Penyampau 24:1-25
24 Lebuh Balam nyau sedar Jehovah deka merekatka orang Israel, iya badu agi begigaka tanda ti enda manah, baka ke digaga iya sebedau tu. Iya malik ngagai menua puang,
2 lalu meda orang Israel nirika kem sida nitihka raban bansa sida. Udah nya, Balam nerima kuasa kudus Petara.
3 Iya lalu madahka pesan tu:
“Tu meh pesan Balam anak Beor,Tu meh pesan siku lelaki ke nyau ulih meda enggau terang,
4 Tu meh pesan siku orang ke udah ninga jaku Petara,Ke udah meda utai ke dipandangka Petara ti Pemadu Bekuasa ba dalam runding iya.
Lebuh iya nyungkurka diri ke tanah, mata iya tebuka:
5 Chukup manah langkau kain nuan, O Jakop!
Naka meh pemanah endur alai nuan diau, O Israel!
6 Baka lebak ke ngerembai enggau luas,Baka taman ba tebing sungai,Baka pun kayu garu ke ditanam Jehovah,Baka pun kayu sidar ke ba tebing ai.
7 Ai terus neritik ari dua iti beledi iya;Benih iya ditanam ba semak endur ke mayuh ai.
Raja iya deka lebih agi bemulia ari Agak,Lalu perintah iya deka nyadi amat bekuasa.
8 Petara mai Israel pansut ari Ejip;Ba sida, Iya baka tanduk sapi ti lelaki ke liar.
Israel deka ngemunaska bansa ke merinsaka sida;Israel deka ngunyah tulang bala munsuh sida, lalu nganchurka munsuh ngena anak panah sida.
9 Sida baka singa ke benung duduk, baka singa ke benung tinduk.
Sapa ke berani ngerak iya?
Barang sapa ke merekatka sida deka diberekat,Lalu barang sapa ke nyumpah sida deka disumpah.”
10 Udah nya, Balak pan balat amat ringat ngagai Balam. Balak nempikka jari iya kena nyindir Balam. Ku iya: “Aku ngangauka nuan kitu laban aku deka ngasuh nuan nyumpah munsuh aku. Tang nuan merekatka sida tiga kali.
11 Alai nuan pulai diatu! Kebendar iya, aku deka meri nuan upah ti besai. Tang, Jehovah udah nagang nuan ari nerima nya.”
12 Ku Balam nyaut Balak: “Endaka aku udah madah ngagai orang ke dianjung nuan:
13 ‘Taja pan Balak meri aku rumah iya empu ke penuh enggau pirak enggau emas, nadai meh aku ulih ngelaban pesan Jehovah, enda ngira ba pekara ti manah tauka jai. Aku semina nyebut utai ke dipadahka Jehovah ngagai aku aja’?
14 Diatu aku deka pulai ngagai bansa aku empu. Tang, awakka aku madah ngagai nuan pasal nama utai ke deka digaga bansa tu ngagai bansa nuan ila.”
15 Iya lalu madahka pesan tu:
“Tu meh pesan Balam anak Beor,Tu meh pesan siku lelaki ke nyau ulih meda enggau terang,
16 Tu meh pesan siku orang ke udah ninga jaku Petara,Ke bulih penemu ari Petara ti Pemadu Tinggi,Ke udah meda utai ke dipandangka Petara ti Pemadu Bekuasa ba dalam runding iya.
Lebuh iya nyungkurka diri ke tanah, mata iya tebuka:
17 Aku deka meda iya, tang ukai diatu;Aku deka merening iya, tang bedau agi.
Sigi bintang deka pansut ari Jakop;Siti tungkat diraja deka datai ari Israel.
Iya tentu deka ngeredakka kening orang Moap,Lalu tengkorak orang ke ganas deka dianchurka iya.
18 Lebuh Israel nunjukka pemerani iya,Edom deka dikuasa iya,Lalu Seir deka dikuasa bala munsuh iya.
19 Siku orang ke datai ari Jakop deka ngalahka munsuh,Lalu iya deka ngemunaska semua orang ari kuta nya ke agi idup.”
20 Lebuh Balam meda orang Amalek, iya lalu madahka pesan tu:
“Amalek meh bansa ti keterubah entara semua bansa,*Tang pengujung iya, bansa nya deka nadai agi.”
21 Lebuh Balam meda orang Keni, iya lalu madahka pesan tu:
“Endur alai nuan diau amat selamat, baka sarang burung ba atas bukit batu.
22 Tang bisi orang deka nunu semua kita, orang Keni.
Berapa lama agi sebedau orang Asiria nangkap kita?”
23 Udah nya, Balam madahka pesan tu:
“Sapa ke ulih selamat lebuh Petara ngenataika penulah tu?
24 Kapal deka datai ari tebing tasik Kitim.
Sida deka nyerang Asiria,Lalu sida deka nyerang Eber.
Tang sida empu mega deka dipunaska.”
25 Pengudah nya, Balam pan mupuk lalu Balak pan pulai.
Nota Kaki
^ Iya nya, bansa ke dulu nyerang orang Israel pengudah orang Israel pansut ari Ejip.
