Penyampau 6:1-27
6 Ku Jehovah nampung jaku Iya ngagai Moses:
2 “Padahka tu ngagai orang Israel: ‘Enti siku lelaki tauka siku indu ngaga semaya ti istimewa deka nyadi orang Nasir* ke Aku, Jehovah,
3 iya enda tau ngirup wain tauka ai ti bisa. Iya mega enda tau ngirup chuka ke digaga ari wain tauka chuka ke digaga ari ai ti bisa. Iya enda tau ngirup nama-nama utai ke digaga ari buah anggur. Iya mega enda tau makai buah anggur, sekalika buah anggur nya agi baru tauka buah anggur ke udah dirangkaika.
4 Seagi-agi iya nyadi orang Nasir, iya enda tau makai nama-nama utai ari pun anggur, nyengkaum buah anggur ke bedau mansau. Kulit anggur nya pan enda tau diempa iya.
5 “‘Seagi-agi iya nyadi orang Nasir, iya enda tau nyukur buk iya. Iya mesti mengkang kudus lalu nejuka buk iya panjai, nyentukka timpuh iya nyerahka diri ngagai Aku, Jehovah, udah abis.
6 Sepemanjai timpuh iya nyerahka diri ngagai Aku, Jehovah, iya enda tau datai semak ngagai orang ke udah mati*
7 taja pan nya bangkai apai iya, bangkai indai iya, tauka bangkai menyadi lelaki tauka menyadi indu iya. Buk iya nyadi tanda iya udah nyerahka diri ngagai Aku, lalu nyadi orang Nasir. Nya alai, iya enda tau ngamahka diri.
8 “‘Seagi-agi iya nyadi orang Nasir, iya kudus ba mata Aku, Jehovah.
9 Tang enti sema bisi orang tiba-tiba mati ba sepiak iya, nya ngasuh buk iya, iya nya tanda iya udah nyerahka diri ngagai Aku, nyadi kamah. Nya alai, iya mesti nyukur buk iya ba hari iya nyadi tuchi baru, iya nya ba hari ti ketujuh.
10 Ba hari ti kelapan, iya mesti mai dua iku burung kukur tauka dua iku burung achang ti biak ngagai imam ba pintu penama langkau gempuru.
11 Imam deka nyerahka siku burung nyadika pemeri kena ngulihka pengampun dosa, lalu siku da agi burung nyadi pemeri tunu. Imam nya deka ngulihka pengampun dosa ke orang Nasir nya, laban iya udah semak enggau orang ke udah mati. Ba hari nya, iya mesti nguduska pala iya.
12 Timpuh iya ke nyadi orang Nasir sebedau tu enda agi dikira laban iya udah ngamahka diri. Nya alai, iya mesti nyerahka diri ngagai Aku, Jehovah, sekali agi ngambika ulih nyadi orang Nasir baru. Nyadi, iya mesti mai siku jelu bedus ti lelaki ke beumur setaun tauka kurang ari nya nyadika pemeri ganti rugi.
13 “‘Tu meh adat pasal orang Nasir: Pengudah timpuh orang Nasir nyerahka diri ngagai Aku abis, iya patut mansang ngagai pintu penama langkau gempuru.
14 Ba dia, iya mesti nyerahka pemeri tu ngagai Aku, Jehovah: Siku jelu bedus ke lelaki ke beumur setaun tauka kurang ari nya nyadika pemeri tunu, siku jelu bedus ke indu ke beumur setaun tauka kurang ari nya nyadika pemeri kena ngulihka pengampun dosa, enggau siku jelu bedus ke lelaki nyadika pemeri bebaik. Semua jelu nya enda tau bisi penimpang.
15 Iya mega mesti nyerahka pemeri bijirin, pemeri wain, enggau sebakul roti ti enda beragi ke segala baka gelang ke digaga ari tepung ti alus,* sereta roti nipis ti enda beragi ke dipalit ngena minyak.
16 Imam mesti mai semua nya ngagai Aku, Jehovah, lalu nyerahka pemeri kena ngulihka pengampun dosa enggau pemeri tunu ngagai Aku.
17 Iya mesti nyerahka siku bedus ti lelaki nyadika pemeri bebaik enggau nyerahka sebakul roti ti enda beragi ngagai Aku, Jehovah. Iya mega mesti nyerahka pemeri bijirin enggau pemeri wain.
18 “‘Orang Nasir nya mesti nyukur buk iya ba pintu penama langkau gempuru. Udah nya, iya mesti muai buk iya, iya nya tanda iya nyadi orang Nasir, ngagai api ke dikena nunu pemeri bebaik.
19 Imam mesti ngambi kaki depan bedus ti lelaki ke udah direbus, siti roti ti enda beragi ke segala baka gelang ari bakul, enggau siti roti nipis ti enda beragi. Imam nya mesti ngengkahka semua nya ba tapa jari orang Nasir nya, pengudah orang nya nyukur buk iya ke nyadi tanda iya nyadi orang Nasir.
20 Imam mesti ngayun semua nya ke depan enggau ke belakang, nyadika pemeri ke Aku, Jehovah. Semua pemeri nya kudus magang lalu diempu imam, nyengkaum dada jelu ari pemeri ke diayun enggau kaki jelu ke diserah nyadika pemeri. Udah nya, baru orang Nasir nya tau ngirup wain.
21 “‘Tu meh adat pasal orang Nasir ke ngaga semaya: Enti iya besemaya deka meri pemeri ngagai Aku, Jehovah, lebih ari ke dipinta, iya mesti ngamatka semaya nya nitihka adat orang Nasir.’”
22 Udah nya, Jehovah bejaku ngagai Moses:
23 “Padah ngagai Aron enggau bala anak lelaki iya: ‘Baka tu meh chara kita patut merekatka orang Israel. Padahka tu ngagai sida:
24 “Awakka Jehovah merekatka kita lalu nyaga kita.
25 Awakka cahaya mua Jehovah manchar ngagai kita, lalu awakka Iya lantang ati ke kita.
26 Awakka Jehovah manah ati enggau kita, lalu meri kita pengelantang.”’
27 Sida mesti ngena nama Aku kena merekatka orang Israel, ngambika Aku merekatka orang Israel.”
Nota Kaki
^ Siku lelaki tauka siku indu ke udah besemaya deka nyerahka diri ngagai Petara. Peda Penerang Leka Jaku, “Orang Nasir.”
^ Jaku Asal, “ne′phesh.” Peda Penerang Leka Jaku, “Ne′phesh.”
^ Tauka “tepung ti alus, ke dichampurka enggau minyak.”
