Penyampau 23:1-30
23 Udah nya, Balam madah ngagai Balak: “Gaga tujuh iti alta ba ditu, lalu sediaka tujuh iku sapi ke lelaki enggau tujuh iku bedus ke lelaki ke aku.”
2 Balak pan terus ngereja utai ke diasuh Balam. Seduai iya nyerahka siku sapi enggau siku bedus ba tiap iti alta.
3 Ku Balam bejaku ngagai Balak: “Nuan nganti ditu dulu, ba sepiak pemeri tunu nuan. Aku mupuk dulu, laban engka Jehovah deka datai lalu bejaku enggau aku. Aku deka madah ngagai nuan nama-nama utai ke dipadahka Iya.” Balam pan mansang ngagai tuchung bukit.
4 Udah nya, Petara datai ngagai Balam. Ku Balam madah ngagai Iya: “Aku udah nyediaka tujuh iti alta, lalu aku udah nyerahka siku sapi ke lelaki enggau siku bedus ke lelaki ba tiap iti alta nya.”
5 Jehovah madah ngagai Balam utai ke patut disebut iya. Udah nya, Petara madah ngagai Balam: “Pulai baru ngagai Balak, lalu tu meh utai ke patut disebut nuan.”
6 Nyadi, Balam pan pulai baru, lalu meda Balak agi bediri ba sepiak pemeri tunu iya, sama enggau semua bala tuai orang Moap.
7 Udah nya, Balam madahka pesan tu:
“Balak, raja Moap, udah mai aku datai ari Aram,Ari gunung ba sepiak timur.
Ku iya: ‘Kitu meh lalu sumpah Jakop ke aku;Datai meh ngutuk Israel.’
8 Baka ni ku aku tau nyumpah orang ke enda disumpah Petara?
Baka ni ku aku tau ngutuk orang ke enda dikutuk Jehovah?
9 Ari atas bukit batu, aku meda sida,Lalu ari atas bukit, aku beratika sida.
Bansa sida enda begulai enggau bansa bukai;Sida udah nyeraraka diri ari bansa bukai.
10 Sapa ke ulih ngira peturun Jakop ke ngemayuh debu?
Sapa ke ulih ngira indah satu perempat ari orang Israel?
Awakka aku mati baka orang ke lurus;Awakka pengujung idup aku sama baka sida.”
11 Ku Balak madah ngagai Balam: “Nama kebuah nuan ngaga aku baka tu? Aku mai nuan kitu ngambika nuan nyumpah munsuh aku, tang nuan merekatka sida.”
12 Ku Balam nyaut: “Ukai ke enda aku semina tau nyebut utai ke diasuh Jehovah?”
13 Ku Balak madah ngagai Balam: “Aram tua ngagai siti da agi endur. Ari endur nya, nuan semina deka meda sebagi ari sida. Sumpah meh sida ke aku ari endur nya.”
14 Balak pan lalu mai Balam ngagai padang Sopim ba kawasan atas Pisgah. Udah nya, iya ngaga tujuh iti alta, lalu nyerahka siku sapi ke lelaki enggau siku bedus ke lelaki ba tiap iti alta nya.
15 Ku Balam madah ngagai Balak: “Nuan nganti ditu dulu ba sepiak pemeri tunu nuan. Aku deka betemu enggau Petara ba din.”
16 Udah nya, Jehovah datai ngagai Balam, lalu madah ngagai iya utai ke patut disebut iya. Ku Petara madah ngagai Balam: “Pulai baru ngagai Balak, lalu tu meh utai ke patut disebut nuan.”
17 Nya alai, Balam pan pulai baru ngagai Balak, lalu meda Balak benung nganti ba sepiak pemeri tunu iya, sama enggau bala tuai orang Moap. Ku Balak nanya Balam: “Nama utai ke dipadahka Jehovah?”
18 Udah nya, Balam madahka pesan tu:
“Bediri meh nuan, Balak, lalu dingaka tu.
O anak Sipur, dingaka utai ke disebut aku.
19 Petara enda baka mensia ke bula;Iya mega enda baka mensia ke ngubah runding diri.
Nama-nama utai ke disebut Iya, tentu deka dikereja Iya;Nama-nama utai ke dipadahka Iya, tentu deka digaga Iya.
20 Aku diasuh madahka berekat;Petara udah merekatka sida, lalu aku enda ulih ngubah nya.
21 Petara enda nejuka kuasa sihir* ngelaban Jakop,Lalu Iya enda nejuka nama-nama penanggul ninggang Israel.
Jehovah, Petara sida, bisi enggau sida.
Iya meh raja sida, lalu sida balat muji Iya.
22 Petara udah mai sida pansut ari Ejip.
Ba sida, Iya baka tanduk sapi ti lelaki ke liar.
23 Nadai puchau ulih ngelaban Jakop,Lalu nadai pengaruh ulih ngelaban Israel.
Maya tu, engka bisi orang madah baka tu pasal Jakop enggau Israel:
‘Peda nama utai ke udah digaga Petara!’
24 Bansa tu deka angkat baka singa;Sida deka angkat kediri baka singa.
Sida enda gali nyentukka sida makai mansa sidaSereta ngirup darah mansa sida.”
25 Udah nya, Balak madah ngagai Balam: “Enti nuan enda ulih nyumpah sida, anang ga nuan merekatka sida.”
26 Ku Balam nyaut Balak: “Ukai ke enda aku udah madahka nuan, aku semina ngereja utai ke diasuh Jehovah?”
27 Ku Balak madah ngagai Balam: “Aram enggau aku ngagai siti agi endur. Ni nemu Petara ti bendar ngemendarka nuan nyumpah sida ke aku ari endur nya.”
28 Nya alai, Balak mai Balam ngagai atas Gunung Peor, ke betunga enggau Jesimon.*
29 Udah nya, Balam madah ngagai Balak: “Gaga tujuh iti alta ba ditu, lalu sediaka tujuh iku sapi ke lelaki enggau tujuh iku bedus ke lelaki ke aku.”
30 Balak lalu ngereja utai ke diasuh Balam. Iya nyerahka siku sapi enggau siku bedus ba tiap iti alta nya.
