Rome 3:1-31
3 Nama penguntung nyadi orang Judah tauka disunat?*
2 Bisi mayuh penguntung. Keterubah, Petara meri pesan Iya ti kudus ngagai orang Judah.
3 Tang baka ni enti sekeda ari sida enda tetap ati? Kati nya nunjukka Petara enda tetap ati?
4 Enda! Taja pan semua orang bula, tang Petara enda bula. Baka ke dipadah Bup Kudus: “Lebuh Nuan bejaku, jaku Nuan seruran amat. Lebuh Nuan diakim, Nuan tentu deka menang.”
5 Pengawa kitai ke enda lurus enggau terang nunjukka Petara nya lurus. Nya alai, kati nya salah enti Petara mandangka pengeringat Iya? (Nya meh runding sekeda orang.)
6 Tentu enda salah! Enti Petara enda lurus, baka ni ku Iya deka ngakim dunya?
7 Pia mega enti pemula aku nunjukka Petara nya enda bula, lalu orang ngemuliaka Iya, nama kebuah aku mega diakim baka orang ke bedosa?
8 Nama kebuah kitai enda nyebut: “Kereja aja utai ti jai, ngambika bulih asil ti manah?” Sekeda orang nuduh kami nyebut munyi nya. Sida endang patut diukum enggau lurus.
9 Kati kitai orang Judah manah agi ari orang bukai? Tentu enda! Laban baka ke udah disebut, orang Judah enggau orang Gerika bela dipegai dosa.
10 Baka ke dipadah ba ayat Bup Kudus: “Nadai siku pan orang ke lurus.
11 Nadai siku pan ke ulih meretika utai, lalu nadai siku pan ke ngiga Petara.
12 Semua orang udah limpang ari Iya. Semua sida nyau nadai guna. Nadai orang mandangka pemanah ati. Siku pan nadai.”
13 “Nyawa sida baka lubang kubur ti enda ditutup. Sida ngena dilah sida nyebut utai ti bula.” “Utai ke pansut ari mulut sida baka rachun ular ti bisa.”
14 “Nyawa sida penuh laban jaku sumpah enggau pengeringat.”
15 “Kaki sida jampat deka munuh orang.”
16 “Pengawa sida mai pemedis enggau pemerinsa.
17 Sida enda nemu chara bebaik enggau orang bukai.”
18 “Sida enda nangika Petara.”
19 Diatu baru kitai nemu, semua utai ke disebut Adat endang ditujuka ngagai orang ke ba baruh Adat. Tuju iya ngambika orang enda ulih ngumbai diri enda besalah. Lalu semua orang ba serata dunya diukum Petara.
20 Nya alai, ba Petara, nadai siku pan tau dikumbai lurus ketegal ngereja utai ke diasuh adat. Kebendar iya, adat ngasuh kitai nemu enggau terang, nama reti dosa.
21 Baka ke dipadah Adat Moses enggau Ajar Sida Nabi, diatu kitai nemu, orang ulih dikumbai lurus ba mua Petara taja pan iya enda nitihka adat.
22 Semua orang ke arap ulih dikumbai Petara lurus, ketegal sida arapka Jesus Kristus. Semua orang sama magang.
23 Semua bela bedosa magang, lalu enda ulih mandangka mulia Petara.
24 Petara ngumbai sida lurus, lebuh Iya ngelepaska sida nengah tebus ke dibayar Jesus Kristus. Nya pemeri Petara ti pechuma ketegal pemanah ati Iya ti besai.
25 Petara nyerahka Kristus nyadika pemeri, ngambika orang ke arapka darah Kristus ulih bebaik enggau* Iya. Iya ngereja nya kena nunjukka Iya lurus. Iya ukai semina sabar ngampunka penyalah ke udah dikereja kelia menya,
26 tang diatu Iya mega nunjukka Diri lurus ngagai kitai, lebuh Iya ngumbai orang ke arapka Jesus nya lurus.
27 Enti pia, kati kitai bisi kebuah deka temegahka diri? Nadai. Patut kitai temegahka diri ketegal nitihka adat? Enda. Laban adat ke beberatka pengarap enggau terang nunjukka, nadai siku pan orang patut temegahka diri.
28 Laban kitai nemu, orang dikumbai lurus ketegal pengarap ke diayanka iya, ukai ketegal iya ngereja utai ke diasuh adat.
29 Tauka kati Iya Petara ke orang Judah aja? Endaka Iya mega Petara ke orang ari bansa bukai? Au. Iya Petara ke semua bansa.
30 Laban Petara nya siku aja, Iya deka ngumbai orang ke besunat* enggau orang ke enda besunat nya lurus, ketegal pengarap ke diayanka sida.
31 Enti pia, kati kitai muai adat ketegal pengarap ke diayanka kitai? Enda! Kebendar nya, kitai nyukung adat.
