Penyampau 5:1-31
5 Ku Jehovah bejaku ngagai Moses:
2 “Asuh orang Israel mai orang ke baka tu pansut ari kawasan kem sida: Sida ke bisi penyakit kulit ti balat,* sida ke mansutka utai ti belendir, enggau sida ke enda tuchi ketegal udah negu orang ke udah mati.
3 Orang ke baka nya mesti dibai pansut, enda ngira orang nya lelaki tauka indu, ngambika orang nya enda ngamahka kem, iya nya endur alai Aku diau.”
4 Nya alai, baka ke dipadahka Jehovah ngagai Moses, orang Israel pan mai semua orang ke baka nya pansut ari kem sida.
5 Ku Jehovah nampung jaku Iya ngagai Moses:
6 “Padah ngagai orang Israel: ‘Enti siku lelaki tauka siku indu ngereja penyalah ngagai orang bukai sereta bedosa ngagai Aku, Jehovah, orang nya salah.
7 Iya mesti ngaku dosa ke dikereja iya. Iya mega mesti mayar rega ti penuh nyadika ganti rugi ngagai orang ke udah nyadi mansa iya, lalu penyampau nya mesti ditambah 20 peratus.
8 Tang enti mansa nya mati, lalu iya nadai kaban belayan ke semak ke ulih nerima ganti rugi nya, ganti rugi nya mesti diberi ngagai Aku, Jehovah. Pia mega, orang ke salah nya patut meri siku bedus ti lelaki ngagai imam, ngambika diserah kena ngulihka pengampun dosa.
9 “‘Tiap iti pemeri ti kudus ke diserahka orang Israel deka diempu imam ke nerima pemeri nya.
10 Sebarang utai ti kudus ke diberi ngagai imam deka diempu imam nya. Sebarang utai ke diserahka ngagai imam deka diempu imam nya.’”
11 Ku Jehovah bejaku ngagai Moses:
12 “Padahka tu ngagai orang Israel: ‘Enti bisi bini ke enda setia sereta curang enggau laki iya
13 ketegal iya ngereja pengawa seks enggau lelaki bukai, tang laki iya enda nemu iya udah ngamahka diri, lalu pekara tu enda ditemu orang sereta nadai saksi ke meda pengawa iya, lalu iya enda ditangkap ngereja nya, tu meh utai ke patut digaga:
14 Enda ngira sekalika indu nya udah ngamahka diri tauka enda, tang enti laki iya chemburu lalu kakang ati bini iya enda setia,
15 iya mesti mai bini iya ngagai imam. Iya mega mesti mai satu kilogram* tepung barli nyadika pemeri ari bini iya ngagai Aku. Iya enda tau nuangka minyak tauka menyan ngagai tepung nya laban tepung nya pemeri ari laki ke chemburu, lalu pemeri nya diserah kena nentuka sekalika indu nya salah tauka enda.
16 “‘Imam deka ngasuh indu nya mansang lalu bediri ba depan Aku, Jehovah.
17 Imam nya mesti nuangka ai ti beresi* ke dalam siti sarang ke digaga ari tanah liat. Udah nya, imam nya mesti ngambi mimit debu ari lantai Langkau Sembiang, lalu nepuka debu nya ngagai ai nya.
18 Imam nya deka ngasuh indu nya bediri ba depan Aku, Jehovah, lalu iya deka muka tanchang buk indu nya. Iya deka ngengkahka tepung* ba tapa jari indu nya. Tepung nya pemeri ari laki iya ti chemburu. Imam nya deka megai sarang ke diisi ai ti pait ke mai sumpah.
19 “‘Imam nya mesti ngasuh indu nya besumpah lalu madahka tu ngagai indu nya: “Enti nuan amat nadai kala ngereja pengawa seks enggau lelaki bukai lebuh nuan ke agi jadi enggau laki nuan, lalu enti nuan enda curang enggau laki nuan sereta enda ngamahka diri, nuan enda kena tinggang sumpah ke dibai ai ti pait tu.
20 Tang enti nuan curang enggau laki nuan lalu ngamahka diri, laban nuan ngereja pengawa seks enggau lelaki bukai—”
21 Imam nya mesti madah ngagai indu nya: “Awakka Jehovah ngena nuan nyadika chunto ke bansa nuan empu lebuh sida ngaga jaku sumpah. Enti nuan amat udah ngereja penyalah, Jehovah deka ngasuh nuan mandul lalu perut nuan deka nyadi kembai.
22 Ai ti pait ke mai sumpah tu deka tama ngagai gelung perut nuan, lalu perut nuan deka nyadi kembai. Nuan deka nyadi mandul.” Indu nya mesti nyaut munyi tu: “Amin! Amin!”*
23 “‘Udah nya, imam nya mesti nulis jaku sumpah nya ba dalam siti bup, lalu madamka jaku sumpah nya ngena ai ti pait nya.
24 Iya deka ngasuh indu nya ngirup ai ti pait ke mai sumpah nya. Ai nya deka tama ngagai tubuh indu nya lalu ngasuh indu nya merinsa.
25 Udah nya, imam nya mesti ngambi tepung ari jari indu nya. Tepung nya pemeri ari laki ke chemburu. Imam nya mesti ngayunka tepung nya ke depan enggau ke belakang nyadika pemeri ke Aku, Jehovah, lalu iya mesti mai pemeri nya ngagai alta.
26 Imam mesti ngambi segenggam tepung nya lalu nunu tepung nya ba atas alta, nyadika tanda kena nunjukka semua pemeri nya udah diserahka ngagai Aku. Udah nya, imam nya mesti ngasuh indu nya ngirup ai ti pait nya.
27 Enti indu nya amat udah ngamahka diri lalu enda setia ngagai laki iya, ai ti pait ke mai sumpah nya deka tama ngagai tubuh indu nya, lalu ngasuh indu nya merinsa. Perut iya deka nyadi kembai lalu iya deka mandul. Indu nya deka nyadi chunto ke bansa iya empu lebuh sida ngaga jaku sumpah.
28 Tang, enti indu nya enda ngamahka diri lalu iya mengkang tuchi, iya deka lepas ari ukum nya. Iya ulih ngandung lalu ngadaka anak.
29 “‘Nya meh adat pasal laki ke chemburu lebuh bini iya curang lalu ngamahka diri taja pan bini iya agi jadi enggau iya,
30 tauka enti laki chemburu lalu kakang ati bini iya enda setia. Laki nya mesti mai bini iya ngagai Aku, Jehovah, lalu imam mesti bejalaika semua utai ke ditetapka ba adat tu.
31 Laki indu nya enda salah, tang indu nya betanggungjawapka penyalah diri empu.’”
Nota Kaki
^ Tauka “sakit lan; kusta.”
^ Jaku Asal, “satu persepuluh efah.” Peda Rujukan B14.
^ Jaku Asal, “kudus.”
^ Tauka “tepung ke diserahka kena nentuka sekalika indu nya besalah tauka enda.”
^ Tauka “Awakka nya nyadi! Awakka nya nyadi!”
