Ulang Adat 21:1-23
21 “Enti bisi orang ditemu kena bunuh ba padang ba menua ke deka diberi Petara kita, Jehovah, ngagai kita lalu kita enda nemu sapa munuh iya,
2 bala tuai enggau bala hakim kita mesti pansut lalu nyukat penyauh ari endur alai bangkai nya ditemu ngagai tiap iti kuta ke semak enggau endur nya.
3 Udah nya, bala tuai ari kuta ke pemadu semak enggau endur bangkai nya ditemu, patut mai siku sapi ti agi biak ke bedau kala dikena ngereja pengawa, iya nya ke bedau kala ngesan tangkun.
4 Udah nya, bala tuai ari kuta nya patut mai sapi nya ngagai lebak* ke bisi ai, lalu tanah ba lebak nya bedau kala diradu tauka ditanam enggau utai. Ba dia, sida patut matahka rekung sapi nya.
5 “Bala imam Lewi mega patut mansang ngagai endur nya, laban Jehovah, Petara kita, udah milih sida gawa ke Iya sereta madahka berekat dalam nama Jehovah. Sida deka nentuka utai ke patut digaga bekaul enggau pengawa ti ganas.
6 Udah nya, semua bala tuai ari kuta ke pemadu semak enggau endur bangkai nya ditemu deka masu jari sida atas sapi nya,
7 lalu sida patut nyebut: ‘Kami nadai munuh orang tu, lalu kami nadai meda iya dibunuh.
8 O Jehovah, anang meh nyalahka nembiak Nuan, orang Israel, ke udah ditebus Nuan, lalu lepaska nembiak Nuan, orang Israel, ari betanggungjawapka darah orang ke nadai penyalah tu.’ Enggau nya, sida enda berutang darah.
9 Enggau chara nya, kita ngereja utai ti ngena ba mata Jehovah, lalu kita enda agi betanggungjawapka pemati orang nya.
10 “Enti kita beperang ngelaban munsuh kita, lalu Petara kita, Jehovah, udah nulung kita menang lalu kita udah nangkap sekeda ari sida,
11 lalu siku ari kita bisi meda indu ke bajik ari bala orang ke ditangkap kita nya, iya ka ke indu nya lalu ka jadi enggau iya,
12 iya tau mai indu nya ngagai rumah iya. Udah nya, indu nya patut nyukur buk diri, mapal kukut diri,
13 sereta muka gari ke dikena iya lebuh iya ditangkap. Iya deka diau ba rumah lelaki nya, lalu tusah ati ke pemati apai indai iya pengelama sebulan. Udah nya, lelaki nya tau tinduk* enggau iya. Lelaki nya deka nyadi laki iya, lalu iya deka nyadi bini lelaki nya.
14 Tang dudi hari, enti lelaki nya enggai ke indu nya agi, lelaki nya patut ngelepaska iya lalu ngawakka iya mupuk ngagai sebarang endur ke dikedeka iya. Lelaki nya enda tau nyual iya tauka kasar enggau iya, laban lelaki nya udah maksa iya nyadi bini iya.
15 “Siku lelaki engka bisi dua iku bini, lalu iya lebih agi sayauka siku ari bini iya nya. Kedua-dua bini iya nya udah ngadaka anak lelaki ke iya. Tang, anak iya ke tuai diadaka bini ke enda entu dikesayauka iya.
16 Lebuh iya deka magi reta iya ngagai bala anak iya, iya enda tau ngumbai anak ke diadaka bini ke dikesayauka iya nya anak tuai iya, lalu meri hak anak tuai ngagai anak nya. Nya ketegal pengawa iya nya deka ngasuh anak tuai ke diadaka bini ke enda entu dikesayauka iya nya rugi.
17 Iya mesti ngaku anak ke diadaka bini ke enda entu dikesayauka iya nya anak tuai iya, lalu meri dua kali lipat reta iya ngagai anak nya mayuh agi ari bala anak iya ke bukai. Ketegal anak nya dulu ada, hak anak tuai mesti diberi ngagai iya.
18 “Enti sesiku orang bisi anak lelaki ke degil, udu ngelaban, sereta enggai ngasika apai tauka indai iya, taja pan apai indai iya udah nguji disiplin iya, tang iya enggai mendingka seduai iya,
19 apai indai iya patut mai iya betemu enggau bala tuai ba pintu penama kuta sida.
20 Seduai iya patut madah ngagai bala tuai ba kuta nya: ‘Anak kami duai tu degil, udu ngelaban, lalu enggai ngasika jaku kami duai. Iya bam sereta udu mabuk.’
21 Udah nya, semua orang ba kuta nya mesti nikau iya ngena batu sampai iya mati. Kita mesti muai utai ti jai ari bala kita. Semua orang Israel deka ninga pasal nya lalu nyadi takut.
22 “Enti bisi orang udah ngereja dosa ke tau ngujungka iya diukum mati, lalu pengudah iya dibunuh lalu bangkai iya digantung ba tiang,
23 bangkai iya enda tau ditejuka ba tiang semalam-malam nya. Bangkai iya mesti dikuburka ba hari nya mega, laban orang ke digantung ba tiang udah ditinggang sumpah Petara. Kita enda tau ngamahka menua ke diberi Petara kita, Jehovah, ngagai kita nyadika pesaka.
