Rome 12:1-21
12 Bala menyadi, ketegal Petara udah ngayanka pengasih Iya ngagai kita, aku bebendar minta kita nyerahka tubuh kita nyadi pemeri ti idup, ke kudus, sereta ke diterima Petara. Nya alai, kereja meh pengawa ti tuchi ke Iya enggau pengabis runding kita.
2 Badu agi nitihka chara dunya* tu. Tang awakka Petara ngubah chara kita berunding, ngambika kita andal sereta nemu pasal peneka Petara ti manah, sempurna, sereta ngelantangka ati Iya.
3 Ketegal Petara udah ngayanka pemanah ati Iya ti besai ngagai aku, aku madah ngagai semua kita ngambika enda berunding pasal diri empu lebih agi ari ke patut. Tang berunding meh pasal diri empu nitihka runding ti betul sereta sejalai enggau pengarap ke diberi Petara ngagai kita.
4 Tubuh kitai bisi mayuh perengka, lalu tiap iti perengka tubuh nya ngereja pengawa ti enda sama.
5 Pia mega, taja pan kitai mayuh, tang kitai beserakup enggau Kristus nyadi siti tubuh, lalu kitai bepanggai ba pangan diri.
6 Sejalai enggau pemanah ati Petara ti besai, semua kitai nerima pemeri ti enda sama. Nya alai, enti kitai nerima pemeri benabi, awakka kitai benabi sejalai enggau pengarap ke diberi ngagai kitai.
7 Enti kitai nerima pemeri nulung orang, awakka kitai nulung orang enggau naka ulih. Enti kitai nerima pemeri ngajar, awakka kitai ngajar enggau naka ulih.
8 Enti kitai nerima pemeri meransang orang, awakka kitai meransang orang. Enti kitai nerima pemeri bekunsika utai enggau orang bukai, awakka kitai ngereja nya enggau gerah jari. Enti kitai ngiring, kitai patut ngereja nya enggau ransing. Enti kitai ngayanka pengasih, kitai patut ngereja nya enggau ati ti gaga.
9 Ayanka pengerindu, tang anang pura-pura. Begedika utai ti jai, lalu bepegai rat ba utai ti manah.
10 Rinduka pangan diri baka diri menyadi. Awakka kita dulu ngayanka basa ngagai pangan diri.
11 Kereja meh pengawa enggau bagas, anang malas.* Awakka kuasa kudus ngasuh kita ransing. Kereja meh pengawa ke Jehovah enggau pengabis ati.
12 Gaga ati lebuh kita nganti utai ke dikearapka kita. Betan lebuh kita napi penusah. Anang ngetu besampi.
13 Kunsi meh utai ke dikemisi kita enggau nembiak Petara ti kudus ke begunaka bantu. Telebaka diri ngintu orang bukai.
14 Seruran minta berekat ke sida ke merinsaka kita. Anang nyumpah sida, tang minta berekat ke sida.
15 Gaga ati enggau sida ke gaga ati. Nyabak enggau sida ke nyabak.
16 Ibuhka orang bukai baka kita ke ibuhka diri empu. Anang sumbung,* tang baruh ati. Anang ngumbai diri pintar agi ari orang bukai.
17 Anang malas penyai ngena penyai ngagai sapa-sapa. Kereja utai ke dikumbai semua orang manah.
18 Diau bebaik enggau semua orang enggau naka ulih kita, seagi-agi kita ulih ngereja nya.
19 Bala menyadi ti dikerindu, anang malas dendam. Awakka Petara ngayanka pengeringat Iya ngagai penyai ke udah digaga, laban Bup Kudus madahka: “‘Aku ke deka malas, lalu Aku deka ngukum,’ ku Jehovah.”
20 Tang “enti munsuh kita lapar, beri iya makai. Enti iya aus, beri iya ai irup. Enggau nya, kita ulih ngelembutka ati iya.”*
21 Anang nejuka penyai ngalahka kita, tang terus meh ngalahka penyai ngena pemanah.
Nota Kaki
^ Tauka “jeman; sistem dunya.” Peda Penerang Leka Jaku, “Sistem dunya.”
^ Tauka “betangguh ngereja pengawa.”
^ Tauka “Anang keran ngulihka cita-cita ti tinggi.”
^ Jaku Asal, “kita deka nugungka bara api ba atas pala iya.”
