Ulang Adat 19:1-21
19 “Pengudah Petara kita, Jehovah, ngemunaska orang ke diau ba menua ke deka diberi Jehovah ngagai kita, sereta pengudah kita ngempu kuta sida lalu diau ba rumah ke bisi ba dia,
2 kita mesti milih tiga iti kuta ba menua ke deka diberi Petara kita, Jehovah, ngagai kita.
3 Kita mesti magi menua ke deka diberi Petara kita, Jehovah, ngagai kita nyadi tiga iti begian. Tiap iti begian nya bisi siti kuta alai ngerarika diri. Kita mesti ngaga jalai ngambika orang ke enda sengaja munuh orang bukai ulih rari kia.
4 “Enti sesiku orang enda sengaja munuh orang bukai lalu iya enda begedika orang nya, tu meh utai ke patut digaga iya enti iya deka mengkang idup:
5 Ambika chunto, iya enggau kaban iya ngagai utan ngumpul kayu. Lebuh iya ngayunka kapak iya kena nebang kayu, pala kapak iya telepas lalu kena kaban iya, lalu kaban iya pan mati, iya mesti rari ngagai siti ari kuta nya ngambika iya ulih selamat.
6 Tang enti kuta nya kelalu jauh, orang ke deka malas* ke pedis ati engka deka ngagai iya, nangkap iya, lalu munuh iya. Tang iya enda patut diukum mati, laban iya enda begedika kaban iya nya.
7 Nya meh kebuah Aku ngasuh kita milih tiga iti kuta nya.
8 “Jehovah, Petara kita, deka ngasuh kawasan kita nyadi besai baka ke udah disemayaka Iya ngagai aki ini kita. Iya mega deka meri serata menua ke udah disemayaka Iya ngagai aki ini kita ngagai kita.
9 Petara deka ngereja utai nya ke kita enti kita ngasika semua pesan ke diberi aku ngagai kita seharitu. Reti iya, kita mesti rinduka Jehovah, Petara kita, lalu seruran nitihka jalai Iya. Pengudah kawasan menua kita nyadi besai, kita mesti nambahka tiga iti kuta da agi alai ngerarika diri.
10 Enggau nya, orang ke nadai penyalah enda dibunuh ba menua ke deka diberi Jehovah, Petara kita, nyadika pesaka, lalu kita enda dikumbai berutang darah.
11 “Tang enti sesiku orang begedika orang bukai, lalu nganti peluang deka nyerang orang nya, lalu iya ngemediska orang nya nyentukka orang nya mati, udah nya iya ngerarika diri ngagai siti ari kuta nya,
12 bala tuai ba kuta nya mesti ngiga iya, lalu nyerahka iya ngagai orang ke deka malas. Orang nya mesti diukum mati.
13 Kita enda tau kasihka iya. Kita mesti muai orang ke munuh orang ke nadai penyalah ari Israel, ngambika kita ulih idup lantang.
14 “Pengudah kita nerima tanah pesaka ba menua ke diberi Jehovah, Petara kita, anang mindahka tanda sempadan ke udah ditentuka aki ini kita.
15 “Sesiku orang enda tau dikumbai ngereja penyalah tauka dosa enti semina siku aja saksi ke meri penerang, laban tiap iti pekara ulih ditentuka betul, enti bisi penerang ari dua tauka tiga iku saksi.
16 Enti sesiku orang nuduh orang bukai ngereja penyalah, lalu meri saksi pasal orang nya enggau tuju ati ti jai,
17 seduai iya mesti dibai ngagai depan Jehovah, iya nya ba depan bala imam enggau bala hakim ke gawa maya nya.
18 Bala hakim deka mansik pekara nya enggau silik. Enti orang nya ditemu meri saksi ti pelesu lalu meri tuduh ti pelesu,
19 iya patut diukum. Ukum ke diterima iya mesti sama enggau ukum ke udah dirancang iya ke orang ti dituduh iya nya. Kita mesti muai utai ti jai ari bala kita.
20 Semua orang deka ninga pasal nya lalu nyadi takut. Enggau nya, sida enda berani agi ngereja utai ti jai baka nya.
21 Anang kasihka orang nya: Nyawa ganti nyawa, mata ganti mata, ngeli ganti ngeli, jari ganti jari, kaki ganti kaki.
Nota Kaki
^ Tauka “ke nagih utang darah.”
