Penyampau 32:1-42
-
Endur diau ba timur Sungai Jordan (1-42)
32 Raban bansa Reuben enggau raban bansa Gat bisi mayuh amat jelu tupi, lalu sida meda menua Jaser enggau Gilead manah amat endur alai nupi jelu.
2 Nyadi, sida pan betemu enggau Moses, Imam Eleasar, enggau bala tuai orang Israel lalu madahka:
3 “Atarot, Dibon, Jaser, Nimrah, Hesbon, Elealeh, Sebam, Nebo, enggau Beon
4 nya endur ke udah dialahka Jehovah ke orang Israel. Menua nya manah alai nupi jelu, lalu kami bisi mayuh jelu tupi.
5 Enti nuan setuju, ulih kami minta menua nya ngambika diempu kami? Enda ibuh meh kami ke seberai Sungai Jordan.”
6 Udah nya, Moses madah ngagai raban bansa Gat enggau raban bansa Reuben: “Bala menyadi kita deka mansang beperang. Tang, kita deka diau ba ditu pia?
7 Enti pia, orang Israel kakang ati deka mansang ngagai menua ke diberi Jehovah ba seberai din. Nama kebuah kita deka ngasuh orang Israel lemi semengat?
8 Nya meh utai ke digaga bala aki kita ba Kades-barnea lebuh aku ngasuh sida ngintip menua nya.
9 Sida niki ngagai Lebak Eskol, lalu meda menua ke udah disemayaka Jehovah. Tang, sida ngasuh orang Israel lemi semengat lalu orang Israel enggai ngagai menua nya.
10 Jehovah pan balat amat ringat lalu besumpah:
11 ‘Aku udah besemaya ngagai Abraham, Isak, enggau Jakop deka meri sida menua nya. Tang, semua orang ke pansut ari Ejip ke beumur 20 taun ke atas enda tau tama ngagai menua nya, laban sida enda ngasika Aku enggau pengabis ati.
12 Semina Kalep anak Jepuneh, orang Kenis nya, enggau Josua anak Nun aja ke tau tama kia, laban seduai iya ngasika Aku, Jehovah, enggau pengabis ati.’
13 Jehovah pan balat ringat ngagai orang Israel, lalu Iya ngasuh sida bejalai ba menua puang pengelama 40 taun, nyentukka semua sida nya ke ngereja penyai ba mata Jehovah mati magang.
14 Diatu, kita ga ka nunda bala aki kita, lalu nyadi peturun ti bedosa ke ngasuh Jehovah balat agi ringat ngagai orang Israel.
15 Enti kita enggai nitihka Iya, Iya tentu deka ninggalka orang Israel ba menua puang baru, lalu orang Israel tentu deka dipunaska ketegal kita.”
16 Udah nya, sida datai betemu enggau Moses baru lalu madahka: “Awakka kami ngaga kandang batu enggau kuta ba ditu ke jelu tupi enggau bala anak kami.
17 Tang, kami mega deka besedia enggau beperang, lalu mansang dulu ari bala menyadi kami ke bukai nyentukka sida bulih menua sida. Ba maya ti sama, bala anak kami deka diau ba kuta ke bisi dinding ti teguh ke ulih ngelindung sida ari orang ke diau ba menua tu.
18 Kami enda pulai ke rumah sebedau tiap iku orang Israel bulih tanah pesaka sida.
19 Kami enda ngambi tanah pesaka ba sepiak barat Sungai Jordan enggau sida, laban kami udah nerima tanah pesaka ba sepiak timur Sungai Jordan.”
20 Ku Moses nyaut sida: “Enti pia, tu meh utai ke patut digaga kita: Besedia meh beperang baka ke diasuh Jehovah.
21 Meraka meh ke seberai Sungai Jordan lalu beperang ngarika Iya. Pengudah Jehovah muru bala munsuh Iya ari menua nya,
22 lalu Jehovah udah nulung nguasa menua nya, nya baru kita ulih pulai. Ba mata Jehovah enggau orang Israel, kita nadai ngereja penyalah. Udah nya, menua tu deka diberi Jehovah ngagai kita.
23 Tang, enti kita enda ngereja nya, kita bedosa ngelaban Jehovah lalu kita deka diukum ketegal dosa kita.
24 Nya alai, gaga meh kuta ke bala anak kita sereta kandang ke bala jelu kita. Tang, kita mesti ngamatka semaya kita.”
25 Raban bansa Gat enggau raban bansa Reuben pan madah ngagai Moses: “Kami deka ngereja utai ke diasuh nuan, tuan.
26 Bala anak kami, bini kami, enggau semua jelu tupi kami deka diau ba kuta ke ba Gilead.
27 Tang, bala kami ke besedia deka beperang ngarika Jehovah deka meraka ke seberai Sungai Jordan baka ke diasuh nuan, tuan.”
28 Nyadi, Moses madahka pesan ngagai Imam Eleasar, Josua anak Nun, enggau bala tuai suku pasal sida.
29 Ku Moses madah ngagai sida: “Enti raban bansa Gat enggau raban bansa Reuben meraka ke seberai Sungai Jordan sama enggau kita, lalu besedia deka beperang ngarika Jehovah, lalu kita mujur nguasa menua nya, kita patut meri menua Gilead ngagai sida nyadika pesaka sida.
30 Tang, enti sida enda meraka ke seberai sungai nya enggau kita lalu enda besedia beperang, sida patut diau enggau kita ba menua Kanaan.”
31 Bala raban bansa Gat enggau raban bansa Reuben pan nyaut: “Kami deka ngereja semua utai ke diasuh Jehovah.
32 Kami deka besedia beperang ngarika Jehovah, lalu meraka ke seberai Sungai Jordan kin ngagai menua Kanaan. Tang, kami deka ngempu tanah ba sepiak tu nyadika pesaka kami.”
33 Nyadi, Moses meri menua Raja Sihon, iya nya raja orang Amor, enggau menua Raja Og ari Basan ngagai raban bansa Gat, raban bansa Reuben, enggau setengah ari raban bansa Manasi. Sida ngempu semua kuta enggau tanah ba menua nya, nyengkaum kuta ke ngelingi menua nya (Manasi nya anak Josep).
34 Raban bansa Gat pan nirika baru kuta Dibon, Atarot, Aroer,
35 Atrot-sopan, Jaser, Jogbehah,
36 Bet-nimrah, enggau Bet-haran. Semua kuta nya bisi dinding ti teguh. Sida mega ngaga kandang batu ke jelu tupi sida.
37 Bala raban bansa Reuben nirika baru kuta Hesbon, Elealeh, Kiriataim,
38 Nebo, Baal-meon (nama dua iti kuta nya udah ditukar), enggau Sibmah. Udah nya, sida meri nama baru ngagai kuta ke baru didirika sida nya.
39 Bala peturun Makir ari raban bansa Manasi pan nyerang lalu nguasa menua Gilead. Udah nya, sida muru semua orang Amor ke diau ba dia.
40 Nyadi, Moses pan meri menua Gilead ngagai bala peturun Makir anak Manasi, lalu sida pan diau ba dia.
41 Jair ari peturun Manasi mega nyerang orang Amor lalu nguasa kampung* sida. Udah nya, iya ngangauka endur nya Havot-jair.*
42 Nobah nyerang lalu nguasa Kenat, nyengkaum kuta-kuta mit ke ngelingi iya. Udah nya, iya ngangauka endur nya Nobah, nitihka nama iya empu.
