Ulang Adat 1:1-46
1 Tu utai ke disebut Moses ngagai semua orang Israel ba menua puang semak Sungai Jordan, ke ba seberai Suf, entara Paran, Tofel, Laban, Haserot, enggau Dizahap.
2 Pejalai ari Horeb ngagai Kades-barnea nya 11 hari, enti nengah jalai ke nuju ngagai Gunung Seir.
3 Ba taun ti ke-40, ba bulan ti ke-11, kena hari ti kesatu, Moses madahka semua pesan Jehovah ngagai orang Israel.
4 Moses madahka nya pengudah iya* ngalahka Sihon, raja orang Amor, ke diau ba Hesbon, enggau pengudah iya ngalahka Og, raja menua Basan, ke diau ba Astarot, ba Edrei.
5 Moses nerangka Adat tu ba kawasan Sungai Jordan, ba menua Moap. Ku iya:
6 “Lebuh kitai ba Horeb, ku Jehovah, Petara kitai madahka: ‘Kita udah chukup lama diau ba kawasan ke begunung tu.
7 Alai kita mupuk ngagai kawasan orang Amor ke begunung enggau ngagai kawasan-kawasan ke bisi ba sebelah nya, iya nya ngagai Arabah, kawasan ke begunung, Shefilah, Negeb, kawasan tebing tasik, menua orang Kanaan sereta ngagai Gunung Lebanon, nyentuk ngagai sungai besai, iya nya Sungai Eupratis.
8 Aku udah meri menua nya ngagai kita. Alai mupuk. Ambi meh menua nya, ke udah disemayaka Aku, Jehovah, enggau aki ini kita Abraham, Isak, enggau Jakop. Aku udah besemaya deka meri menua nya ngagai sida sereta bala peturun sida.’
9 “Maya nya suba, aku kala madah ngagai kita: ‘Aku enda ulih ngiring kita kediri laban pengawa nya kelalu berat ba aku.
10 Jehovah, Petara kita, udah ngasuh kita nambah belipat kali ganda. Nya alai kita diatu ngemayuh bintang ba langit.
11 Awakka Jehovah, Petara aki ini kita, ngasuh kita nyadi mayuh sampai seribu kali ganda ari penyampau kita ke diatu. Awakka Iya merekatka kita baka ke udah disemaya Iya.
12 Baka ni ku aku ulih megai tanggung pengawa tu kediri? Baka ni ku aku ulih mutarka penusah enggau laya kita?
13 Nya alai, pilih meh bala lelaki ari tiap suku raban bansa kita ke bepenemu-dalam, ke landik, sereta ke bisi pengalaman. Aku deka ngelantik sida nyadi tuai kita.’
14 Lalu kita madah: ‘Manah utai ku nuan nya.’
15 Nya alai, aku lalu milih bala tuai raban bansa kita ke bepenemu-dalam sereta ke bisi pengalaman, lalu ngelantik sida nyadi tuai atas 1,000 iku orang, 100 iku orang, 50 iku orang, 10 iku orang, sereta nyadi pegawai ke raban bansa kita.
16 “Maya nya suba, aku kala meri pesan tu ngagai bala hakim kita: ‘Lebuh bisi orang datai betemu enggau kita ketegal sida bisi penanggul, kita patut ngakim sida enggau adil. Kita patut adil enda ngira penanggul nya nyadi entara kita ke sama orang Israel tauka enggau orang bansa bukai ke diau enggau kita.
17 Anang pilih kasih lebuh kita ngakim orang bukai. Kita patut mendingka semua orang, enda ngira orang nya bisi pangkat tauka orang biasa. Anang takutka sapa-sapa lebuh kita ngakim, laban kita ngakim ngarika Petara. Enti penanggul nya kelalu tusah ba kita, padahka penanggul nya ngagai aku, lalu aku deka mutarka iya.’
18 Maya nya suba, aku mega kala madah ngagai kita pasal semua utai ke patut digaga kita.
19 “Udah nya, baka ke diasuh Jehovah, Petara kitai, kitai mupuk ari Horeb lalu bejalai nuju ngagai kawasan orang Amor ke begunung, ti luas sereta ngenakutka. Pengujung iya, kitai pan datai ba Kades-barnea.
20 Udah nya, aku madah ngagai kita: ‘Kita udah datai ba kawasan orang Amor ke begunung, iya nya kawasan ke deka diberi Jehovah ngagai kitai.
21 Jehovah, Petara kita, udah meri menua nya ngagai kita. Alai mupuk. Ambi meh menua nya, baka ke udah diasuh Jehovah, Petara aki ini kita. Anang takut.’
22 “Tang semua kita madah ngagai aku: ‘Anjung beberapa iku orang ngintip menua nya. Lebuh sida pulai, sida ulih madah ngagai kitai ni bagi jalai ke tau ditengah kitai sereta baka ni gaya kuta-kuta ba menua nya.’
