Ulang Adat 2:1-37
2 “Udah nya, baka ke dipadah Jehovah ngagai aku, kitai pulai baru ngagai menua puang, lalu bejalai nuju ngagai Tasik Mirah. Kitai lama bejalai ba kawasan Gunung Seir.
2 Udah nya, ku Jehovah madah ngagai aku:
3 ‘Kita udah lama bejalai ba kawasan gunung tu. Diatu, mupuk meh ngagai utara.
4 Padah ngagai orang Israel: “Kita deka bejalai mansa sempadan menua bala menyadi kita, iya nya peturun Esau, ke diau ba Seir. Sida deka takutka kita, tang kita patut bejimat.
5 Anang belaban enggau sida,* laban Aku enda meri menua sida ngagai kita. Indah tanah sida ke ngemesai tapa kaki pan enggai meh Aku meri ngagai kita, laban Aku udah meri Gunung Seir nya ngagai Esau nyadika pesaka iya.
6 Kita patut mayar utai ke diempa enggau utai ke diirup kita ba menua sida.
7 Jehovah, Petara kita, udah merekatka semua utai ke udah dikereja kita. Iya udah ngemataka kita lebuh kita bejalai ba menua puang. Pengelama 40 taun Jehovah udah enggau kita, lalu kita nadai kurang nama-nama utai.”’
8 Nya alai, kitai mansa bala menyadi kitai, iya nya peturun Esau, ke diau ba Seir, ngambika kitai enda mansa kawasan Arabah, Elat, enggau Esion-geber.
“Udah nya, kitai bejalai nuju ngagai menua puang Moap.
9 Ku Jehovah bejaku baru ngagai aku: ‘Anang nyerang orang Moap, laban Aku enda meri menua sida ngagai kita. Aku udah meri Ar ngagai peturun Lot nyadika pesaka sida.
10 (Suba, orang Emim diau dia. Sida bansa ti besai sereta kering, lalu sida tinggi baka orang Enak.
11 Orang Repaim mega baka orang Enak. Orang Moap ngangauka sida orang Emim.
12 Suba, orang Hori diau ba Seir. Tang udah nya, bala peturun Esau ngemunaska sida, ngerampas menua sida, lalu diau ba dia. Nya meh utai ke deka digaga orang Israel ngagai menua ke deka diempu sida, iya nya menua ke deka diberi Jehovah ngagai sida.)
13 Alai kita meraka Lebak* Zeret.’ Nya alai, kitai meraka Lebak Zeret.
14 Pejalai kitai ari Kades-barnea nyentuk ngagai Lebak Zeret nya pengelama 38 taun. Baka ke udah dipadah Jehovah, dalam timpuh nya, semua sida ke udah chukup umur enggau beperang, mati magang.
15 Jehovah ngena jari Iya ngelaban sida, nyentukka semua sida mati magang.
16 “Pengudah semua sida ke chukup umur enggau beperang mati magang,
17 Jehovah bejaku baru ngagai aku. Ku Iya:
18 ‘Seharitu, kita deka mansa kawasan orang Moap, iya nya Ar.
19 Lebuh kita datai semak ngagai menua orang Amon, anang ngachau sida tauka ngasuh sida ringat, laban Aku enggai meri menua sida ngagai kita. Aku udah meri menua nya nyadika pesaka peturun Lot.
20 Suba, menua nya dikumbai menua orang Repaim. (Orang Repaim kala diau ba dia, lalu orang Amon ngangauka sida orang Zamzumim.
21 Sida bansa ti besai sereta kering. Sida tinggi baka orang Enak. Tang Jehovah nulung orang Amon ngalahka sida lalu muru sida ari menua nya ngambika orang Amon ulih diau ba dia.
22 Nya meh utai ke dikereja Petara ke bala peturun Esau ke diau ba Seir. Petara udah nulung sida ngalahka orang Hori lalu ngerampas menua sida ngambika bala peturun Esau ulih diau ba dia nyentukka seharitu.
23 Orang Abim diau ba kawasan kampung nyentuk ngagai kawasan Gaza. Tang orang Kaptorim, ke datai ari Kaptor,* udah ngemunaska semua sida lalu diau ba menua nya.)
24 “‘Alai mupuk, lalu meraka Lebak Arnon. Aku deka nyerahka Sihon, raja orang Amor, ke merintah Hesbon ngagai kita. Serang iya lalu ambi meh menua iya.
25 Berengkah ari seharitu, Aku deka ngasuh semua orang ba dunya berasai takut lebuh sida ninga pasal kita. Sida deka berasai irau sereta getar-getar takut ketegal kita.’
26 “Udah nya, aku nganjung beberapa iku orang ari menua puang Kedemot betemu enggau Raja Sihon ke merintah Hesbon. Aku ngasuh sida ngenataika pesan damai ngagai raja nya:
27 ‘Awakka kami bejalai nengah menua tuan. Kami deka bejalai terus nengah jalai besai. Kami enda limpang ke kanan tauka ke kiba.
28 Kami semina makai tauka ngirup ari utai ke dijual tuan ngagai kami. Awakka kami bejalai nengah menua tuan
29 nyentukka kami meraka Sungai Jordan lalu datai ba menua ke udah diberi Petara kami, Jehovah, ngagai kami. Bala peturun Esau ke diau ba Seir enggau orang Moap ke diau ba Ar, udah ngemendarka kami bejalai nengah menua sida.’
30 Tang Raja Sihon, ke merintah Hesbon, enda ngemendarka kitai bejalai nengah menua iya, laban Jehovah, Petara kitai, udah ngasuh iya nyadi sumbung sereta degil ngambika Petara ulih nyerahka iya ngagai jari kitai.* Nya meh utai ke dipeda kitai seharitu.
31 “Udah nya, ku Jehovah bejaku ngagai aku: ‘Aku deka nyerahka Raja Sihon enggau menua iya ngagai kita. Alai, ambi meh menua nya.’
32 Lebuh Raja Sihon enggau bala soldadu iya datai deka beperang ngelaban kitai ba Jahas,
33 Jehovah, Petara kitai, nyerahka iya ngagai kitai, ngambika kitai ulih ngalahka iya, bala anak lelaki iya, enggau semua bala soldadu iya.
34 Maya nya, kitai ngalahka lalu nganchurka semua kuta ke diperintah iya lalu munuh semua lelaki, indu, enggau bala anak mit ke diau ba semua kuta nya. Nadai siku pan ditejuka idup.
35 Kitai semina ngambi jelu tupi sida enggau utai bukai ari kuta-kuta sida.
36 Kitai udah ngalahka semua kuta ari Aroer ke ba begian tisi Lebak Arnon (nyengkaum kuta ke ba lebak nya), nyentuk ngagai kuta Gilead. Kitai udah ngalahka semua kuta nya, laban Jehovah, Petara kitai, udah nyerahka semua kuta nya ngagai kitai.
37 Tang kitai enda datai semak ngagai menua orang Amon, semua kawasan Lebak Jabok, kuta-kuta ba kawasan ke begunung, tauka semua endur bukai ke ditagang Jehovah, Petara kitai.
Nota Kaki
^ Tauka “Anang ngasuh sida ringat.”
^ Tauka “Wadi.”
^ Iya nya, Krit.
^ Jaku Asal, “ngagai jari nuan.”
