Penyampau 35:1-34
35 Jehovah bejaku ngagai Moses ba menua puang Moap, ke enda jauh ari Sungai Jordan ba Jeriko. Ku Iya:
2 “Asuh orang Israel meri beberapa iti kuta ari pesaka ke diterima sida ngagai orang Lewi. Padang rumput ke ngelingi kuta nya mega patut diberi ngagai orang Lewi.
3 Sida deka diau ba kuta nya, lalu padang rumput nya deka nyadi endur alai sida nupi semua jelu sida.
4 Pemesai kawasan padang rumput ke ngelingi tiap iti kuta patut kira-kira 450 meter* enti disukat ari tiap tisi dinding kuta.
5 Kita patut nyukat kira-kira 450 meter ari dinding kuta ba begian timur, barat, utara, enggau selatan. Enggau nya, pemanjai padang rumput nya deka sama enggau buka iya, iya nya kira-kira 900 meter,* enda nyengkaum kuta ke ba tengah-tengah padang rumput nya.
6 “Kita patut meri enam iti kuta endur belindung ngagai orang Lewi, ke deka nyadi endur alai orang ke dituduh munuh orang ngerarika diri. Kita mega mesti meri 42 iti kuta ke bukai ngagai sida.
7 Penyampau kuta ke patut diberi ngagai orang Lewi nya 48 iti kuta, nyengkaum padang rumput ke ngelingi kuta nya.
8 Ari pesaka ke diterima kita, kita mesti meri kuta nya ngagai orang Lewi. Tiap iti raban bansa mesti meri kuta nitihka pemesai tanah pesaka ke diterima sida. Raban bansa ke besai patut meri mayuh agi kuta, lalu raban bansa ke mit patut meri mimit aja kuta.”
9 Ku Jehovah nampung jaku Iya ngagai Moses:
10 “Padah ngagai orang Israel: ‘Kita deka meraka Sungai Jordan lalu tama ngagai menua Kanaan.
11 Kita mesti milih beberapa iti kuta ke sesuai nyadi kuta endur belindung. Enti bisi orang ke enda sengaja munuh orang, iya ulih ngerarika diri ngagai kuta nya.
12 Kuta nya deka ngelindung orang nya ari orang ke deka malas,* ngambika iya enda dibunuh sebedau iya dipechara ba depan bala pengari orang mayuh.
13 Ketegal nya meh enam iti kuta endur belindung nya dipilih.
14 Kita mesti milih tiga iti kuta ba sepiak timur Sungai Jordan, lalu tiga iti kuta da agi ba menua Kanaan nyadi kuta endur belindung.
15 Keenam-enam iti kuta nya deka nyadi kuta endur belindung ke semua kita, enda ngira nya orang Israel, orang asing, tauka orang ke diau enda lama enggau kita, ngambika sapa-sapa ke enda sengaja munuh orang ulih ngerarika diri ngagai kuta nya.
16 “‘Enti siku orang malu orang bukai ngena utai ke digaga ari besi lalu orang nya mati, iya deka dikumbai siku pemunuh, lalu mesti diukum mati.
17 Enti siku orang malu orang bukai ngena batu lalu orang nya mati, iya deka dikumbai siku pemunuh, lalu mesti diukum mati.
18 Enti siku orang malu orang bukai ngena utai ke digaga ari kayu lalu orang nya mati, iya deka dikumbai siku pemunuh, lalu mesti diukum mati.
19 “‘Orang ke deka malas patut munuh orang nya. Lebuh betemu enggau orang nya, iya patut munuh orang nya.
20 Enti sesiku orang ngeju orang bukai, tauka nikau utai ngagai orang nya ketegal iya begedika orang nya, tauka iya bisi niat ti jai lalu orang nya mati,
21 tauka iya numbuk orang nya lalu orang nya mati, iya deka dikumbai siku pemunuh lalu mesti diukum mati. Orang ke deka malas patut munuh iya maya betemu enggau iya.
22 “‘Tang, enti sesiku orang enda sengaja ngeju orang bukai tauka nikau utai ngagai orang nya, lalu iya enda begedika orang nya sereta nadai niat ti jai,
23 tauka enti iya nadai meda orang nya lebuh iya ngelabuhka batu, lalu orang nya mati ditinggang batu nya, tang orang nya ukai munsuh iya lalu iya nadai niat deka ngemediska orang nya,
24 bala pengari orang mayuh mesti ngakim iya enggau orang ke deka malas nitihka atur tu.
25 Bala pengari orang mayuh patut nyelamatka iya ari orang ke deka malas, lalu mai iya pulai baru ngagai kuta endur belindung, iya nya endur iya udah ngerarika diri. Iya mesti diau ba dia nyentukka imam besai ke udah ditata ngena minyak ti kudus mati.
26 “‘Tang, enti iya pansut ari kuta endur belindung, iya nya endur iya udah ngerarika diri,
27 lalu orang ke deka malas tetemuka iya ba luar kuta nya lalu munuh iya, orang nya enda berutang darah.
28 Nya meh kebuah iya mesti diau ba kuta endur belindung nyentukka imam besai mati. Tang, pengudah imam besai mati, nya baru iya ulih pulai ngagai menua iya empu.
29 Kita enggau bala peturun kita patut seruran nitihka atur tu, enda ngira ba dini endur kita diau.
30 “‘Orang ke munuh orang bukai mesti diukum mati enti bisi penerang ari beberapa iku saksi. Tang, enti semina bisi siku aja saksi, nadai orang tau diukum mati.
31 Kita enda tau ngambi tebus kena nyelamatka nyawa orang ke sengaja munuh orang bukai, laban iya sigi patut diukum mati.
32 Kita mega enda tau ngambi tebus ke orang ke udah ngerarika diri ngagai kuta endur belindung, iya nya tebus ngambika iya ulih pulai baru ngagai menua iya empu sebedau imam besai mati.
33 “‘Darah ulih ngamahka tanah. Nya alai, anang ngamahka tanah endur kita diau. Enti orang dibunuh, darah orang nya deka labuh ke tanah. Tanah nya semina ulih nyadi tuchi baru enti pemunuh orang nya dibunuh, lalu darah iya labuh ke tanah.
34 Kita enda tau ngamahka tanah endur kita diau, laban Aku mega diau ba dia. Aku, Jehovah, diau enggau kita, orang Israel.’”
Nota Kaki
^ Jaku Asal, “1,000 kiubit.” Peda Rujukan B14.
^ Jaku Asal, “2,000 kiubit.”
^ Tauka “ke nagih utang darah.”
