Ulang Adat 13:1-18
-
Utai ke digaga ngagai orang ke limpang (1-18)
13 “Enti bisi nabi tauka orang ke nemu nerangka reti mimpi ba bala kita, lalu iya madahka kita tanda tauka ramalan,
2 lalu tanda tauka ramalan nya amat-amat nyadi, tang udah nya ku iya: ‘Aram kitai mupuk lalu nyembah petara-petara bukai,’ iya nya petara ke enda dikelala kita,
3 anang mendingka jaku nabi nya tauka orang ke nemu nerangka reti mimpi nya, laban Jehovah benung nguji kita kena nemu sekalika kita rinduka Jehovah, Petara kita, enggau pengabis ati kita sereta enggau pengabis pengidup kita.
4 Kita patut nitih lalu nangika Jehovah, Petara kita. Kita patut ngasika semua pesan Iya lalu mendingka jaku Iya. Kita patut nyembah Iya lalu bepegai rat ba Iya.
5 Tang, nabi nya tauka orang ke nemu nerangka reti mimpi nya patut dibunuh, laban iya mai kita ngelaban Jehovah, Petara kita, ke udah nebus kita lalu mai kita pansut ari menua Ejip, iya nya menua alai kita nyadi ulun. Iya nguji ngelimpangka kita ari jalai ke diasuh Jehovah titihka kita. Kita mesti muai utai ti jai ari bala kita.
6 “Enti menyadi lelaki kita,* tauka anak lelaki kita, tauka anak indu kita, tauka bini ke dikesayauka kita, tauka kaban rapat kita, nguji mai kita belalai nyembah petara-petara bukai, iya nya petara ke enda dikelala kita tauka aki ini kita,
7 petara ke disembah bansa bukai ke diau ngelingi kita, enda ngira sida diau semak enggau kita tauka diau jauh ari kita, tauka ari dini-dini endur ba menua kita,
8 anang alah dibai sida tauka mendingka sida. Anang kasihka sida tauka ngelindung sida.
9 Tang kita patut munuh orang nya. Kita patut dulu agi ari orang bukai nikau orang nya ngena batu. Udah nya, orang bukai deka nikau orang nya ngena batu sampai iya mati.
10 Kita patut nikau iya ngena batu sampai mati laban iya nguji ngelimpangka kita ari Jehovah, Petara kita, ke udah mai kita pansut ari menua Ejip, iya nya menua alai kita nyadi ulun.
11 Semua orang Israel deka ninga pasal nya lalu nyadi takut. Enggau nya, sida enggai ngereja utai ti jai baka nya agi.
12 “Lebuh kita diau ba kuta-kuta ke diberi Petara kita, Jehovah, kita engka bisi ninga
13 pasal sekeda orang ke nadai guna, ke nguji ngelimpangka orang ba kuta nya madahka: ‘Aram kitai mupuk lalu nyembah petara-petara bukai,’ iya nya petara ke enda dikelala kita.
14 Enti pia, kita patut mansik sereta nasat pekara nya enggau silik. Enti utai jai nya amat udah nyadi,
15 kita patut munuh semua orang ba kuta nya ngena pedang. Kita patut nganchurka kuta nya enggau semua utai ke ba dalam kuta nya, nyengkaum semua jelu tupi.
16 Gumpul semua barang berega ba kuta nya lalu engkahka semua barang nya ba tengah-tengah dataran awam. Udah nya, kita patut nunu kuta nya sama enggau semua barang ti berega nya. Semua barang nya deka nyadi baka pemeri ngagai Jehovah, Petara kita. Kuta nya deka nyadi tembawai belama iya, lalu kuta nya enda didirika agi.
17 Anang ngambi utai ke mesti dianchurka, ngambika Jehovah badu agi ringat ngagai kita lalu ngayanka pengasih ngagai kita. Iya deka ngasuh kita nyadi mayuh, baka ke udah disemayaka Iya enggau aki ini kita.
18 Kita patut ngasika semua pesan Jehovah, Petara kita, ke diberi aku ngagai kita seharitu. Enggau nya, kita ngereja utai ti ngena ba mata Jehovah, Petara kita.
Nota Kaki
^ Jaku Asal, “menyadi lelaki kita, iya nya anak indai kita.”
