Surat Kereja Rasul 9:1-43
9 Tang Saul agi balat pedis ati ngagai bala murid Tuan Jesus, lalu keran amat deka munuh sida. Nya alai, iya mansang ngagai imam besai,
2 lalu minta imam besai nya nulis surat ngagai semua balai gempuru ba Damaskus. Enggau nya, enti iya tetemuka sida ke lelaki tauka sida ke indu ke benung nitihka Jalai Tuan, iya ulih nanchang sida lalu mai sida ngagai Jerusalem.
3 Ba rantau jalai, lebuh iya nyauka datai ba Damaskus, enda mukai-mukai bisi penampak ari langit manchar ngelingi iya.
4 Iya pan rebah ke tanah lalu ninga nyawa bejaku: “Saul, Saul, nama kebuah nuan merinsaka aku?”
5 Saul nanya: “Sapa nuan, Tuan?” Nyawa nya nyaut: “Aku Jesus, orang ke diperinsaka nuan.
6 Angkat lalu tama ngagai nengeri nya. Ba dia, bisi orang deka madah utai ke patut digaga nuan.”
7 Orang ke enggau Saul bejalai semina bediri ba dia, enda tepansutka jaku. Sida ninga nyawa nya, tang nadai meda orang ke bejaku.
8 Udah nya, Saul angkat, tang iya enda ulih meda taja pan mata iya enchelak. Nya alai, sida megai jari iya lalu ngiring iya ngagai Damaskus.
9 Pengelama tiga hari, Saul enda ulih meda, lalu iya mega enda makai tauka ngirup.
10 Ba Damaskus, bisi siku murid Jesus ke benama Ananias. Tuan Jesus bejaku ngagai iya dalam siti genera: “Ananias!” Ku iya nyaut: “Tu aku, Tuan.”
11 Ku Tuan Jesus bejaku: “Angkat nuan. Mansang nuan ngagai rumah Judas ba jalai ke dikumbai Rurus, lalu giga siku lelaki ke benama Saul, ari Tarsus. Iya benung besampi diatu.
12 Dalam siti genera, iya tepedaka siku lelaki ke benama Ananias datai, lalu ngengkahka jari ba atas iya ngambika iya ulih meda baru.”
13 Tang Ananias nyaut: “Tuan, aku udah ninga mayuh orang bejaku pasal lelaki tu sereta semua utai ke jai ke digaga iya ngagai nembiak nuan ti kudus ba Jerusalem,
14 lalu bala tuai imam udah meri iya kuasa kena nangkap* semua orang ba ditu ke ngangauka nama nuan.”
15 Tang Tuan Jesus madah ngagai iya: “Mupuk nuan, laban aku udah milih lelaki tu kena nusui nama aku ngagai bala raja, bansa Israel, enggau bansa bukai.
16 Aku deka nunjuk ngagai iya semua pemerinsa ke patut ditapi iya ketegal nama aku.”
17 Nya alai, Ananias pan mupuk lalu tama ngagai rumah nya. Iya ngengkahka jari iya ba atas Saul lalu madahka: “Saul, menyadi aku, Tuan Jesus ke mandangka diri ngagai nuan lebuh nuan mansang kitu, udah nganjung aku ngagai nuan, ngambika nuan ulih meda baru lalu penuh laban kuasa kudus Petara.”
18 Tekala nya, bisi utai ke baka tisik ikan labuh ari mata Saul. Iya pan ulih meda baru. Udah nya, iya angkat lalu dibaptisa.
19 Iya makai lalu bulih pengering baru.
Iya diau beberapa hari enggau bala murid Jesus ba Damaskus.
20 Iya lalu terus ngagai balai gempuru ngerembaika berita pasal Jesus nya Anak Petara.
21 Semua orang ke ninga nya berasai iran lalu madahka: “Endaka iya orang ke merinsaka sida ba Jerusalem ke ngangauka nama nya? Endaka iya datai kitu laban deka nangkap bala murid Jesus lalu mai sida* ngagai bala tuai imam?”
22 Tang Saul majak landik ba pengawa nginjil. Iya enggau terang nunjukka bukti Jesus nya Kristus, nyentukka orang Judah ke diau ba Damaskus enda ulih nyangkal iya.
23 Nyau kelama, orang Judah ngiga chara deka munuh Saul.
24 Tang Saul nemu pasal pelan sida. Siang malam sida nyaga pintu nengeri nya enggau terit ngambika ulih munuh iya.
25 Nya alai, maya malam hari, bala murid Saul mai iya ngagai jenila ba dinding kuta nengeri nya. Sida ngulurka iya ke baruh ngena bakul ti besai.
