Penyampau 31:1-54
31 Udah nya, Jehovah bejaku ngagai Moses:
2 “Balas penyai ke digaga orang Midian ngagai orang Israel. Udah nya, nuan deka mati lalu dikuburka baka aki ini nuan.”
3 Moses lalu bejaku ngagai orang Israel: “Asuh sida ke lelaki ba bala kita besedia beperang ngelaban orang Midian. Balas penyai ke digaga orang Midian, baka ke diasuh Jehovah.
4 Asuh 1,000 iku lelaki ari tiap iti raban bansa Israel enggau beperang.”
5 Ari beribu iku orang Israel, 1,000 iku orang ari tiap iti raban bansa dipilih. Kesemua iya, bisi 12,000 iku orang besedia deka mansang beperang.
6 Udah nya, Moses ngasuh sida iya mupuk enggau Pinehas anak Imam Eleasar. Pinehas mai pekekas ti kudus sereta mai terumpit kena meri signal.
7 Sida beperang ngelaban orang Midian, baka ke dipadahka Jehovah ngagai Moses. Semua lelaki orang Midian dibunuh sida magang.
8 Sida mega munuh lima iku raja orang Midian, iya nya Ebi, Rekem, Zur, Hur, enggau Reba. Kelimpah ari nya, sida mega munuh Balam anak Beor.
9 Tang, orang Israel nangkap semua orang indu enggau anak mit orang Midian. Sida mega ngerampas jelu tupi enggau reta tengkira orang Midian.
10 Semua kuta enggau kem orang Midian ditunu sida magang.
11 Semua utai dirampas sida magang, enda ngira nya mensia tauka jelu.
12 Udah nya, sida mai semua nya ngagai Moses, Imam Eleasar, enggau semua orang Israel ke diau ba kem sida ba menua puang Moap, ba kawasan ke semak enggau Sungai Jordan, enda jauh ari Jeriko.
13 Moses, Imam Eleasar, enggau semua bala tuai orang Israel pan betemu enggau sida ba luar kem.
14 Tang, Moses balat amat ringat ngagai sida ke dilantik nyadi ketuai soldadu, iya nya sida ke nyadi ketuai atas 1,000 iku orang enggau ketuai atas 100 iku orang, ke baru pulai beperang.
15 Moses madah ngagai sida: “Nama kebuah kita nejuka semua sida ke indu tu idup?
16 Endaka bala indu tu ke diasuh Balam mai orang Israel ngereja utai ke ngasuh sida enda setia ngagai Jehovah ba Peor, nyentukka nembiak Jehovah ditinggang penulah?
17 Diatu, bunuh semua anak mit ke lelaki enggau semua indu ke kala ngereja pengawa seks.
18 Tang semua indu ke agi biak, ke nadai kala ngereja pengawa seks, tau ditejuka idup.
19 Kita mesti diau ba luar kem pengelama tujuh hari. Tiap iku kita ke udah munuh orang sereta ke udah negu bangkai orang, mesti nuchi diri ba hari ti ketiga enggau ba hari ti ketujuh. Orang ke ditangkap kita mega mesti nuchi diri.
20 Semua gari sereta semua utai ke digaga ari kulit, kayu, enggau bulu kambin mesti digaga nyadi tuchi.”
21 Udah nya, Imam Eleasar bejaku ngagai sida ke baru pulai beperang: “Tu meh adat ke dipadahka Jehovah ngagai Moses:
22 ‘Semua emas, pirak, temaga, besi, timah putih, timah chelum,
23 enggau semua utai ke enda ulih diempa api mesti ditunu, ngambika utai nya nyadi tuchi. Utai nya mega mesti digaga nyadi tuchi ngena ai. Tang, semua utai ke ulih diempa api mesti dituchi ngena ai.
24 Ba hari ti ketujuh, kita mesti masu gari kita lalu nyadi tuchi. Pengudah nya, baru kita ulih tama ngagai kem.’”
25 Udah nya, Jehovah bejaku ngagai Moses:
26 “Nuan, Imam Eleasar, enggau bala tuai raban bansa Israel mesti ngitung lalu nuliska semua utai ke dirampas, nyengkaum jelu enggau orang ke ditangkap.
27 Bagi dua utai ke dirampas kita nya. Sebagi ari utai nya patut diberi ngagai bala soldadu ke enggau beperang, lalu sebagi da agi diberi ngagai orang Israel ke bukai.
