Ulang Adat 22:1-30
22 “Enti kita meda sapi tauka bedus ari bala kita tesat, anang ngaga diri enda nemu. Tang, kita patut mulaika jelu nya ngagai bala kita ke ngempu jelu nya.
2 Tang, enti bala kita nya diau jauh tauka enti kita enda nemu sapa ke ngempu jelu nya, kita patut mai jelu nya ngagai rumah kita. Jelu nya deka mengkang enggau kita sampai orang ke ngempu jelu nya ngiga jelu iya. Udah nya, baru kita mulaika jelu nya ngagai orang nya.
3 Nya meh utai ke patut digaga kita lebuh kita tetemuka keledai, gari, tauka nama-nama utai ke enggi bala kita ke udah lenyau. Anang ninggalka utai nya pia aja.
4 “Enti kita meda keledai tauka sapi bala kita rebah ba jalai, anang ngelakka iya pia aja. Kita patut nulung bala kita nya ngangkatka jelu iya bediri baru.
5 “Sida ke indu enda tau ngena gari orang lelaki, lalu sida ke lelaki enda tau ngena gari orang indu. Jehovah, Petara kita, amat begedika orang ke ngereja utai ke baka nya.
6 “Lebuh kita benung bejalai, lalu kita tepedaka sarang burung ke bisi anak burung tauka telu burung, sekalika nya ba atas pun kayu tauka ba tanah, lalu indu burung benung meram telu iya tauka benung enggau bala anak iya, anang ngambi indu burung nya enggau anak iya sekali.
7 Kita patut ngelepaska indu burung nya, tang kitai tau ngambi anak burung nya. Enggau nya, kita ulih idup lama sereta lantang.
8 “Lebuh kita ngaga rumah, kita patut masang pagar ngelingi perabung rumah nya, ngambika kita sebilik enda berutang darah enti bisi orang labuh ari endur nya.
9 “Kita enda tau nanam dua bansa benih ba ladang anggur kita. Enti kita ngereja nya, semua asil ladang kita nya patut diserahka ngagai Langkau Sembiang.
10 “Anang ngasuh sapi enggau keledai begulai lebuh kita ngeradu tanah.
11 “Kita enda tau ngena gari ke digaga ari bulu bedus enggau linin ke ditenun begulai.
12 “Kita patut nyait ubung ke dibelit ba empat iti ujung kain ke dikena kita.
13 “Enti siku lelaki jadi enggau siku indu lalu ngereja pengawa seks enggau indu nya, tang udah nya lelaki nya enda sayauka indu nya agi,
14 lalu nuduh indu nya ngereja pengawa ke enda senunuh sereta ngenyaika nama indu nya enggau madahka: ‘Aku udah jadi enggau indu tu, tang lebuh aku tinduk* enggau iya, baru aku nemu iya ukai dara agi,’
15 apai indai indu nya patut betemu enggau bala tuai ba pintu penama kuta sida, lalu nunjukka bukti anak indu seduai iya agi dara.
16 Apai indu nya patut bejaku enggau bala tuai nya: ‘Aku udah ngasuh anak aku jadi enggau lelaki tu. Tang iya enda sayauka anak aku agi,
17 lalu nuduh anak aku ngereja utai ti enda senunuh. Iya madahka anak aku ukai dara agi. Tang, tu meh bukti ke nunjukka anak aku agi dara maya nya.’ Udah nya, apai indai indu nya patut ngerembaika kain ke nunjukka bukti anak seduai iya agi dara ba depan bala tuai kuta nya.
18 Bala tuai ba kuta nya mesti ngukum lelaki nya.
19 Sida mega deka ngasuh lelaki nya mayar 100 shekel* pirak. Udah nya, duit nya patut diberi ngagai apai indu nya, laban lelaki nya udah ngenyaika nama anak dara Israel. Indu nya deka mengkang nyadi bini lelaki nya. Seagi-agi lelaki nya idup, iya enda tau nyarakka indu nya.
20 “Tang, enti utai ke dituduh lelaki nya amat, lalu nadai bukti ke nunjukka indu nya dara,
21 bala tuai patut mai indu nya ngagai depan pintu rumah apai iya. Udah nya, orang ke ba kuta nya patut nikau indu nya ngena batu sampai iya mati, laban iya udah ngereja pengawa ti ngemaluka ba menua Israel. Iya udah ngereja ulah seks ti kamah lebuh iya diau ba rumah apai iya. Kita patut muai utai ti jai ari bala kita.
22 “Enti siku lelaki ngereja ulah seks ti kamah enggau bini orang bukai, seduai iya mesti diukum mati. Kita mesti muai utai ti jai ari Israel.
23 “Enti bisi siku indu dara udah betunang, lalu siku lelaki tetemuka indu nya ba kuta, lalu ngereja ulah seks ti kamah enggau indu nya,
24 kita patut mai seduai iya ke luar kuta lalu nikau seduai iya ngena batu sampai seduai iya mati. Indu nya mesti diukum mati, laban iya enda nyerauh minta tulung taja pan iya ba dalam kuta maya nya. Lelaki nya mega mesti diukum mati, laban iya udah ngemaluka bini orang bukai. Kita mesti muai utai ti jai ari bala kita.
25 “Tang, enti bisi siku indu dara udah betunang, lalu siku lelaki tetemuka indu nya ba luar kuta lalu ngerugul indu nya, semina lelaki nya aja ke patut diukum mati.
26 Indu nya enda diukum, laban iya enda ngereja dosa ke tau ngasuh iya diukum mati. Kes tu sebaka enggau lebuh sesiku orang nyerang orang bukai lalu munuh orang nya.
27 Lelaki nya tetemuka indu nya ba luar kuta. Indu nya udah nyerauh minta tulung, tang nadai orang ulih nyelamatka indu nya.
28 “Enti siku lelaki tetemuka siku indu dara ke bedau betunang, lalu ngerugul indu nya, lalu pengawa seduai iya ditemu orang,
29 lelaki nya patut meri 50 shekel pirak ngagai apai indu nya, lalu indu nya deka nyadi bini iya. Nya ketegal iya udah ngemaluka indu nya. Seagi-agi iya idup, iya enda tau nyarakka indu nya.
30 “Nadai siku pan tau ngambi bini apai iya nyadika bini iya empu, laban pengawa nya ngemaluka apai iya.
