Penyampau 33:1-56
33 Tu meh pejalai orang Israel nitihka raban* sida pengudah sida pansut ari menua Ejip. Maya nya, Moses enggau Aron ngiring pejalai sida.
2 Tiap iti endur ke ditengah sida udah ditulis Moses nyadika rekod, baka ke diasuh Jehovah. Tu meh endur ke ditengah sida:
3 Ba hari ke-15 ba bulan ti keterubah, sida mupuk ari Rameses. Sehari pengudah Pengerami Paska, orang Israel ninggalka menua Ejip enggau berani ba depan semua orang Ejip.
4 Maya nya, orang Ejip benung nguburka semua anak sida ke tuai ke dibunuh Jehovah, laban Jehovah udah ngukum bala petara sida.
5 Orang Israel mupuk ari Rameses lalu nirika kem ba Sukot.
6 Udah nya, sida mupuk ari Sukot lalu nirika kem ba Etam, ke ba tisi menua puang.
7 Sida mupuk ari Etam lalu nikal baru ngagai Pihahirot, ke enda jauh ari Baal-sepon. Sida lalu nirika kem semak Mikdol.
8 Udah nya, sida mupuk ari Pihahirot lalu meraka tasik ngagai menua puang. Sida neruska pejalai sida pengelama tiga hari ba menua puang Etam lalu nirika kem ba Marah.
9 Udah nya, sida mupuk ari Marah lalu datai ba Elim. Ba dia, bisi 12 iti pun penatai ai enggau 70 iti pun kayu engkerema. Sida pan nirika kem ba dia.
10 Sida mupuk ari Elim lalu nirika kem semak Tasik Mirah.
11 Udah nya, sida mupuk ari Tasik Mirah lalu nirika kem ba menua puang Sin.
12 Sida mupuk ari menua puang Sin lalu nirika kem ba Dopkah.
13 Sida mupuk ari Dopkah lalu nirika kem ba Alus.
14 Udah nya, sida mupuk ari Alus lalu nirika kem ba Repidim. Endur nya nadai ai irup.
15 Sida mupuk ari Repidim lalu nirika kem ba menua puang Sinai.
16 Sida mupuk ari menua puang Sinai lalu nirika kem ba Kibrot-hataabah.
17 Pengudah nya, sida mupuk ari Kibrot-hataabah lalu nirika kem ba Haserot.
18 Sida mupuk ari Haserot lalu nirika kem ba Ritmah.
19 Udah nya, sida mupuk ari Ritmah lalu nirika kem ba Rimon-peres.
20 Udah nya, sida mupuk ari Rimon-peres lalu nirika kem ba Libnah.
21 Sida mupuk ari Libnah lalu nirika kem ba Risah.
22 Sida mupuk ari Risah lalu nirika kem ba Kehelatah.
23 Udah nya, sida mupuk ari Kehelatah lalu nirika kem ba kawasan Gunung Seper.
24 Sida lalu mupuk ari Gunung Seper lalu nirika kem ba Haradah.
25 Sida mupuk ari Haradah lalu nirika kem ba Makelot.
26 Udah nya, sida mupuk ari Makelot lalu nirika kem ba Tahat.
27 Sida mupuk ari Tahat lalu nirika kem ba Terah.
28 Udah nya, sida mupuk ari Terah lalu nirika kem ba Mitkah.
29 Sida lalu mupuk ari Mitkah lalu nirika kem ba Hasmonah.
30 Pengudah nya, sida mupuk ari Hasmonah lalu nirika kem ba Moserot.
31 Udah nya, sida mupuk ari Moserot lalu nirika kem ba Bene-jaakan.
32 Sida mupuk ari Bene-jaakan lalu nirika kem ba Hor-hagitgat.
33 Pengudah nya, sida mupuk ari Hor-hagitgat lalu nirika kem ba Jotbata.
34 Sida mupuk ari Jotbata lalu nirika kem ba Abronah.
35 Udah nya, sida mupuk ari Abronah lalu nirika kem ba Esion-geber.
36 Sida lalu mupuk ari Esion-geber lalu nirika kem ba Kades, ke ba menua puang Zin.
37 Pengudah nya, sida mupuk ari Kades lalu nirika kem ba kawasan Gunung Hor, ba sempadan menua Edom.
38 Imam Aron niki ngagai Gunung Hor, baka ke diasuh Jehovah. Iya mati ba dia kena hari ti keterubah, ba bulan ti kelima, 40 taun pengudah orang Israel pansut ari Ejip.
39 Aron beumur 123 taun maya iya mati ba Gunung Hor.
40 Maya nya, Raja Arat ninga pasal penatai orang Israel. Raja nya orang Kanaan lalu iya diau ba Negeb, ba menua Kanaan.
41 Pengudah sesiti timpuh, sida mupuk ari Gunung Hor lalu nirika kem ba Zalmonah.
42 Udah nya, sida mupuk ari Zalmonah lalu nirika kem ba Punon.
43 Sida lalu mupuk ari Punon lalu nirika kem ba Obot.
44 Sida mupuk ari Obot lalu nirika kem ba Iye-abarim, ke ba sempadan Moap.
45 Udah nya, sida mupuk ari Iyim lalu nirika kem ba Dibon-gat.
46 Pengudah nya, sida mupuk ari Dibon-gat lalu nirika kem ba Almon-diblataim.
47 Sida mupuk ari Almon-diblataim lalu nirika kem ba kawasan begunung ba Abarim, ke ba depan Nebo.
48 Pengujung iya, sida mupuk ari kawasan ke begunung ba Abarim lalu nirika kem ba menua puang Moap, ke enda jauh ari Sungai Jordan ba Jeriko.
49 Sida nirika kem ba sepemanjai tebing Sungai Jordan, iya nya ari Bet-jesimot nyentuk ngagai Abel-sitim, ba menua puang Moap.
50 Jehovah bejaku ngagai Moses ba menua puang Moap, ke enda jauh ari Sungai Jordan ba Jeriko. Ku Iya:
51 “Padah ngagai orang Israel: ‘Kita deka meraka ke seberai Sungai Jordan, lalu tama ngagai menua Kanaan.
52 Kita mesti muru semua orang ke diau ba menua nya. Kita mesti nganchurka semua patung ke digaga sida ari batu enggau besi. Kita mega mesti nganchurka semua endur alai sida nyembah petara pelesu.*
53 Kita deka nguasa menua nya lalu diau dia, laban Aku sigi deka meri kita menua nya nyadika pesaka kita.
54 Kita mesti magi menua nya nyadika pesaka tiap iti raban bansa ngena chara bechabut undi. Raban bansa ke besai patut diberi tanah pesaka ke besai agi. Tang, raban bansa ke mit patut diberi tanah pesaka ke mit agi. Tanah pesaka tiap iku orang deka ditentuka pengudah bechabut undi. Tiap iku orang deka nerima tanah pesaka nitihka raban bansa sida empu.
55 “‘Tang, enti kita enda muru orang ke diau ba menua nya, sida deka nyadi baka empeleman ba dalam mata kita sereta baka duri ba rusuk kita. Sida deka ngenusahka pengidup kita.
56 Enti kita enda muru sida, utai ke deka digaga Aku ngagai sida deka digaga Aku ngagai kita.’”
