judah. Netanel anak Zuar nyadi tuai raban bansa Isakar.
6 Bisi 54,400 iku orang udah direjista nyadi soldadu dalam raban iya.
7 Raban bansa Sebulun mega nirika kem ba sepiak raban bansa Judah. Eliap anak Helon nyadi tuai raban bansa Sebulun.
8 Bisi 57,400 iku orang udah direjista nyadi soldadu dalam raban iya.
9 “Bisi 186,400 iku soldadu udah direjista dalam raban kem Judah. Lebuh orang Israel deka mindah ngagai endur bukai, raban tu meh ke patut muka kem sida dulu.
10 “Tiga iti raban bansa patut nirika kem ba begian selatan nitihka raban soldadu sida, lalu raban bansa Reuben deka nguluka raban kem tu. Elizur anak Sediur nyadi tuai raban bansa Reuben.
11 Bisi 46,500 iku orang udah direjista nyadi soldadu dalam raban iya.
12 Raban bansa Simion nirika kem ba sepiak raban bansa Reuben. Selumiel anak Zurisadai nyadi tuai raban bansa Simion.
13 Bisi 59,300 iku orang udah direjista nyadi soldadu dalam raban iya.
14 Raban bansa Gat mega nirika kem ba sepiak raban bansa Reuben. Eliasap anak Reuel nyadi tuai raban bansa Gat.
15 Bisi 45,650 iku orang udah direjista nyadi soldadu dalam raban iya.
16 “Bisi 151,450 iku soldadu udah direjista dalam raban kem Reuben. Lebuh orang Israel mindah ngagai endur bukai, tu meh raban ti kedua ke patut muka kem sida.
17 “Maya mindahka langkau gempuru, kem orang Lewi mesti ba tengah-tengah raban kem ke bukai.
“Orang Israel mesti bejalai nitihka tusun chara sida nirika kem. Sida mesti bejalai nitihka raban kem sida.
18 “Tiga iti raban bansa patut nirika kem ba begian barat nitihka raban soldadu sida, lalu raban bansa Efraim deka nguluka raban kem tu. Elisama anak Amihut nyadi tuai raban bansa Efraim.
19 Bisi 40,500 iku orang udah direjista nyadi soldadu dalam raban iya.
20 Raban bansa Manasi nirika kem ba sepiak raban bansa Efraim. Gamaliel anak Pedasur nyadi tuai raban bansa Manasi.
21 Bisi 32,200 iku orang udah direjista nyadi soldadu dalam raban iya.
22 Raban bansa Benjamin mega nirika kem ba sepiak raban bansa Efraim. Abidan anak Gideoni nyadi tuai raban bansa Benjamin.
23 Bisi 35,400 iku orang udah direjista nyadi soldadu dalam raban iya.
24 “Bisi 108,100 iku soldadu udah direjista dalam raban kem Efraim. Lebuh orang Israel mindah ngagai endur bukai, tu meh raban ti ketiga ke patut muka kem sida.
25 “Tiga iti raban bansa patut nirika kem ba begian utara nitihka raban soldadu sida, lalu raban bansa Dan deka nguluka raban kem tu. Ahieser anak Amisadai nyadi tuai raban bansa Dan.
26 Bisi 62,700 iku orang udah direjista nyadi soldadu dalam raban iya.
27 Raban bansa Aser nirika kem ba sepiak raban bansa Dan. Pagiel anak Okran nyadi tuai raban bansa Aser.
28 Bisi 41,500 iku orang udah direjista nyadi soldadu dalam raban iya.
29 Raban bansa Naptali mega nirika kem ba sepiak raban bansa Dan. Ahira anak Enan nyadi tuai raban bansa Naptali.
30 Bisi 53,400 iku orang udah direjista nyadi soldadu dalam raban iya.
31 “Bisi 157,600 iku soldadu udah direjista dalam raban kem Dan. Lebuh orang Israel deka mindah ngagai endur bukai, raban tu meh ke pemadu dudi muka kem sida.”
32 Nya meh orang Israel ke udah direjista nitihka suku sida. Semua nya bisi 603,550 iku orang udah direjista nyadi soldadu.
33 Tang orang Lewi enda direjista enggau orang Israel ke bukai, baka ke udah dipadahka Jehovah ngagai Moses.
34 Orang Israel ngereja semua utai ke udah dipadahka Jehovah ngagai Moses. Baka nya meh chara sida nirika kem nitihka raban kem sida, sereta muka kem sida lebuh sida deka mindah ngagai endur bukai. Sida ngereja nya nitihka ruang bilik enggau suku sida.
Nota Kaki
^ Dalam siti raban kem, bisi tiga iti raban bansa.
^ Tauka “tanda.”
^ Tauka “begian timur, tunga ngagai endur mata panas tumbuh.”
