Ulang Adat 12:1-32
12 “Tu adat enggau atur ke mesti dititihka kita seagi-agi kita idup ba menua ke deka diberi Jehovah, Petara aki ini kita, ngagai kita.
2 Ba menua ke deka diempu kita nya, kita patut nganchurka semua endur alai sida nyembah petara sida abis lengis, enda ngira nya ba gunung ti tinggi, tauka ba bukit, tauka ba baruh pun kayu ti subur.
3 Kita mesti ngeruntuhka alta sida, mechahka tiang batu keramat sida, nunu tiang kayu keramat sida, sereta nebang patung petara sida ngambika nama semua petara sida nya enda dikingatka agi.
4 “Anang nyembah Jehovah, Petara kita, nitihka chara orang ari bansa bukai nyembah petara sida.
5 Ari semua kawasan raban bansa kita, Jehovah, Petara kita, deka milih siti endur nyadika tempat alai Iya diau sereta tempat kena ngemuliaka nama Iya. Sembah meh Iya ba endur ke udah dipilih Iya nya.
6 Bai meh pemeri tunu kita, pemeri kita ke bukai, pemeri persepuluh, pemeri sukarela, pemeri kena ngamatka semaya, sereta anak tuai jelu kita ngagai endur nya.
7 Kita enggau sida ke sebilik enggau kita mesti makai ba dia, iya nya ba depan Jehovah, Petara kita. Kita mega mesti gaga ati ke semua asil ti udah diulih kita laban Jehovah, Petara kita, udah merekatka kita.
8 “Anang ngereja utai baka ke benung dikereja kitai diatu, iya nya ngereja utai nitihka peneka ati diri,*
9 laban kita bedau datai ba menua ke deka nyadi endur alai kita diau, ke deka diberi Jehovah, Petara kita, ngagai kita nyadika pesaka.
10 Pengudah kita meraka Sungai Jordan lalu diau ba menua ke diberi Petara kita, Jehovah, ngagai kita ngambika diempu kita, Iya tentu deka nyaga kita ari semua munsuh ke ngelingi kita ngambika kita ulih diau likun ba menua nya.
11 Petara kita, Jehovah, deka milih siti endur kena ngemuliaka nama Iya. Bai meh semua utai ke udah diasuh aku bai kita, iya nya pemeri tunu, pemeri ke bukai, pemeri persepuluh, pemeri sukarela, enggau pemeri kena ngamatka semaya, ngagai endur ke udah dipilih Jehovah nya.
12 Kita deka gaga ati ba depan Jehovah, Petara kita, sama enggau bala anak kita, bala ulun kita, sereta enggau orang Lewi ke diau ba kuta kita, laban orang Lewi nadai diberi tanah baka kita nyadika pesaka.
13 Anang nyerahka pemeri tunu ba endur bukai sepeneka ati kita.
14 Kita semina tau nyerahka pemeri tunu ba endur ke udah dipilih Jehovah, iya nya ba siti ari kawasan raban bansa kita. Ba dia, kita mesti ngereja semua utai ke udah dipadahka aku ngagai kita.
15 “Enti kita deka makai dagin, kita ulih nyayat jelu nya lalu makai dagin iya ba kuta kita ba sebarang maya. Enda ngira kita nya orang ke tuchi tauka enda, kita tau makai seberapa mayuh dagin ke diberi Jehovah ngagai kita. Kita tau makai dagin nya baka kita ke makai dagin kijang tauka rusa.
16 Tang kita enda tau makai darah. Kita mesti nuangka darah nya ngagai tanah baka ke nuang ai.
17 Kita enda tau makai semua pemeri tu ba kuta kita: Sepuluh peratus bijirin, wain ti baru, minyak, anak tuai jelu tupi kita, semua pemeri kena ngamatka semaya, pemeri sukarela, enggau semua pemeri kita ke bukai.
18 Kita patut makai semua nya ba depan Jehovah, Petara kita, iya nya ba endur ke udah dipilih Jehovah, Petara kita. Kita patut makai dagin nya begulai enggau bala anak kita, bala ulun kita, sereta enggau orang Lewi ke diau ba kuta kita. Kita deka gaga ati ba depan Jehovah, Petara kita, enggau semua utai ke udah diulih kita.
19 Seagi-agi kita diau ba menua nya, anang enda ibuhka orang Lewi.
20 “Jehovah, Petara kita, deka ngasuh kawasan kita nyadi besai baka ke udah disemaya Iya. Maya nya, enti kita ka makai dagin, kita tau makai dagin ba sebarang maya.
21 Jehovah, Petara kita, udah milih endur kena ngemuliaka nama Iya. Enti endur nya kelalu jauh ari endur kita diau, kita ulih nyayat jelu tupi ke diberi Jehovah ngagai kita lalu makai dagin nya dalam kuta kita sebarang maya, baka ke udah dipadahka aku ngagai kita.
22 Enda ngira kita nya orang ke tuchi tauka enda, kita tau makai dagin nya baka kita ke makai dagin kijang tauka rusa.
23 Tang, kita enda tau makai darah laban darah nya nyawa. Kita enda tau makai nyawa ke agi bisi dalam dagin nya.
24 Kita enda tau makai darah. Kita mesti nuangka darah nya ngagai tanah baka ke nuang ai.
25 Anang makai darah. Enti kita ngasika pesan tu, kita ngereja utai ti ngena ba mata Jehovah. Enggau nya, kita sereta bala anak kita deka idup lantang.
26 Lebuh kita ngagai endur ke dipilih Jehovah, kita semina tau mai pemeri ti kudus ke endang enggi kita empu sereta pemeri kena ngamatka semaya.
27 Ba dia, kita patut nyerahka pemeri tunu, iya nya dagin jelu enggau darah jelu nya ba alta Jehovah, Petara kita. Kita tau makai dagin jelu nya, tang darah jelu nya patut dituang ngagai alta Jehovah, Petara kita.
28 “Kita mesti bebendar nitihka semua pesan ke udah dipadahka aku ngagai kita, ngambika kita enggau bala anak kita ulih idup lantang. Enti kita ngasika semua pesan nya, kita ngereja utai ti manah sereta ngena ba mata Jehovah, Petara kita.
29 “Lebuh Jehovah, Petara kita, ngemunaska bansa ke diau ba menua ke deka diempu kita sereta ke deka alai kita diau,
30 bejimat ngambika kita enda dipanjuk lalu nitihka chara sida. Anang betanyaka chara sida nyembah petara sida, enggaika kita nyembah Petara kita nitihka chara sida.
31 Anang nyembah Jehovah, Petara kita, nunda chara sida laban lebuh sida nyembah petara sida, sida ngereja utai ti keji ke dipegedika Jehovah. Sida indah nunu bala anak sida empu nyadika pemeri ngagai petara sida.
32 Kereja semua pesan ti udah dipadahka aku ngagai kita enggau bebendar. Anang nambah tauka muai utai ari pesan nya.
Nota Kaki
^ Jaku Asal, “ngereja utai ti betul ba mata diri empu.”
