Surat Kereja Rasul 1:1-26
1 Teopilus, ba surat aku ti keterubah, aku nulis pasal semua utai ke digaga sereta diajar Jesus
2 nyentuk ngagai maya iya dibai niki ke serega, pengudah iya meri iring nengah kuasa kudus* ngagai bala rasul ke dipilih iya.
3 Pengudah iya merinsa, iya meri sida mayuh bukti ti terang ke nunjukka iya udah idup. Pengelama 40 hari, iya suah mandangka diri ngagai sida sereta bejaku pasal Perintah Petara.
4 Lebuh iya betemu enggau sida, iya meri pesan tu ngagai sida: “Anang ninggalka Jerusalem, tang terus meh nganti pemeri ke udah disemayaka Apai, iya nya pemeri ke kala didinga kita ari aku.
5 John maptisa* ngena ai, tang beberapa hari da agi, semua kita deka dibaptisa* ngena kuasa kudus Petara.”
6 Lebuh sida begelumu, sida nanya Jesus: “Tuan, kati nuan deka mulaika baru Perintah Petara ngagai Israel diatu?”
7 Ku iya nyaut sida: “Semina Apai aja ke bisi hak nentuka maya enggau jam iya. Kita enda ibuh nemu pasal tu.
8 Tang kita deka bulih pengering lebuh kuasa kudus Petara datai ngagai* kita, lalu kita deka nyadi saksi aku ba Jerusalem, ba serata Judea enggau Samaria, sereta nyentuk ngagai ujung dunya.”
9 Pengudah Jesus nyebut semua nya, Jesus dibai niki ke serega lebuh sida agi merening ngagai iya. Udah nya, remang ngelindung iya lalu sida enda ulih meda iya agi.
10 Lebuh sida benung merening ngagai Jesus ke dibai niki ke langit, enda mukai-mukai dua iku orang ke ngena gari burak bediri ba sepiak sida
11 lalu madahka: “Orang Galili, nama kebuah kita bediri malik ke langit? Jesus ke udah dibai niki ke langit deka datai enggau chara ti sama baka ke dipeda kita lebuh iya niki ke langit.”
12 Udah nya, sida mupuk ari Bukit Kana lalu pulai ngagai Jerusalem. Penyauh bukit nya ari Jerusalem kira-kira satu kilometer* aja.
13 Pengudah sida datai, sida niki ke atas ngagai bilik endur sida diau. Ba dia bisi Peter, John, James, Andrew, Philip, Thomas, Bartolomew, Matthew, James anak Alfius, Simon ke ransing, enggau Judas anak James.
14 Enggau siti tuju, sida bebendar besampi. Beberapa iku orang indu, bala menyadi lelaki Jesus, sereta Maria indai Jesus, mega enggau sida.
15 Nyadi sekali, bisi kira-kira 120 iku bala menyadi begelumu. Peter bediri ba tengah-tengah sida lalu bejaku:
16 “Bala menyadi, jaku ke disebut kuasa kudus Petara nengah David patut nyadi. Iya bejaku pasal Judas ke nguluka seraban orang nangkap Jesus.
17 Suba Judas nya siku ari bala kitai, lalu iya udah sama gawa enggau kitai.
18 (Lelaki tu meli tanah ngena upah ari pengawa iya ti jai. Iya labuh pala dulu lalu perut iya pechah. Semua perengka dalam perut iya tepambur pansut.
19 Pekara tu ditemu semua orang ke diau ba Jerusalem. Nya meh kebuah tanah nya dikumbai Akeldama dalam jaku sida, ke mai reti “Tanah Darah.”)
20 Endang udah ditulis dalam bup Masmur, ‘Awakka endur iya diau nyadi tembawai, lalu nadai orang diau ba dia,’ sereta ‘Awakka pengawa ke dipegai iya diambi orang bukai.’
21 Nya alai, Judas patut diganti enggau siku ari menyadi ke begulai enggau kitai sekumbang Tuan Jesus bejalaika pengawa iya enggau kitai,
22 iya nya kenyau ari Jesus dibaptisa John nyentuk ngagai hari Jesus dibai niki ke serega. Baka kitai, iya mega patut orang ke meri saksi pasal Jesus ke udah diidupka baru ari mati.”
23 Nya alai, sida meri nama dua iku orang: Josep, ke dikumbai Barsabas, ke mega dikumbai Justus, lalu siku da agi Matias.
24 Udah nya sida besampi: “O Jehovah,* Nuan nemu ati semua orang. Tunjukka meh ni bagi seduai tu ke udah dipilih Nuan
25 ngambika nerima pengawa ti tuchi sereta tanggung pengawa nyadi rasul, ke udah ditinggalka Judas ngambika iya ulih nitihka jalai iya empu.”
26 Udah nya, sida bechabut undi, lalu Matias kena pilih. Nya alai, iya mega dikumbai rasul baka 11 iku rasul ke bukai.
Nota Kaki
^ Peda Penerang Leka Jaku.
^ Tauka “nyepuhka; nyelamka.”
^ Tauka “disepuhka; diselamka.”
^ Tauka “nurun atas.”
^ Jaku Asal, “penyauh satu Hari Sabat.” Nya penyauh ke ulih ditengah orang Judah maya Hari Sabat.
^ Peda nota kaki ba Matthew 1:20.
