Penyampau 28:1-31
28 Udah nya, Jehovah bejaku ngagai Moses:
2 “Padah ngagai orang Israel: ‘Kita mesti nyerahka pemakai, iya nya pemeri ke Aku ba maya ke udah ditetapka. Bau ari pemeri ke ditunu nya ngelantangka ati Aku.’
3 “Padah ngagai orang Israel: ‘Kita mesti nyerahka dua iku anak bedus ke lelaki ke beumur setaun ke nadai penimpang nyadika pemeri tunu ke Aku, Jehovah. Kita mesti nyerahka pemeri tunu tu ninting hari.
4 Serahka siku bedus maya pagi hari, lalu siku da agi maya lemai hari.*
5 Lebuh nyerahka bedus nya, serahka satu kilogram* tepung ke alus ke udah dichampurka enggau satu liter* minyak kana ti tulin nyadika pemeri bijirin.
6 Nya meh pemeri tunu ke patut seruran diserahka kita. Atur nya udah ditetapka ba Gunung Sinai. Bau ari pemeri ke ditunu nya ngelantangka ati Aku, Jehovah.
7 Lebuh nyerahka bedus nya, serahka mega satu liter wain nyadika pemeri wain ke Aku, Jehovah. Wain nya mesti dituangka ba alta.*
8 Bedus ke siku da agi mesti diserahka maya lemai hari.* Serahka bedus nya begulai enggau pemeri bijirin enggau pemeri wain, sama baka ke digaga kita maya pagi hari. Bau ari pemeri ke ditunu nya ngelantangka ati Aku, Jehovah.
9 “‘Maya Hari Sabat, kita mega mesti nyerahka dua iku anak bedus ke lelaki ke beumur setaun sereta ke nadai penimpang. Lebuh nyerahka bedus nya, kita mega mesti nyerahka pemeri wain sereta dua kilogram* tepung ti alus ke dichampurka enggau minyak nyadika pemeri bijirin.
10 Nya meh pemeri tunu ke diserahka maya Hari Sabat, kelimpah ari pemeri tunu sereta pemeri wain ke diserahka ninting hari.
11 “‘Ba hari ti keterubah, ninting bulan, kita mesti nyerahka dua iku sapi ke lelaki ke agi biak, siku bedus ke lelaki, sereta tujuh iku anak bedus ke lelaki ke beumur setaun nyadika pemeri tunu ke Aku, Jehovah. Semua jelu nya patut nadai penimpang.
12 Serahka 3.5 kilogram* tepung ti alus ke dichampurka enggau minyak nyadika pemeri bijirin ke tiap iku sapi ke lelaki, serahka 2 kilogram tepung ti alus ke dichampurka enggau minyak nyadika pemeri bijirin ke siku bedus ke lelaki,
13 lalu serahka 1 kilogram tepung ti alus ke dichampurka enggau minyak nyadika pemeri bijirin ke tiap iku anak bedus ke lelaki. Semua jelu nya mesti diserahka nyadika pemeri tunu ke Aku, Jehovah. Bau ari pemeri ke ditunu nya ngelantangka ati Aku.
14 Serahka pemeri wain begulai enggau pemeri tunu nya, iya nya 2 liter* wain ke tiap iku sapi ke lelaki, 1.2 liter* wain ke siku bedus ke lelaki, sereta 1 liter wain ke tiap iku anak bedus ke lelaki. Pemeri tunu nya mesti diserahka ninting bulan sepemanjai taun.
15 Kelimpah ari pemeri tunu sereta pemeri wain ke diserahka ninting hari, serahka mega ke Aku, Jehovah, siku kambin ke lelaki ke agi biak nyadika pemeri kena ngulihka pengampun dosa.
16 “‘Kita mesti ngintu Pengerami Paska ke Aku, Jehovah, ba hari ke-14 ba bulan ti keterubah.
17 Ba hari ke-15 bulan nya, kita mesti ngintu siti pengerami. Kita mesti makai roti ke enda beragi pengelama tujuh hari.
18 Ba hari ti keterubah pengerami nya, kita mesti begempuru nyembah Aku. Maya nya, kita enda tau ngereja pengawa ti berat.
19 Kita mesti nyerahka dua iku sapi ke lelaki ke agi biak, siku bedus ke lelaki, sereta tujuh iku anak bedus ke lelaki ke beumur setaun nyadika pemeri tunu ke Aku, Jehovah. Semua jelu nya patut nadai penimpang.
20 Begulai enggau pemeri tunu nya, kita mesti nyerahka pemeri bijirin, iya nya tepung ti alus ke dichampurka enggau minyak. Serahka 3.5 kilogram tepung ke tiap iku sapi ke lelaki, 2 kilogram tepung ke siku bedus ke lelaki,
21 sereta 1 kilogram tepung ke tiap iku anak bedus ke lelaki.
22 Serahka mega siku kambin ke lelaki nyadika pemeri kena ngulihka pengampun dosa ke dosa kita.
23 Nya meh pemeri ke mesti diserahka kita, kelimpah ari pemeri tunu ke diserahka kita tiap pagi.
24 Baka nya meh chara kita patut nyerahka pemeri nya ninting hari, pengelama tujuh hari. Bau ari pemeri ke ditunu ke Aku nya ngelantangka ati Aku, Jehovah. Semua pemeri nya mesti diserahka, kelimpah ari pemeri tunu sereta pemeri wain ke diserahka ninting hari.
25 Ba hari ti ketujuh, kita mesti begempuru nyembah Aku. Maya nya, kita enda tau ngereja pengawa ti berat.
26 “‘Ba hari kita ngetau asil ti keterubah ari ladang kita sereta nyerahka pemeri bijirin ti baru ke Aku, Jehovah, kita mesti begempuru nyembah Aku. Kita enda tau ngereja pengawa ti berat maya nya.
27 Kita mesti nyerahka dua iku sapi ke lelaki ke agi biak, siku bedus ke lelaki, sereta tujuh iku anak bedus ke lelaki ke beumur setaun nyadika pemeri tunu ke Aku, Jehovah. Bau ari pemeri nya ngelantangka ati Aku.
28 Kita mesti nyerahka pemeri bijirin, iya nya tepung ti alus ke dichampurka enggau minyak. Serahka 3.5 kilogram tepung ke tiap iku sapi ke lelaki, 2 kilogram tepung ke siku bedus ke lelaki,
29 sereta 1 kilogram tepung ke tiap iku anak bedus ke lelaki.
30 Serahka mega siku kambin ke lelaki ke agi biak nyadika pemeri kena ngulihka pengampun dosa ke dosa kita.
31 Semua pemeri nya mesti diserahka, kelimpah ari pemeri tunu, pemeri bijirin, sereta pemeri wain ke diserahka ninting hari. Semua jelu ke diserahka nya enda tau bisi penimpang.
Nota Kaki
^ Engka merujuk ngagai timpuh pengudah mata panas padam, tang sebedau hari petang.
^ Jaku Asal, “satu persepuluh efah.” Peda Rujukan B14.
^ Jaku Asal, “satu perempat hin.” Peda Rujukan B14.
^ Jaku Asal, “endur ti kudus.”
^ Engka merujuk ngagai timpuh pengudah mata panas padam, tang sebedau hari petang.
^ Jaku Asal, “dua persepuluh efah.”
^ Jaku Asal, “tiga persepuluh efah.”
^ Jaku Asal, “setengah hin.”
^ Jaku Asal, “satu pertiga hin.”
