Ulang Adat 16:1-22
16 “Anang enda ingat, bulan Abib* nya bulan ti penting. Ba bulan nya, kita mesti ngintu Pengerami Paska ke Jehovah, Petara kita, laban ba bulan nya Jehovah, Petara kita, udah mai kita pansut ari Ejip maya malam hari.
2 Kita mesti nyerahka jelu tupi kita nyadika korban Paska ke Jehovah, Petara kita, ba endur ke dipilih Jehovah kena ngemuliaka nama Iya.
3 Anang makai korban Paska nya sama enggau nama-nama utai ti beragi. Pengelama tujuh hari, kita mesti makai roti ti enda beragi kena ngenang penusah enggau pemerinsa ke ditapi kita sereta kena ngingatka diri ti udah beguai-guai pansut ari menua Ejip. Kita mesti ngereja nya seumur idup, kena ngingatka hari kita pansut ari menua Ejip.
4 Pengelama tujuh hari, kita enda tau bisi nama-nama utai ti beragi ba serata menua kita. Dagin jelu ke diserahka kita maya lemai hari ti keterubah, enda tau disimpan nyentuk ngagai pagi hari siti.
5 Anang nyerahka korban Paska nya ba sebarang kuta ti diberi Jehovah, Petara kita, ngagai kita.
6 Tang, kita mesti nyerahka korban Paska nya ba endur ke dipilih Jehovah kena ngemuliaka nama Iya. Kita mesti nyerahka korban Paska nya maya mata panas padam, sama baka maya kita pansut ari menua Ejip.
7 Kita mesti manduk lalu makai korban Paska nya ba endur ke dipilih Jehovah, Petara kita. Lalu pagi hari siti, kita ulih pulai ngagai langkau kain kita empu.
8 Pengelama enam hari, kita mesti makai roti ti enda beragi. Lalu ba hari ti ketujuh, kita deka begempuru nyembah Jehovah, Petara kita. Nya gempuru ti kudus. Ba hari nya, kita enda tau bekereja.
9 “Kita mesti ngitung tujuh minggu, berengkah ari maya keterubah kita ngetau bijirin ba ladang kita.
10 Udah nya, kita mesti ngintu Pengerami Ngetau ke Jehovah, Petara kita. Kita mesti meri pemeri sukarela nitihka pemayuh berekat ke diberi Petara kita, Jehovah, ngagai kita.
11 Kita mesti gaga ati ba depan Jehovah, Petara kita, ba endur ke dipilih Jehovah kena ngemuliaka nama Iya, begulai enggau bala anak kita, bala ulun kita, orang Lewi ke diau ba kuta kita, orang asing, anak ke nadai apai,* sereta enggau sida ke balu, ke bisi ba bala kita.
12 Anang enda ingat, suba kita kala nyadi ulun ba Ejip. Nya alai, kita mesti nitih lalu ngasika semua atur nya.
13 “Kita mesti ngintu Pengerami Belangkau pengelama tujuh hari, pengudah kita ngumpul asil utai ke ditanam ari endur alai ngindik utai ke diketau sereta ari endur alai merah minyak enggau wain.
14 Maya pengerami nya, gaga ati meh begulai enggau bala anak kita, bala ulun kita, orang Lewi, orang asing, anak ke nadai apai, sereta enggau sida ke balu, ke diau ba kuta kita.
15 Pengelama tujuh hari, kita mesti ngintu pengerami nya ke Petara kita, Jehovah, ba endur ke dipilih Jehovah. Jehovah, Petara kita, deka merekatka semua utai ke ditanam kita enggau semua utai ke dikereja kita. Enggau nya, kita deka penuh enggau pengaga ati.
16 “Tiga kali setaun, iya nya maya Pengerami Roti ti Enda Beragi, Pengerami Ngetau, enggau Pengerami Belangkau, semua lelaki ari bala kita patut mansang ngagai Jehovah, Petara kita, ba endur ke dipilih Iya. Nadai siku pan sida tau mansang ngagai Jehovah enti sida nadai mai utai.
17 Tiap iku sida mesti mai pemeri nitihka pemayuh berekat ti udah diberi Petara kita, Jehovah, ngagai sida.
18 “Kita mesti ngelantik bala hakim enggau bala pegawai ke tiap iti raban bansa kita, ba semua kuta ke diberi Petara kita, Jehovah, ngagai kita. Sida mesti ngakim enggau adil.
19 Sida enda tau nyebut utai ti bula, pilih kasih, tauka nerima rasuah, laban rasuah ulih mampul mata hakim ari meda utai ti betul, lalu ulih ngubah jaku orang ke lurus.
20 Kita mesti adil. Au, kita mesti seruran adil, ngambika kita mengkang idup ba menua ke deka diberi Petara kita, Jehovah, ngagai kita.
21 “Kita enda tau nanam nama-nama pun kayu ngambika disembah,* semak enggau alta ke digaga kita ke Jehovah, Petara kita.
22 “Anang ngaga tiang batu keramat, laban Jehovah, Petara kita, begedika utai nya.
Nota Kaki
^ Peda Rujukan B15.
^ Tauka “anak yatim.”
^ Tauka “pun kayu kena nirika tiang kayu keramat.”
