Penyampau 30:1-16
30 Udah nya, Moses bejaku enggau bala tuai raban bansa Israel. Ku iya: “Tu meh pesan Jehovah:
2 Enti siku lelaki besumpah tauka besemaya ngagai Jehovah deka ngereja sesiti utai tauka enggai ngereja sesiti utai, iya mesti ngamatka sumpah iya. Iya mesti ngereja semua utai ke udah disebut iya.
3 “Enti siku indu ke biak ke agi diau enggau apai iya besumpah tauka besemaya ngagai Jehovah deka ngereja sesiti utai tauka enggai ngereja sesiti utai,
4 iya mesti ngamatka semua utai ke disebut iya. Tu ketegal apai iya udah ninga sumpah nya, lalu enda nagang iya ari ngereja nya.
5 Tang, enti apai iya ninga sumpah ke digaga iya lalu nagang iya ari ngamatka sumpah nya, iya enda ibuh ngamatka sumpah nya. Jehovah deka ngampunka iya laban apai iya nagang iya ari ngamatka sumpah nya.
6 “Tang, enti iya kawin pengudah iya ngaga sumpah tauka pengudah iya beguai-guai ngaga semaya,
7 lalu laki iya enda nagang iya ngamatka sumpah nya pengudah ninga pasal sumpah nya, iya agi patut ngamatka sumpah nya.
8 Enti laki iya nagang iya ngamatka sumpah iya ba hari ti sama laki iya ninga pasal sumpah nya, sumpah iya deka dikinsil, nyengkaum semaya ke digaga iya enggau beguai-guai. Jehovah deka ngampunka iya.
9 “Tang, enti siku indu balu tauka siku indu ke udah sarak ngaga sumpah, iya mesti ngamatka sumpah nya.
10 “Enti siku indu ke udah kawin besumpah tauka besemaya deka ngereja sesiti utai tauka enggai ngereja sesiti utai,
11 iya mesti ngamatka semua utai ke disebut iya. Tu ketegal laki iya udah ninga sumpah nya, lalu enda nagang iya ari ngereja nya.
12 Tang, enti laki iya nagang iya ngamatka sumpah iya ba hari ti sama laki iya ninga pasal sumpah nya, semua sumpah iya deka dikinsil. Laki iya udah nginsil sumpah nya, lalu Jehovah deka ngampunka iya.
13 Laki iya ulih setuju tauka nginsil sumpah ke digaga iya, enda ngira nya sumpah deka ngereja sesiti utai tauka sumpah enggai ngereja sesiti utai.
14 Enti laki iya enda nagang iya pengudah beberapa hari iya ngaga sumpah, iya mesti ngamatka semua sumpah nya. Ketegal laki iya enda nagang iya ngamatka sumpah iya ba hari ti sama laki iya ninga pasal sumpah nya, nya nunjukka laki iya setuju enggau sumpah nya.
15 Tang, enti laki iya nginsil sumpah nya dudi hari, laki iya deka betanggungjawapka penyalah bini iya.
16 “Nya meh atur ke dipadahka Jehovah ngagai Moses, pasal utai ke ulih digaga laki lebuh bini iya ngaga sumpah, sereta pasal utai ke ulih digaga apai lebuh anak indu iya ke agi biak, ke diau serumah enggau iya, ngaga sumpah.”
