Penyampau 21:1-35
21 Lebuh raja Arat, iya nya orang Kanaan ke diau ba Negeb ninga pasal orang Israel datai nengah jalai Atarim, iya pan nyerang orang Israel lalu nangkap sekeda ari sida nyadi orang tangkap.
2 Nya alai, orang Israel besumpah ngagai Jehovah: “Enti Nuan nyerahka sida ngagai kami, kami deka nganchurka kuta sida.”
3 Jehovah pan mendingka peminta orang Israel, lalu nyerahka orang Kanaan ngagai sida. Orang Israel ngemunaska semua orang Kanaan sereta nganchurka kuta orang Kanaan. Nya meh kebuah sida meri endur nya nama Hormah.*
4 Sida neruska pejalai sida ari Gunung Hor ngagai Tasik Mirah, ngambika sida enda bejalai nengah menua Edom. Lebuh ba rantau jalai, sida nyau berasai lelak sereta lemi.
5 Orang Israel lalu mutap ngelaban Petara enggau Moses. Ku sida: “Nama kebuah nuan mai kami pansut ari Ejip? Nuan ka kami mati ba menua puang tu, pia? Udah ga nadai ai, nadai ga pemakai. Udah leju kami makai roti ti nadai guna tu.”
6 Nya alai, Jehovah ngasuh mayuh ular ke bisa datai ngagai orang Israel. Ular nya mantuk sida, lalu mayuh ari sida mati.
7 Nyadi, orang Israel pan betemu enggau Moses lalu madahka: “Kami udah bedosa ngelaban nuan enggau Jehovah. Besampi meh ngagai Jehovah ngarika kami, ngambika Iya muai semua ular tu ari kami.” Moses pan besampi ngarika orang Israel.
8 Udah nya, Jehovah bejaku ngagai Moses: “Gaga siti patung ular, lalu engkahka patung nya ba siti tiang. Enti bisi orang kena pantuk ular, orang nya mesti merening patung nya ngambika iya enda mati.”
9 Moses pan ngaga siti patung ular ari temaga, lalu ngengkahka patung nya ba siti tiang. Enti bisi orang kena pantuk ular lalu orang nya merening patung ular nya, iya enda mati.
10 Udah nya, orang Israel neruska pejalai sida, lalu nirika kem ba Obot.
11 Sida mupuk ari Obot, lalu nirika kem ba Iye-abarim, iya nya menua puang ke ba sepiak timur, ke betunga enggau Moap.
12 Udah nya, sida mupuk ari endur nya, lalu nirika kem ba Lebak Zeret.
13 Sida neruska pejalai sida, lalu nirika kem ba kawasan Lebak Arnon, iya nya ba menua puang ke berengkah ari sempadan orang Amor. Lebak Arnon nya sempadan entara Moap enggau menua orang Amor.
14 Nya meh kebuah bup Perang Jehovah madah pasal “Wahep ba Supah sereta lebak-lebak ba Arnon.
15 Lebak-lebak nya nyentuk ngagai kuta Ar sereta sempadan Moap.”
16 Udah nya, sida mansang ngagai Beer. Tu meh telaga ke dipadahka Jehovah ngagai Moses. Ku Iya: “Gempuruka orang Israel, lalu Aku deka meri sida ai.”
17 Maya nya, orang Israel belagu munyi tu:
“O telaga, pansutka meh ai nuan! Belagu meh ke nya.
18 Telaga nya ditumbak bala pegawai, sereta ditumbak bala orang ke tinggi pangkat.
Sida numbak telaga nya ngena tungkat sida empu, sereta ngena tungkat pemerintah.”
Udah nya, sida mupuk ari menua puang lalu mansang ngagai Matanah.
19 Ari Matanah, sida ngagai Nahalil, lalu ari Nahalil, sida ngagai Bamot.
20 Ari Bamot, sida ngagai lebak ba kawasan Moap, ba atas Pisgah ke betunga enggau Jesimon.*
21 Udah nya, orang Israel nganjung beberapa iku orang betemu enggau Sihon, iya nya raja orang Amor. Ku sida madahka:
22 “Kami minta nuan ngemendarka kami nengah menua nuan. Kami enda nengah ladang tauka kebun anggur, lalu kami mega enda ngirup ai ari telaga nuan. Kami semina deka bejalai nengah Jalai Raja sampai kami pansut ari menua nuan.”
23 Tang, Raja Sihon enda ngemendarka orang Israel bejalai nengah menua iya. Iya ngempuruka bala soldadu iya, lalu mansang deka nyerang orang Israel ke ba menua puang. Lebuh sida datai ba Jahas, sida beperang enggau orang Israel.
24 Taja pia, orang Israel ngalahka sida lalu nguasa menua sida ari Lebak Arnon nyentuk ngagai Jabok, ke semak enggau menua orang Amon. Tang, sida enda nguasa Jaser, laban Jaser nya sempadan kawasan orang Amon.
25 Nya alai, orang Israel nguasa semua kuta orang Amor, nyengkaum Hesbon enggau kuta-kuta mit ke ngelingi iya. Sida lalu diau ba semua kuta nya.
26 Hesbon nya kuta Raja Sihon, raja orang Amor. Iya udah beperang ngelaban raja Moap, lalu ngambi semua menua raja Moap, nyentuk ngagai Lebak Arnon.
27 Nya meh ke ngasuh jaku kelese tu disebut:
“Datai meh ngagai Hesbon.
Awakka kuta Raja Sihon digaga lalu didirika enggau teguh.
28 Api pansut ari Hesbon, api pansut ari kuta Raja Sihon.
Api nya udah nganguska Ar ke ba Moap, api nya udah nganguska bala pemerintah ke ba endur ti tinggi ba Lebak Arnon.
29 Tulah meh nuan Moap! Nuan deka anchur, O kita orang ke nyembah Kemos!
Kemos ngasuh bala anak lelaki nuan nyadi pelarian, lalu bala anak indu nuan nyadi orang tangkap Raja Sihon, raja orang Amor.
30 Serang meh sida!
Hesbon deka anchur sampai ngagai Dibon.
Anchurka meh semua nya sampai ngagai Nopah.
Awakka api nganguska semua nya sampai ngagai Medeba.”
31 Nya alai, orang Israel pan diau ba menua orang Amor.
32 Udah nya, Moses nganjung beberapa iku orang ngintip Jaser. Sida nguasa kuta-kuta mit ke ngelingi Jaser, lalu muru orang Amor ke diau dia.
33 Udah nya, sida mupuk ngagai Jalai Basan. Tang Og, raja Basan, enggau bala soldadu iya datai deka nyerang sida ba Edrei.
34 Ku Jehovah bejaku ngagai Moses: “Anang takutka iya, laban Aku deka nyerahka iya, bala soldadu iya, enggau menua iya ngagai nuan. Nuan deka ngalahka iya baka nuan ke udah ngalahka Sihon, raja orang Amor ke diau ba Hesbon.”
35 Nya alai, sida munuh raja nya, bala anak lelaki iya, enggau semua bala soldadu iya, nyentukka nadai siku pan ari sida idup. Orang Israel pan lalu nguasa menua raja nya.
