Rome 11:1-36
11 Nya alai, aku nanya, kati Petara udah nulak nembiak Iya? Tentu enda! Aku empu mega orang Israel, peturun Abraham, ari raban bansa Benjamin.
2 Petara enda nulak nembiak Iya ke udah dipilih Iya dulu. Kati kita enda nemu, utai ti disebut Bup Kudus pasal Elijah ke besebana ngagai Petara pasal orang Israel?
3 “Jehovah, sida udah munuh bala nabi Nuan, lalu sida udah ngeruntuhka alta* Nuan. Semina aku siku aja agi tinggal. Lalu diatu, sida nguji deka munuh aku.”
4 Tang nama saut Petara ngagai iya? “Aku agi bisi 7,000 iku nembiak Aku ke enda besugang nyembah Baal.”
5 Diatu pan sama. Ari orang Israel, bisi seraban mit orang ke dipilih Petara ketegal pemanah ati Iya ti besai.
6 Nyadi, enti sida dipilih ketegal pemanah ati Petara ti besai, reti nya sida ukai dipilih ketegal pengawa sida. Enti sida dipilih ketegal pengawa sida, nya ukai agi ketegal pemanah ati Petara ti besai.
7 Nyadi baka ni deh? Orang Israel enda bulih utai ke balat dikinginka sida, tang semina sida ke dipilih bulih utai nya. Sida ke bukai enggai ninga.
8 Baka ke dipadah ba Bup Kudus: “Petara udah ngasuh sida tinduk jenak, ngambika mata sida enda ulih meda, lalu pending sida enda ulih ninga nyentuk ke seharitu.”
9 David mega madahka: “Awakka pengerami makai besai* sida nyadi pukat enggau panjuk, ngambika sida labuh lalu diukum.
10 Awakka mata sida petang, ngambika sida enda ulih meda. Lalu awakka sida seruran bungkuk ketegal mai utai ti berat.”
11 Nyadi, aku nanya, kati orang Israel labuh nyentukka sida enda ulih angkat agi? Tentu enda! Tang ketegal sida bedosa, orang ari bansa bukai ulih diselamatka, lalu tu ngasuh orang Israel chemburu.
12 Enti ketegal sida bedosa, dunya bulih berekat, lalu ketegal penyampau sida kurang, bansa bukai bulih berekat, uji perundingka pemayuh berekat ke deka diulih enti penyampau sida udah chukup!
13 Diatu, aku bejaku ngagai kita ke ari bansa bukai. Laban aku rasul ke dianjung ngagai bansa bukai, aku ngumbai pengawa aku ke Petara tu amat berega.
14 Aku nguji ngasuh bansa aku chemburu, ngambika ulih nyelamatka sekeda ari sida.
15 Ketegal sida ditulak Petara, sekeda orang ba dunya ulih bebaik enggau Petara. Enti diatu Petara nerima sida baru, tu baka ke ngidupka sida baru ari mati.
16 Enti asil keterubah ari tepung dikumbai kudus, semua tepung nya mega dikumbai kudus. Lalu enti urat pun kayu kudus, dan iya mega kudus.
17 Tang sekeda ari dan nya diketak. Udah nya, kita, iya nya dan ari pun kayu kana ke bukai ke tumbuh ati diri, dichantumka* ngagai pun kayu nya ngambika begulai enggau dan kayu ke agi ba pun kayu nya. Diatu, kita sama bulih utai ti manah ari urat pun kayu kana nya.
18 Tang anang ngumbai kita manah agi ari dan bukai. Enti kita ngumbai diri manah agi, kingatka meh, ukai kita ke meri utai ti manah ngagai urat pun kayu nya, tang urat nya ke meri utai ti manah ngagai kita.
19 Taja pia, sekeda ari kita deka madahka: “Dan kayu ke bukai udah diketak, ngambika aku ulih dichantumka ngagai pun kayu nya.”
20 Nya endang amat! Sida diketak laban sida enda arap. Tang kita bisi ba dia ketegal kita arap. Nya alai, anang sumbung, tang kita patut nangi.
21 Laban enti Petara ulih ngetak dan ari pun kana nya empu, Iya mega tentu ulih ngetak kita.
22 Kita ulih meda, Petara nya manah ati sereta terit. Petara terit ngagai sida ke labuh, laban sida enda arap. Tang Petara manah ati ngagai kita, seagi-agi kita meruan dalam pemanah ati Iya. Enti enda, kita mega deka diketak ari pun kayu nya.
23 Taja pia, sida ke udah diketak ulih dichantumka baru enti sida arap, laban Petara ulih ngereja nya.
24 Kita udah diketak ari pun kana ke tumbuh ati diri, lalu dichantumka ngagai pun kana ke ditanam, taja pan nya ukai utai ke biasa digaga. Enti pia, endaka senang agi Petara deka nyantumka dan kayu ke endang ari pun kayu nya empu?
25 Bala menyadi, aku deka kita nemu pasal resia ti kudus tu, ngambika kita enda ngumbai diri pintar. Sekeda orang Israel deka mengkang kieh* nyentukka penyampau orang ke dipilih ari bansa bukai udah chukup digempuruka.
26 Baka nya meh chara semua orang Israel deka diselamatka. Baka ke disebut ba Bup Kudus: “Penyelamat deka datai ari Sion, lalu deka muai semua penyai ari peturun Jakop.
27 Tu meh sempekat ke deka digaga Aku enggau sida, lebuh Aku muai dosa sida.”
28 Amat, sida endang munsuh Berita Manah. Tang nya udah meri penguntung ngagai kita. Taja pia, sida udah dipilih Petara, lalu Iya sayauka sida ketegal aki ini sida.
29 Petara enda nesal ke utai ke udah diberi Iya, lalu Iya mega enda nesal lebuh Iya udah ngangau sida ke dikangau Iya.
30 Suba, kita enda ngasika Petara, tang diatu, Iya kasihka kita ketegal orang Israel enda ngasika Iya.
31 Nyadi, Petara kasihka kita laban sida enda ngasi, lalu diatu, Petara mega ulih kasihka sida.
32 Petara udah nejuka semua sida dikurung baka orang jil, laban sida enda ngasika Iya. Enggau nya, Iya ulih ngayanka pengasih Iya ngagai sida.
33 Naka meh pemintar, pemayuh pengaya, enggau penalam penemu Petara! Nadai siku pan ulih meretika pemutus sereta jalai Iya.
34 “Sapa ke ulih meretika runding Jehovah, tauka sapa ke ulih meri Iya jaku lalau?”
35 Tauka, “sapa ke udah dulu meri Petara utai, ngambika Petara patut malas iya?”
36 Semua utai bisi ketegal Iya, nengah Iya, sereta ke Iya. Awakka Petara dimuliaka belama iya. Amin.
Nota Kaki
^ Peda Penerang Leka Jaku.
^ Jaku Asal, “mija.”
^ Tauka “dikawinka.”
^ Tauka “bingking; degil.”
