Ulang Adat 20:1-20
20 “Lebuh kita beperang ngelaban munsuh kita, anang takut lebuh kita meda kuda, kerita kuda, sereta bala soldadu sida mayuh agi ari enggi kita, laban Petara kita, Jehovah, ke udah mai kita pansut ari menua Ejip bisi enggau kita.
2 Sebedau kita mupuk beperang, imam patut datai lalu bejaku enggau kita.
3 Imam nya patut madah ngagai kita: ‘Dinga kita orang Israel, enda lama da agi kita deka nyerang bala munsuh kita. Kita mesti berani. Anang takut tauka rawan,
4 laban Petara kita, Jehovah, deka ngiring kita. Iya deka beperang ngarika kita, lalu Iya deka nyelamatka kita.’
5 “Bala pegawai soldadu mega patut nanya bala soldadu: ‘Kati bisi ari bala kita ke baru udah ngaga rumah, lalu bedau diau dia? Enti bisi, awakka iya pulai ngagai rumah iya, laban enti iya enggau beperang lalu iya mati, orang bukai ke deka diau ba rumah nya.
6 Kati bisi ari bala kita ke udah nanam anggur ba ladang, tang bedau ngumpul asil iya? Enti bisi, awakka iya pulai, laban enti iya enggau beperang lalu iya mati, orang bukai ke deka makai asil ladang nya.
7 Kati bisi ari bala kita ke udah betunang, tang bedau kawin? Enti bisi, awakka iya pulai, laban enti iya enggau beperang lalu iya mati, orang bukai ke deka kawin enggau tunang iya nya.’
8 Bala pegawai mega patut nanya bala soldadu: ‘Kati bisi ari bala kita ke takut sereta enda berani beperang? Enti bisi, awakka iya pulai, laban enti iya enggau beperang, iya deka ngasuh orang bukai takut baka iya.’
9 Pengudah bala pegawai nya tembu bejaku, sida patut ngelantik bala ketuai soldadu kena ngiring bala soldadu.
10 “Sebedau kita nyerang sesiti kuta, kita mesti meri peluang ngagai orang ba dia bebaik enggau kita.
11 Enti orang ke diau ba kuta nya setuju deka bebaik enggau kita lalu sida ngemendarka kita tama ngagai kuta sida, semua sida deka nyadi ulun kita lalu deka gawa ke kita.
12 Tang, enti sida enggai bebaik enggau kita lalu deka beperang ngelaban kita, kita mesti ngelulung lalu nyerang kuta nya.
13 Jehovah, Petara kita, tentu deka nyerahka sida ngagai kita. Kita mesti munuh semua lelaki ke ba kuta nya.
14 Kita tau ngambi bala indu, bala anak, jelu tupi, barang ti berega, enggau semua utai ke bisi ba kuta nya. Kita tau ngena semua utai ke diambi kita ari munsuh kita, laban Jehovah, Petara kita, udah meri semua utai nya ngagai kita.
15 “Nya meh utai ke mesti digaga kita ngagai semua kuta ke jauh ari menua alai kita diau.
16 Tang, lebuh kita nyerang semua kuta ke semak enggau menua ke diberi Jehovah nyadika pesaka, kita mesti munuh semua orang ke ba kuta nya. Nadai siku pan tau ditejuka idup.
17 Kita mesti ngemunaska orang Het, orang Amor, orang Kanaan, orang Peris, orang Ibi, enggau orang Jebus baka ke diasuh Jehovah, Petara kita.
18 Enggau nya, sida enda ngajar kita ngereja pengawa ti kamah ke dikereja sida lebuh sida nyembah petara sida, lalu ngasuh kita bedosa ngelaban Petara kita, Jehovah.
19 “Lebuh kita nyerang sesiti kuta ketegal deka ngerampas kuta nya, lalu kita udah beperang pengelama beberapa hari, anang nebang pun buah ba endur nya. Kita ulih makai buah iya, tang anang nebang pun buah nya baka kita ke ngemunaska munsuh kita.
20 Kita semina tau nebang pun kayu ke nadai ngasilka buah. Kita tau nebang pun kayu nya, lalu ngena iya ngaga pagar kena kita ngelulung kuta ke diserang kita, nyentukka kuta nya dirampas kita.
