Ulang Adat 10:1-22
10 “Udah nya, Jehovah madah ngagai aku: ‘Gaga dua iti lampang batu baka ke digaga nuan sebedau tu, lalu datai ngagai Aku ba atas gunung. Nuan mega patut ngaga siti peti ari kayu.
2 Ba dua iti lampang batu nya, Aku deka nuliska jaku ke bisi ba dua iti lampang batu ke udah dipechahka nuan. Udah nya, nuan patut nyimpan lampang batu nya ba dalam peti.’
3 Nya alai, aku ngaga siti peti ngena kayu akasia, lalu ngaga dua iti lampang batu baka ke sebedau tu. Aku lalu mai dua iti lampang batu nya niki ngagai gunung nya.
4 Ba lampang batu nya, Jehovah nuliska jaku ke udah ditulis Iya sebedau tu. Iya nuliska Sepuluh Pesan ke dipadah Iya ngagai kita lebuh Iya bejaku enggau kita ari dalam api, maya kita begempuru ba kaki gunung nya. Jehovah lalu meri lampang batu nya ngagai aku.
5 Udah nya, aku nurun ari gunung lalu nyimpan lampang batu nya ba dalam peti ke udah digaga aku. Lampang batu nya mengkang ba dalam peti nya, baka ke diasuh Jehovah.
6 “Orang Israel mupuk ari Berot Bene-jaakan ngagai Moserah. Ba dia, Aron mati lalu dikuburka. Anak iya, Eleasar, dilantik nyadi imam kena nganti Aron.
7 Ari Moserah, sida mupuk ngagai Gutgodah. Lalu ari Gutgodah, sida mupuk ngagai Jotbata, iya nya endur ke bisi mayuh sungai.*
8 “Maya nya, Jehovah udah milih orang Lewi ngesan peti lampang batu Adat Jehovah. Sida mega gawa ke Jehovah sereta merekatka orang Israel ngena nama Petara, baka ke dikereja sida nyentukka seharitu.
9 Nya kebuah orang Lewi nadai diberi tanah nyadika pesaka. Jehovah meh ke nyadi pesaka sida, baka ke udah dipadahka Jehovah ngagai sida.
10 Aku diau ba gunung nya baru pengelama 40 hari enggau 40 malam. Maya nya, Jehovah agi ka mendingka aku, lalu Jehovah enggai ngemunaska kita.
11 Udah nya, Jehovah bejaku ngagai aku: ‘Iring bansa Israel lalu besedia deka tama ngagai menua ke deka diberi Aku ngagai sida. Sida deka ngempu menua ke udah disemaya Aku enggau aki ini sida.’
12 “Nya alai, orang Israel, tu utai ke dipinta Jehovah ari kita: Nangika Jehovah, Petara kita. Titihka semua jalai Iya, rinduka Iya, lalu sembah Jehovah, Petara kita, enggau pengabis ati kita sereta enggau pengabis pengidup kita.
13 Titihka semua pesan enggau atur Jehovah ke udah diberi aku ngagai kita seharitu. Semua nya ke penguntung kita empu.
14 Langit enggau semua utai ke ba langit, sereta dunya enggau semua utai ke ba dunya enggi Jehovah, Petara kita.
15 Tang, Jehovah semina semak ngagai aki ini kita lalu nunjukka pengerindu Iya ngagai sida. Ari semua bansa, Iya udah milih kita laban kita peturun sida. Kita agi enggi Petara nyentukka seharitu.
16 Nya alai, kita mesti nentuka ati kita nyadi tuchi, lalu badu agi degil.
17 Jehovah, Petara kita nya, Petara atas semua Petara sereta Tuan atas semua Tuan. Iya Petara ti kering, bekuasa, sereta ulih ngereja utai ti ngalitka ati. Iya enda pilih kasih lalu enda nerima rasuah.
18 Iya adil ngagai anak ke nadai apai* sereta sida ke balu. Iya rinduka orang asing, lalu meri sida pemakai enggau gari.
19 Nya alai, kita mesti rinduka orang asing, laban kita mega kala nyadi orang asing ba menua Ejip.
20 “Kita patut nangika Jehovah, Petara kita. Kita patut nyembah Iya. Kita patut mengkang bepegai rat ba Iya, lalu lebuh kita besumpah, besumpah meh atas nama Iya.
21 Semina Iya siku aja ke patut dipuji kita. Iya Petara kita ke udah ngereja utai ti luar biasa sereta ngalitka ati ba depan mata kita.
22 Suba, semina 70 iku aja aki ini kita ke mupuk ngagai menua Ejip. Tang diatu, Jehovah, Petara kita, udah ngasuh kita ngemayuh bintang ba langit.
