Ulang Adat 14:1-29
14 “Kita meh nembiak Jehovah, Petara kita. Anang nelihka tubuh diri tauka nyukur buk ba begian depan pala kita lebuh kita tusah ati ke orang ke udah mati.
2 Tu ketegal kita bansa ti kudus ba Jehovah, Petara kita. Jehovah udah milih kita nyadi nembiak Iya, iya nya bansa Iya ti istimewa,* ke dipilih Iya ari semua bansa ba dunya tu.
3 “Kita enda tau makai utai ti kamah ba mata Petara.
4 Tu bansa jelu ke tau diempa kita: Sapi, bedus, kambin,
5 rusa, kijang, antelop, kambin liar, bedus liar, enggau bedus gunung.
6 Kita tau makai semua jelu ke ngunyah baru pemakai ti udah diluaka sida sereta ke bisi tunjing* belah abis.
7 Tang, kita enda tau makai jelu ke semina ngunyah baru pemakai ti udah diluaka sida tang tunjing sida enda belah abis, tauka jelu ke semina bisi tunjing belah abis tang enda ngunyah baru pemakai ti udah diluaka sida. Tu bansa jelu ke enda tau diempa kita: Unta, ribit, enggau jelu hiraks* laban sida ngunyah baru pemakai ti udah diluaka sida, tang tunjing sida enda belah abis. Semua jelu nya enda tuchi ba mata Petara.
8 Kita mega enda tau makai babi laban iya bisi tunjing belah abis, tang iya enda ngunyah baru pemakai ti udah diluaka iya. Jelu nya enda tuchi ba mata Petara. Kita enda tau makai dagin jelu nya tauka negu bangkai jelu nya.
9 “Tu utai idup ba ai ti tau diempa kita: Kita tau makai utai idup ke bisi sirip enggau tisik.
10 Tang, kita enda tau makai utai idup ke ba ai ke nadai sirip enggau tisik. Jelu nya enda tuchi ba mata Petara.
11 “Kita tau makai burung ke tuchi ba mata Petara.
12 Tu bansa burung ke enda tau diempa kita: Menaul, menaul ke makai ikan, menaul ke makai bangkai,
13 menaul mirah, menaul chelum, semua bansa menaul ke bukai,
14 semua bansa burung gagak,
15 burung unta, burung antu, burung camar, semua bansa burung falkon,
16 burung antu ti mit, burung antu ti panjai pending, burung swan,
17 burung undan, burung hering, burung dendang ai,
18 bangau, semua bansa burung heron, burung hudhud, enggau kelawar.
19 Kita patut kejika semua bansa indu utai ti besayap. Kita enda tau makai indu utai ke baka nya.
20 Semua bansa utai idup ti besayap ke tuchi tau diempa kita.
21 “Kita enda tau makai jelu ke ditemu mati, laban kita nembiak Jehovah ti kudus. Kita tau meri jelu nya ngagai orang asing ba kuta kita tauka nyual jelu nya ngagai sida, laban sida tau makai jelu nya.
“Anang ngerebus dagin anak kambin dalam ai tusu indai iya.
22 “Ninting taun, kita mesti meri 10 peratus ari semua utai ke diulih kita ba ladang.
23 Kita deka makai 10 peratus ari bijirin, wain ti baru, minyak, enggau anak tuai jelu tupi kita ba endur ke udah dipilih Jehovah, Petara kita, kena ngemuliaka nama Iya. Enggau nya, kita deka seruran belajar nangika Jehovah, Petara kita.
24 “Tang, enti endur ke dipilih Jehovah kena ngemuliaka nama Iya nya kelalu jauh ari endur kita diau, lalu kita enda ulih mai asil 10 peratus kita nya laban Petara kita, Jehovah, udah merekatka kita,
25 kita ulih nyual semua utai nya lalu mai duit nya ngagai endur ke udah dipilih Jehovah, Petara kita.
26 Udah nya, kita ulih ngena duit nya kena meli nama-nama utai ke dikedekaka kita. Kita ulih meli sapi, bedus, kambin, wain tauka nama-nama bansa ai bisa ke bukai, sereta utai bukai ke dikerinduka kita. Udah nya, kita enggau ruang bilik kita deka makai semua nya ba depan Jehovah, Petara kita, enggau gaga ati.
27 Anang enda ibuhka orang Lewi ke diau ba semua kuta kita, laban sida nadai diberi tanah tauka pesaka baka kita.
28 “Ba ujung taun ti ketiga, kita patut mai semua 10 peratus asil ladang kita ba taun nya, lalu nyimpan iya ba kuta kita.
29 Udah nya, orang Lewi ke nadai diberi tanah tauka pesaka baka kita, pia mega enggau orang asing, anak ke nadai apai,* sereta sida ke balu, ke diau ba kuta kita, deka datai lalu makai sampai kenyang. Enggau nya, Jehovah, Petara kita, deka merekatka semua utai ke dikereja kita.
Nota Kaki
^ Tauka “bansa ti berega ba Iya.”
^ Kukut kering ke ba ujung kaki sekeda bansa jelu.
^ Sebengkah jelu ke baka gamal tikus belanda ti besai. Jelu tu nadai iku lalu diau ba endur ti bebatu.
^ Tauka “anak yatim.”