26 Sepengudah datai ba Jerusalem, iya bebendar deka begulai enggau bala murid Jesus. Tang semua sida takutka iya, laban sida enda pechaya iya udah nyadi murid Jesus.
27 Nya alai, Barnabas datai nulung Saul, lalu mai iya ngagai bala rasul. Barnabas madah ngagai sida enggau silik pasal baka ni Saul udah meda Tuan Jesus lebuh iya ba rantau jalai. Barnabas mega madah pasal baka ni Tuan Jesus udah bejaku ngagai Saul, sereta baka ni Saul udah enggau berani bejaku pasal nama Jesus lebuh ba Damaskus.
28 Nya alai, Saul diau enggau sida sereta ngereja pengawa iya besehari-sehari ba Jerusalem. Iya mega majak bejaku pasal nama Tuan Jesus enggau berani.
29 Iya bejaku sereta betalat* enggau orang Judah ke bejaku ngena jaku Gerika. Tang sida nguji deka munuh iya.
30 Lebuh bala menyadi nemu pasal tu, sida mai iya ngagai Kaisaria, lalu nganjung iya ngagai Tarsus.
31 Ba siti timpuh, raban gempuru ba serata menua Judea, Galili, enggau Samaria ngasaika pengelikun sereta nyadi tegap. Kelimpah ari nya, penyampau murid majak nambah, laban sida seruran nangika Jehovah sereta idup sejalai enggau peransang ke diterima nengah kuasa kudus Petara.
32 Lebuh Peter bejalai ba serata menua nya, iya mega bisi ngagai nembiak Petara ke diau ba Lida.
33 Ba dia, iya tetemuka siku lelaki ke benama Anias. Anias udah garing-garing ba katil iya pengelama lapan taun, laban iya sakit bajung.
34 Ku Peter bejaku ngagai iya: “Anias, Jesus Kristus ngeraika nuan. Angkat lalu kemas katil nuan.” Anias pan lalu angkat tekala nya.
35 Lebuh semua orang ke diau ba Lida sereta ba Emperan Saron meda iya, sida lalu nyadi murid Tuan.
36 Ba Jopa, bisi siku murid ke benama Tabita. Dalam jaku Gerika, nama iya disalin nyadi Dorkas.* Iya ngereja mayuh utai manah sereta selalu nulung orang ke seranta.
37 Tang maya nya, iya sakit lalu mati. Nya alai, sida meri iya mandi lalu ngengkahka iya ba dalam bilik ba tingkat atas.
38 Lida semak enggau Jopa. Nya alai, lebuh bala murid Jesus ba Jopa ninga Peter bisi ba Lida, sida nganjung dua iku lelaki ngagai iya lalu madahka: “Jampat datai ngagai kami kitu.”
39 Peter pan angkat lalu nitihka sida. Lebuh iya datai ba dia, sida mai iya ngagai bilik ba tingkat atas. Semua bala indu balu ba dia datai ngagai iya. Sida nyabak lalu mandangka mayuh gari sereta baju jubah ke udah digaga Dorkas lebuh iya agi idup.
40 Pengudah Peter ngasuh semua orang pansut, iya besugang lalu besampi. Udah nya, iya nunga bangkai nya lalu bejaku: “Tabita, angkat nuan.” Mata Tabita pan enchelak, lalu lebuh iya meda Peter, iya pan duduk.
41 Peter megai jari Tabita lalu nulung iya bediri. Pengudah nya, iya ngangauka bala nembiak Petara, nyengkaum bala indu balu nya, lalu nunjuk ngagai sida, Tabita udah idup.
42 Pekara tu ngelekai ba serata Jopa, lalu mayuh orang nyadi murid Tuan.
43 Peter diau beberapa hari ba Jopa. Iya diau ba rumah siku tukang samak* ke benama Simon.
Nota Kaki
^ Jaku Asal, “nanchang.”
^ Jaku Asal, “lalu nanchang sereta mai sida.”
^ Tauka “belaban jaku.”
^ Nama Dorkas dalam jaku Gerika, lalu Tabita dalam jaku Aramaik, reti iya “Gazel,” iya nya sebengkah rusa.
^ Orang ke ngaduka kulit jelu ngambika kulit nya tau dikena ngaga utai bukai.
