Ulang Adat 23:1-25
23 “Lelaki ke udah pechah telu* tauka ke udah dibuai perengka seks, enda tau nyadi sebagi ari raban gempuru* Jehovah.
2 “Orang ke ada luar nikah enda tau nyadi sebagi ari raban gempuru Jehovah. Semua peturun iya nyentuk ngagai generasi* ke-10, enda tau nyadi sebagi ari raban gempuru Jehovah.
3 “Orang Amon enggau orang Moap enda tau nyadi sebagi ari raban gempuru Jehovah. Semua peturun sida nyentuk ngagai generasi ke-10, enda tau nyadi sebagi ari raban gempuru Jehovah.
4 Tu ketegal sida enda meri kita pemakai enggau ai irup lebuh kita ba rantau jalai pansut ari menua Ejip. Pia mega, sida ngaji Balam anak Beor, ari Petor ba Mesopotamia, kena nyumpah kita.
5 Tang Petara kita, Jehovah, enggai mendingka Balam. Jehovah, Petara kita, ngubah sumpah nya nyadi berekat, laban Jehovah rinduka kita.
6 Seagi-agi kita idup, kita anang nulung sida ngulihka pengaya sereta idup lantang.
7 “Anang begedika orang Edom, laban sida menyadi kita empu.
“Anang begedika orang Ejip, laban kita kala nyadi orang asing ba menua sida.
8 Bala ichit sida, iya nya generasi sida ti ketiga, tau nyadi sebagi ari raban gempuru Jehovah.
9 “Lebuh kita nirika kem laban deka beperang ngelaban munsuh kita, kita mesti nyeliahka nama-nama utai ti jai.*
10 Enti siku lelaki nyadi enda tuchi ketegal iya mansutka ai mani maya malam hari, iya mesti pansut ari kem. Iya enda tau tama ngagai kem.
11 Lebuh hari nyau lemai, iya patut mandi. Lalu pengudah mata panas padam, iya ulih pulai baru ngagai kem.
12 Kita mesti nyediaka siti endur ba luar kem alai kita bira.
13 Lebuh kita deka bira, kita mesti mai sekup mit. Kita mesti ngena sekup nya kena numbak tanah, lalu udah nya ngelamun tai kita.
14 Jehovah, Petara kita, bisi enggau kita kena nyelamatka kita sereta ngalahka bala munsuh kita. Nya alai, kem kita mesti kudus ngambika Iya enda meda nama-nama utai ti enda kudus ba bala kita lalu ninggalka kita.
15 “Enti siku ulun ngerarika diri ari tuan iya lalu datai ngagai kita, anang nyerahka iya ngagai tuan iya.
16 Ulun nya ulih diau enggau kita ba sebarang kuta ke dipilih iya. Anang jai enggau iya.
17 “Semua orang Israel, enda ngira lelaki tauka indu, enda tau nyadi pelacur kuil.
18 Kita enda tau mai duit ke dibayar ngagai pelacur lelaki* tauka pelacur indu kena ngamatka semaya ba rumah Jehovah, laban Petara kita, Jehovah, amat begedika kedua-dua utai nya.
19 “Kita enda tau minta bungai duit lebuh kita nyali utai ngagai bala kita ke bukai, enda ngira nya duit, pemakai, tauka nama-nama utai bukai.
20 Kita tau minta bungai duit ari orang asing. Tang, kita enda tau minta bungai duit ari bala kita ke bukai. Enggau nya, Petara kita, Jehovah, deka merekatka semua utai ti dikereja kita ba menua ti deka diempu kita.
21 “Enti kita ngaga semaya enggau Petara kita, Jehovah, anang laun ngamatka semaya nya. Jehovah, Petara kita, dekaka kita ngamatka semaya kita. Kita bedosa enti kita enda ngamatka semaya diri.
22 Tang, kita enda bedosa enti kita nadai ngaga semaya ngagai Petara.
23 Kita mesti ngamatka utai ke udah disebut kita sereta ngereja semua utai ke udah disemaya kita ngagai Petara kita, Jehovah. Nya deka nyadi pemeri sukarela.
24 “Enti kita bejalai ngagai ladang anggur orang bukai, kita tau makai buah anggur naka ti ulih diempa kita. Tang, kita enda tau ngumpul lalu nyimpan buah anggur nya ke dalam bakul kita.
25 “Enti kita bejalai ngagai ladang bijirin orang bukai, kita tau matahka tangkai bijirin ke udah mansau lalu makai bijirin nya. Tang, kita enda tau mutung tangkai bijirin nya ngena sabit.
Nota Kaki
^ Tauka “telu pelir.”
^ Peda Penerang Leka Jaku.
^ Tauka “serak.”
^ Tauka “enda tuchi.”
^ Jaku Asal, “ukui.”
