Penyampau 8:1-26
8 Ku Jehovah bejaku ngagai Moses:
2 “Padah ngagai Aron: ‘Lebuh nuan nungkun tujuh iti lampu kelita, tentuka api ari lampu kelita nya manchar ngagai endur ba depan penuduk lampu nya.’”
3 Aron pan ngereja nya. Iya nungkun lampu kelita ngambika endur ba depan penuduk lampu nya terang, baka ke udah dipadahka Jehovah ngagai Moses.
4 Baka tu meh penuduk lampu nya digaga: Ari batang penuduk lampu nya nyentuk ngagai serindak bungai iya digaga ari emas lalu digaga ngena tukul. Penuduk lampu nya digaga nitihka utai ke dipandangka Jehovah dalam runding Moses.
5 Ku Jehovah nampung jaku Iya ngagai Moses:
6 “Seraraka orang Lewi ari orang Israel, lalu gaga sida nyadi tuchi.
7 Baka tu meh chara nuan patut ngaga sida nyadi tuchi: Pechikka ai ngagai orang Lewi ngambika sida tuchi ari dosa. Asuh sida nyukur seluruh tubuh sida, masu gari sida, sereta nuchi diri.
8 Udah nya, sida mesti ngambi siku sapi ti lelaki ke agi biak enggau pemeri bijirin, iya nya tepung ti alus ke dichampur enggau minyak. Nuan mega mesti ngambi siku da agi sapi ti lelaki ke agi biak nyadika pemeri kena ngulihka pengampun dosa.
9 Nuan mesti mai orang Lewi ngagai depan langkau gempuru, lalu ngempuruka semua orang Israel.
10 Nuan mesti mai orang Lewi ngagai depan Aku, Jehovah. Udah nya, orang Israel mesti ngengkahka jari sida ba atas pala orang Lewi.
11 Aron mesti nyerahka orang Lewi ngagai Aku, Jehovah, nyadika pemeri* ari orang Israel. Orang Lewi deka gawa ke Aku, Jehovah.
12 “Udah nya, orang Lewi mesti ngengkahka jari sida ba atas pala sapi nya. Siku sapi deka diserah nyadika pemeri kena ngulihka pengampun dosa, lalu siku da agi sapi deka diserah nyadika pemeri tunu. Sapi nya mesti diserahka ngagai Aku, Jehovah, kena ngulihka pengampun dosa ke orang Lewi.
13 Asuh orang Lewi bediri ba depan Aron enggau bala anak lelaki iya, lalu serahka sida nyadika pemeri* ngagai Aku, Jehovah.
14 Nuan mesti nyeraraka orang Lewi ari orang Israel, lalu orang Lewi deka diempu Aku.
15 Pengudah nya, orang Lewi deka bejalaika pengawa ba langkau gempuru. Baka nya meh chara nuan patut ngaga sida nyadi tuchi, lalu nyerahka sida nyadika pemeri ke diayun.
16 Ari bala orang Israel, sida meh orang ke diberi ngagai Aku kena nganti semua anak tuai orang Israel, lalu sida deka diempu Aku.
17 Semua anak tuai orang Israel sereta semua anak tuai jelu sida diempu Aku magang. Aku udah nguduska sida lebuh Aku munuh tiap iku anak tuai orang Ejip.
18 Aku deka ngambi orang Lewi kena nganti semua anak tuai orang Israel.
19 Ari bala orang Israel, Aku udah milih orang Lewi lalu meri sida ngagai Aron enggau bala anak lelaki iya. Sida deka bejalaika pengawa ba langkau gempuru sereta ngulihka pengampun dosa ngarika orang Israel. Enggau nya, orang Israel enda ditinggang penulah lebuh sida datai semak ngagai endur ti kudus.”
20 Moses, Aron, enggau semua orang Israel ngereja semua utai nya ngagai orang Lewi, nitihka utai ke udah dipadahka Jehovah ngagai Moses.
21 Nyadi, orang Lewi pan nuchi diri sereta masu gari sida. Udah nya, Aron nyerahka sida nyadika pemeri* ngagai Jehovah. Aron mega ngulihka pengampun dosa ke sida ngambika sida ulih nyadi tuchi.
22 Pengudah nya, orang Lewi lalu bejalaika pengawa sida ba langkau gempuru. Sida dikemataka Aron enggau bala anak lelaki iya. Nya meh utai ke dikereja ngagai orang Lewi, nitihka utai ke udah dipadahka Jehovah ngagai Moses.
23 Ku Jehovah bejaku ngagai Moses:
24 “Tu meh atur ke orang Lewi: Tiap iku lelaki ke beumur 25 taun ke atas mesti bejalaika pengawa ba langkau gempuru.
25 Tang pengudah umur orang Lewi manggai 50 taun, iya mesti ngetu lalu badu agi bejalaika pengawa iya ba dia.
26 Iya nadai agi pengawa ti tetap. Tang, iya agi ulih nulung orang Lewi ke bukai bejalaika pengawa sida ba langkau gempuru. Baka nya meh chara nuan ngatur orang Lewi sereta ngatur pengawa sida.”
