Penyampau 22:1-41
22 Udah nya, orang Israel pan mupuk lalu nirika kem sida ba menua puang Moap, ba kawasan ke semak enggau Sungai Jordan, enda jauh ari Jeriko.
2 Lebuh Balak anak Sipur nemu semua utai ke udah digaga orang Israel ngagai orang Amor,
3 iya enggau orang Moap pan balat takutka orang Israel, laban penyampau orang Israel amat mayuh. Orang Moap balat amat takut sereta kesal.
4 Nya alai, orang Moap madah ngagai bala tuai orang Midian: “Semua utai ba endur kitai tu tentu abis magang laban bala sida ke mayuh nya, sama baka rumput ke abis magang diempa sapi.”
Maya nya, Balak anak Sipur nyadi raja orang Moap.
5 Iya nganjung beberapa iku orang betemu enggau Balam anak Beor. Balam diau ba menua asal iya, iya nya ba Petor, ke semak enggau Sungai Eupratis. Tu pesan Balak ngagai Balam: “Siti bansa udah pansut ari Ejip, lalu menua* tu nyau penuh laban sida. Diatu, sida nirika kem semak kawasan aku.
6 Nya alai, tulung meh aku nyumpah orang nya, laban sida kuat agi ari aku. Aku nemu orang ke diberekat nuan deka bulih berekat, lalu orang ke disumpah nuan deka kena sumpah. Ni nemu, aku ulih ngalahka sida lalu muru sida ari menua tu.”
7 Nyadi, bala tuai orang Moap enggau orang Midian pan mupuk betemu enggau Balam, lalu madahka pesan Balak ngagai iya. Sida mega bisi mai gaji ke Balam ngambika iya nyumpah orang Israel.
8 Ku iya bejaku ngagai sida: “Bemalam meh kita ba ditu. Aku deka madah ngagai kita utai ke dipadahka Jehovah ngagai aku.” Nyadi, bala tuai orang Moap pan diau enggau Balam.
9 Udah nya, Petara datai ngagai Balam lalu nanya: “Sapa bala sida tu ke enggau nuan?”
10 Ku Balam nyaut Petara ti bendar: “Sida mai pesan ari raja Moap, iya nya Balak anak Sipur. Balak madahka:
11 ‘Siti bansa udah pansut ari Ejip, lalu menua* tu nyau penuh laban sida. Nya alai, tulung meh aku nyumpah orang nya. Ni nemu, aku ulih ngalahka sida lalu muru sida ari menua tu.’”
12 Tang Petara madah ngagai Balam: “Anang mupuk enggau sida. Anang nyumpah orang nya, laban Aku udah merekatka sida.”
13 Pagi hari siti, Balam dani lalu bejaku ngagai bala tuai ke dianjung Balak: “Pulai meh ngagai menua kita, laban Jehovah enda ngasuh aku mupuk enggau kita.”
14 Nyadi, bala tuai orang Moap nya pan pulai baru ngagai Balak lalu madahka iya: “Balam enggai enggau kami.”
15 Tang, Balak nganjung mayuh agi bala tuai ke tinggi agi pangkat ari raban ke sebedau tu.
16 Sida pan betemu enggau Balam lalu madahka: “Tu pesan ari Balak anak Sipur: ‘Anang nejuka nama-nama utai nagang nuan datai kitu ngagai aku.
17 Aku deka meri nuan upah ti besai, lalu aku deka ngereja semua utai ke dipinta nuan. Nyadi kitu meh, lalu sumpah orang nya ke aku.’”
18 Tang ku Balam nyaut: “Taja pan Balak meri aku rumah iya empu ke penuh enggau pirak enggau emas, nadai meh aku ulih ngelaban pesan Petara aku, Jehovah, enda ngira ba pekara ti mit tauka besai.
19 Taja pia, bemalam dulu meh enggau aku ditu, ngambika aku nemu nama agi utai ke dipadahka Jehovah ngagai aku.”
20 Malam nya, Petara datai ngagai Balam lalu bejaku ngagai iya: “Enti bala orang nya udah datai mai nuan kin, alai meh nuan mupuk enggau sida. Tang, nuan semina tau nyebut utai ke dipadahka Aku ngagai nuan.”