23 Cadangan kita nya manah ba aku. Nya alai, aku lalu milih 12 iku lelaki, siku ari siti-siti raban bansa.
24 Sida mupuk ngagai kawasan begunung lalu datai ba Lebak* Eskol. Sida lalu ngintip menua nya.
25 Lebuh sida pulai, sida mai buah ari menua nya. Ku sida madah: ‘Menua ke deka diberi Jehovah, Petara kitai nya, amat manah.’
26 Tang kita enggai mansang ngagai menua nya. Kita enggai nitihka utai ke diasuh Jehovah, Petara kita.
27 Kita majak mutap dalam langkau kain kita. Ku kita: ‘Jehovah begedika kitai! Nya kebuah Iya mai kitai pansut ari menua Ejip, ngambika orang Amor munuh kitai.
28 Nama kebuah kitai patut ngagai menua nya? Bala kitai udah ngasuh ati kitai takut. Sida madah: “Orang ba menua nya besai sereta tinggi agi ari kitai. Kuta-kuta sida besai, lalu dinding kuta sida tinggi nyentukka langit. Kami mega bisi meda orang Enak ba dia.”’
29 “Aku lalu bejaku ngagai kita: ‘Anang takutka sida.
30 Jehovah, Petara kita, deka ngiring kita, lalu belaban ngarika kita, baka ke udah dikereja Iya ba menua Ejip ke kala dipeda kita ngena mata kita empu.
31 Lebuh kita ba menua puang, kita empu udah meda, baka ni Jehovah, Petara kita, udah mai kita, baka apai ke mai anak iya, enda ngira kini ke penunga kita nyentukka kita datai ba endur tu.’
32 Taja pia, kita agi enda arapka Jehovah, Petara kita.
33 Iya udah mupuk dulu ari kita, kena ngiga endur alai kita tau nirika kem. Iya ngiring kita ngena tiang api maya malam hari enggau ngena tiang remang* maya siang hari, kena nunjukka jalai ke patut ditengah kita.
34 “Jehovah bisi ninga jaku putap kita. Nya alai Iya ringat lalu besumpah:
35 ‘Nadai siku pan sida* ke jai ke agi idup tu deka meda menua ke udah disemayaka Aku ngagai aki ini sida,
36 kelimpah ari Kalep anak Jepuneh. Aku deka meri iya sereta bala peturun iya menua ke udah ditujah iya. Iya deka meda menua nya laban iya udah nitihka Aku, Jehovah, enggau pengabis ati iya.’
37 Jehovah mega ringat ngagai aku ketegal kita. Ku Iya: ‘Nuan pan enda tau tama ngagai menua nya!
38 Tang Josua anak Nun, penulung nuan, deka tama ngagai menua nya. Keringka iya,* laban iya deka ngiring orang Israel ngulihka menua nya.’
39 Ku Petara: ‘Kita madah bala anak kita deka ditabanka bala munsuh. Tang bala anak kita, ke bedau nemu bida entara utai ti manah enggau utai ti jai nya meh ke deka tama ngagai menua nya. Aku deka meri menua nya ngagai sida.
40 Tang, semua kita patut pulai baru ngagai menua puang nengah jalai ke nuju ngagai Tasik Mirah.’
41 “Udah nya, ku kita madah ngagai aku: ‘Kami udah bedosa ngelaban Jehovah. Kami deka mupuk beperang, baka ke udah diasuh Petara kitai, Jehovah.’ Tiap iku kita pan lalu mai senyata. Kita ngumbai nya senang aja deka nyerang lalu ngulihka kawasan ke begunung nya.
42 Tang ku Jehovah madah ngagai aku: ‘Padah ngagai sida: “Anang mupuk beperang, laban Aku enda enggau kita. Enti kita mupuk beperang, kita tentu deka alah laban munsuh kita.”’
43 Nya alai, aku madahka pesan nya ngagai kita. Tang kita enggai mending. Kita ngelaban utai ke udah diasuh Jehovah, lalu ngumbaka diri mansang ngagai kawasan ke begunung nya.
44 Udah nya, orang Amor ke diau ba kawasan ke begunung nya pansut baka indu manyi, lalu datai nyerang kita. Sida begagaika kita, lalu kita pambar rari nyentuk ngagai Seir enggau Hormah.
45 Tang udah nya, kita pulai lalu nyabak ba depan Jehovah. Tang Jehovah enggai mendingka kita tauka ibuhka kita.
46 Nya meh kebuah kita lama diau ba Kades.
Nota Kaki
^ Iya nya, nengah kuasa Jehovah.
^ Tauka “Wadi.”
^ Tauka “awan.”
^ Tauka “Nadai siku pan ari generasi.”
^ Tauka engka, “Petara udah ngeringka iya.”
