Penyampau 36:1-13
-
Atur kawin indu ke bulih pesaka (1-13)
36 Bala tuai ruang bilik ari peturun Gilead anak Makir betemu enggau Moses sereta bala tuai orang Israel. (Makir nya anak Manasi; Manasi nya anak Josep)
2 Ku sida: “Jehovah ngasuh tuan magi menua ngena chara bechabut undi nyadika pesaka orang Israel. Jehovah mega ngasuh tuan meri pesaka menyadi kami, Zelofehat, ngagai bala anak indu iya.
3 Tang, enti bala anak indu iya kawin enggau lelaki ari raban bansa bukai, pesaka sida deka diempu laki sida. Nya alai, pesaka ke udah diberi ngagai kami nya deka diempu orang bukai.
4 Maya Taun Pengelepas, pesaka sida deka diempu raban bansa laki sida. Nyadi, pesaka nya enda agi diempu raban bansa kami.”
5 Udah nya, baka ke diasuh Jehovah, Moses bejaku ngagai orang Israel: “Betul utai ku raban bansa peturun Josep nya.
6 Tu meh utai ke dipadah Jehovah pasal anak indu Zelofehat: ‘Sida ulih kawin enggau sapa-sapa ke dipilih sida, asal aja orang nya datai ari raban bansa apai sida.
7 Pesaka orang Israel enda tau dipindahka ari raban bansa siti ngagai raban bansa siti. Pesaka raban bansa sida mesti mengkang diempu raban bansa sida.
8 Ba bala orang Israel, sida ke indu ke nerima pesaka patut kawin enggau lelaki ari peturun raban bansa apai sida, ngambika pesaka sida mengkang diempu raban bansa apai sida.
9 Nadai pesaka ke tau dipindahka ari raban bansa siti ngagai raban bansa siti, laban pesaka sida mesti mengkang diempu sida.’”
10 Bala anak indu Zelofehat pan ngereja utai ke dipadahka Jehovah nengah Moses.
11 Nyadi, bala anak indu Zelofehat, iya nya Malah, Tirsah, Hoklah, Milkah, enggau Noa lalu kawin enggau anak lelaki bala menyadi apai sida.
12 Sida kawin enggau lelaki ari raban bansa Manasi anak Josep, ngambika pesaka sida mengkang diempu raban bansa apai sida.
13 Nya meh adat enggau atur ke diberi Jehovah ngagai orang Israel nengah Moses ba menua puang Moap, ke enda jauh ari Sungai Jordan ba Jeriko.