28 Ari begian ke diberi ngagai bala soldadu ke enggau beperang, ambi siku* ari tiap 500 iku orang ke ditangkap lalu beri iya ngagai Aku, Jehovah. Gaga utai ti sama enggau sapi, keledai, bedus, enggau kambin ke dirampas.
29 Beri utai nya ngagai Imam Eleasar nyadika pemeri ke Aku, Jehovah.
30 Ari begian ke diberi ngagai orang Israel ke bukai, ambi siku ari tiap 50 iku orang ke ditangkap lalu beri iya ngagai orang Lewi ke bejalaika tanggung pengawa bekaul enggau langkau sembiang Aku, Jehovah. Gaga utai ti sama enggau sapi, keledai, bedus, kambin, enggau semua jelu tupi ke bukai.”
31 Nyadi, Moses enggau Imam Eleasar pan ngereja semua utai ke dipadahka Jehovah ngagai Moses.
32 Tu meh penyampau utai ke dirampas bala soldadu: 675,000 iku bedus enggau kambin,
33 72,000 iku sapi,
34 enggau 61,000 iku keledai.
35 Penyampau bala indu ke bedau kala ngereja pengawa seks bisi 32,000 iku.
36 Penyampau bedus enggau kambin ke diberi ngagai bala soldadu bisi 337,500 iku.
37 Ari penyampau nya, 675 iku kambin enggau bedus diberi ngagai Jehovah.
38 Penyampau sapi ke diberi ngagai bala soldadu bisi 36,000 iku, lalu 72 iku diberi ngagai Jehovah.
39 Penyampau keledai ke diberi ngagai bala soldadu bisi 30,500 iku, lalu 61 iku diberi ngagai Jehovah.
40 Penyampau orang ke ditangkap bisi 16,000 iku, lalu 32 iku ari bala sida diberi ngagai Jehovah.
41 Semua utai ke diempu Jehovah diberi Moses ngagai Imam Eleasar, baka ke dipadah Jehovah ngagai Moses.
42 Tu meh penyampau utai ke dirampas ke diberi ngagai orang Israel ke bukai:
43 337,500 iku bedus enggau kambin,
44 36,000 iku sapi,
45 30,500 iku keledai,
46 enggau 16,000 iku orang ke ditangkap.
47 Udah nya, Moses pan ngambi siku ari tiap 50 iku jelu enggau orang ke ditangkap, lalu nyerahka semua nya ngagai orang Lewi ke gawa ba langkau sembiang Jehovah, baka ke dipadah Jehovah ngagai Moses.
48 Udah nya, bala ketuai soldadu, iya nya sida ke nyadi ketuai atas 1,000 iku orang enggau ketuai atas 100 iku orang, datai betemu enggau Moses.
49 Ku sida bejaku ngagai Moses: “Kami udah ngitung semua soldadu ke dikemataka kami, lalu nadai siku pan ari sida iya lenyau.
50 Nya alai, kami deka nyerahka pemeri ngagai Jehovah ngambika Iya ulih ngampunka dosa kami. Kami deka nyerahka utai ke digaga ari emas, gelang kaki, gelang jari, tinchin,* antin, enggau barang kemas ke bukai ngagai Jehovah.”
51 Moses enggau Imam Eleasar lalu nerima semua emas enggau barang kemas nya.
52 Penyampau emas ke diberi ngagai Jehovah ari bala tuai atas 1,000 iku orang enggau bala tuai atas 100 iku orang, bisi kira-kira 200 kilogram.*
53 Semua soldadu udah ngambi utai ke dirampas ke diberi ngagai sida siku-siku.
54 Moses enggau Imam Eleasar nerima semua emas ke diberi bala tuai atas 1,000 iku orang enggau bala tuai atas 100 iku orang. Seduai iya mai emas nya ngagai langkau gempuru ngambika orang Israel ingatka utai ke udah digaga Jehovah ke sida.
Nota Kaki
^ Jaku Asal, “siti ne′phesh.” Peda Penerang Leka Jaku, “Ne′phesh.”
^ Iya nya, tinchin ke bisi chop pemerintah tauka chop orang ke penting.
^ Jaku Asal, “16,750 shekel.” Peda Rujukan B14.
