Ulang Adat 18:1-22
18 “Bala imam Lewi enggau semua raban bansa Lewi enda diberi tanah ba menua Israel nyadika pesaka. Sida deka makai pemeri ke ditunu ke Jehovah, iya nya pemeri ke diserahka ngagai Iya.
2 Sida nadai bulih pesaka ba bala orang Israel. Jehovah deka nyediaka utai ke diguna sida,* baka ke udah dipadahka Iya ngagai sida.
3 “Ari utai ke diberi orang Israel, tu begian ke deka diempu bala imam: Enti bisi orang nyerahka sapi tauka bedus, iya patut meri begian bau, rang, enggau perut jelu nya ngagai imam.
4 Asil ti keterubah ari bijirin, minyak, wain ti baru, enggau bulu bedus mega patut diberi ngagai bala imam.
5 Jehovah, Petara kita, udah milih semua lelaki ari peturun Lewi. Sida deka seruran gawa ke Jehovah.
6 “Enti bisi orang Lewi ninggalka endur alai iya diau ba siti ari kuta di menua Israel, lalu mupuk ngagai endur ke dipilih Jehovah,*
7 iya ulih gawa ke Jehovah ba dia begulai enggau orang Lewi ke bukai, ke gawa ba depan Jehovah.
8 Kelimpah ari bulih asil ari pesaka ke dijual iya, iya mega deka bulih pemakai ngemayuh ke diberi ngagai bala orang Lewi ke bukai.
9 “Pengudah kita tama ngagai menua ke diberi Petara kita, Jehovah, ngagai kita, anang nitihka pengawa ke dikereja orang bansa bukai ke diau ba dia. Pengawa sida dipegedika Petara.
10 Anang nunu bala anak kita nyadika pemeri, anang meramal tauka ngena ilmu sihir,* anang betilitka nasit tauka nyadi dukun,
11 anang ngena jampi ba orang bukai, anang ngiga manang tauka ngiga orang ke nemu nilit nasit, tauka betanya ngagai orang ke udah mati.
12 Jehovah amat begedika orang ke ngereja semua utai nya. Nya meh kebuah Jehovah, Petara kita, muru orang ari bansa bukai nya ari kita.
13 Kita mesti nentuka diri nadai bepenyalah ba depan Jehovah, Petara kita.
14 “Orang ari bansa bukai ke deka diburu kita nya selalu mendingka jaku orang ke nemu sihir sereta orang ke nemu meramal. Tang Petara kita, Jehovah, enda ngasuh kita ngereja semua utai nya.
15 Petara kita, Jehovah, deka milih siku nabi baka aku ari bansa kita. Kita patut ningaka iya.
16 Nya meh saut ngagai utai ke dipinta kita ari Jehovah, Petara kita, lebuh kita begempuru ba Horeb. Maya nya, kita madah: ‘Anang ngasuh kami ningaka munyi nyawa Jehovah, Petara kami. Lalu anang ngasuh kami meda api ti besai nya agi, enggaika kami mati.’
17 Udah nya, Jehovah madah ngagai aku: ‘Manah cadangan sida nya.
18 Aku deka milih siku nabi baka nuan ari bansa kita. Aku deka madah ngagai iya utai ke patut disebut, lalu iya deka madahka semua pesan Aku ngagai bala kita.
19 Barang sapa ke enda ngasika pesan ke dipadahka Aku nengah nabi nya deka diukum.
20 “‘Enti bisi nabi berani madahka pesan dalam nama Aku, tang Aku nadai ngasuh iya ngereja nya, tauka iya madahka pesan dalam nama petara-petara bukai, nabi nya mesti diukum mati.
21 Tang kita engka bejaku munyi tu dalam ati kita: “Baka ni kami ulih nemu sekalika utai ke dipadah nabi nya datai ari Jehovah tauka ukai?”
22 Enti nabi nya madahka pesan dalam nama Aku, Jehovah, tang utai ke dipadah iya enda nyadi, reti iya, jaku ke dipadah iya ukai datai ari Aku, Jehovah. Nabi nya udah ngumbaka diri. Anang takutka iya.’
Nota Kaki
^ Jaku Asal, “Jehovah meh pesaka sida.”
^ Iya nya, tempat ke dipilih Jehovah nyadi endur alai nyembah Iya.
^ Peda Penerang Leka Jaku, “Ilmu sihir.”