21 Nyadi pagi hari siti, Balam angkat lalu nyediaka keledai iya. Iya pan mupuk enggau bala tuai orang Moap nya.
22 Balam nepan keledai iya, lalu dua iku penulung iya pan bisi enggau iya. Tang, Petara ringat lebuh Balam mupuk enggau bala orang nya. Melikat Jehovah bediri ba tengah jalai ngambika ulih ngempang jalai iya.
23 Lebuh keledai nya meda melikat Jehovah ke benung megai pedang bediri ba tengah jalai, keledai nya lalu nguingka diri tunga ngagai ladang. Tang, Balam malu keledai iya ngambika keledai nya pulai baru ngagai jalai nya.
24 Udah nya, melikat Jehovah bediri ba jalai ke sempit, ba entara dua iti kebun anggur. Ba kedua piak jalai nya bisi dinding batu.
25 Lebuh keledai nya meda melikat Jehovah, keledai nya pan ngempitka diri ke tisi dinding nyentukka kaki Balam tesepit. Nyadi, Balam pan malu keledai nya baru.
26 Udah nya, melikat Jehovah mindah ke depan lalu bediri ba endur ke sempit agi. Jalai nya nadai endur alai nguing ke kiba tauka ke kanan.
27 Lebuh keledai nya meda melikat Jehovah, keledai nya lalu ngenudukka diri. Balam pan ringat lalu majak malu keledai nya ngena tungkat iya.
28 Pengujung iya, Jehovah ngasuh keledai nya bejaku, lalu keledai nya bejaku ngagai Balam: “Nama salah aku, sampai nuan malu aku tiga kali?”
29 Ku Balam nyaut: “Laban nuan ngemelika aku. Enti aku bisi pedang, udah nuan aku bunuh!”
30 Udah nya, keledai nya madah ngagai Balam: “Aku belama ke ditepan nuan sepemanjai pengidup nuan. Kala aku ngaga nuan baka tu?” Ku Balam nyaut: “Nadai kala!”
31 Udah nya, Jehovah ngasuh Balam meda melikat Iya. Lebuh Balam meda melikat Jehovah ke benung megai pedang bediri ba tengah jalai, iya pan terus besugang lalu nyungkurka diri ke tanah.
32 Ku melikat Jehovah bejaku ngagai Balam: “Nama kebuah nuan malu keledai nuan tiga kali? Aku datai deka nagang nuan, laban nuan deka ngereja utai ke enda nitihka peneka aku.
33 Keledai nuan meda aku, lalu nguji nguingka diri ari aku tiga kali. Enti iya enda ngereja nya, tentu nuan udah kena bunuh aku lalu aku nejuka iya idup.”
34 Ku Balam madah ngagai melikat Jehovah: “Aku udah bedosa. Aku enda nemu nuan ke bediri ba jalai nya kena ngempang jalai aku. Enti pejalai aku tu enda ngelantangka ati nuan, pulai baru ga aku.”
35 Ku melikat Jehovah nyaut Balam: “Mupuk meh enggau sida. Tang, nuan semina tau nyebut utai ke dipadahka aku ngagai nuan.” Nyadi, Balam pan neruska pejalai iya enggau bala tuai ke dianjung Balak.
36 Lebuh Balak ninga Balam udah datai, iya lalu betemu enggau Balam ba kota Moap, ke ba tebing Sungai Arnon, ke ba sempadan menua nya.
37 Ku Balak madah ngagai Balam: “Aku udah nganjung orang ngagai nuan. Tang, nama kebuah nuan enda kitu? Nuan ngumbai aku enda ulih meri nuan upah ti besai, pia?”
38 Ku Balam nyaut: “Udah aku datai deh. Tang, aku enda ulih nyebut nama-nama utai nitihka peneka aku. Aku semina ulih nyebut utai ke diasuh Petara.”
39 Balam pan mupuk enggau Balak, lalu seduai iya datai ba Kiriat-huzot.
40 Balak nyerahka sapi enggau bedus nyadika pemeri. Iya meri sekeda ari pemeri nya ngagai Balam enggau bala tuai ke dianjung iya.
41 Pagi hari siti, Balak mai Balam ngagai Bamot-baal. Ari endur nya, Balam ulih meda semua orang Israel.
