Ulang Adat 25:1-19
25 “Enti bisi dua iku orang belaya, seduai iya patut betemu enggau bala hakim. Udah nya, bala hakim deka ngakim seduai iya. Iya ke manah deka dikumbai enda salah, tang iya ke jai deka dikumbai salah.
2 Enti orang ke jai nya patut disipat, hakim deka ngasuh orang nya ningkap, lalu orang nya patut disipat ba depan hakim. Penyampau iya disipat patut setimpal enggau penyai ke udah digaga iya.
3 Iya tau disipat 40 kali. Anang nyipat iya lebih ari nya, laban enti iya disipat lebih ari nya, nya deka ngemaluka iya ba depan orang mayuh.
4 “Anang mampul mulut sapi lelaki lebuh sapi nya benung ngindik gandum.
5 “Enti bisi sekeda diri menyadi ke diau semak enggau pangan diri, lalu siku ari sida mati lalu nadai anak lelaki, balu iya enda tau jadi enggau orang bukai ke ukai ari ruang bilik laki iya ke udah nadai. Ipar balu nya patut betemu enggau balu nya lalu jadi enggau balu nya, laban nya tanggungjawap iya ke nyadi ipar balu nya.
6 Anak tuai lelaki ke diadaka balu nya deka dikumbai anak laki iya ke udah nadai, ngambika nama laki iya ke udah nadai nya enda lenyau ari bansa Israel.
7 “Tang enti ipar balu nya enggai jadi enggau iya, balu nya patut betemu enggau bala tuai ba pintu penama kuta lalu madah: ‘Menyadi niang laki aku, enggai jadi enggau aku. Iya enggai ngereja tanggungjawap iya ke nyadi ipar aku. Nya alai, nama niang laki aku deka lenyau ari bansa Israel.’
8 Bala tuai kuta patut ngangauka ipar balu nya, lalu bejaku enggau iya. Tang enti iya agi ga degil lalu madah: ‘Aku enggai jadi enggau balu nya,’
9 balu nya patut datai semak ngagai ipar iya ba depan bala tuai. Udah nya, balu nya patut muka siti ari selipar ipar iya, ngeludah mua ipar iya, lalu madah: ‘Tu meh utai ke patut digaga ngagai orang ke enggai meri peturun ngagai menyadi iya empu.’
10 Udah nya, ba serata menua Israel, ruang bilik ipar balu nya deka dikumbai ‘Ruang bilik orang ke udah dibuka selipar.’
11 “Enti bisi dua iku lelaki belaya, lalu siku bini ari siku lelaki nya nguji ngelindung laki iya enggau chara nyangkam perengka seks lelaki ke belaya enggau laki iya nya,
12 kita patut netak jari indu nya. Anang kasihka iya.
13 “Anang nyimpan dua bansa batu penimbang ba dalam beg duit kita, iya nya siti ke besai enggau siti ke mit.
14 Anang nyimpan dua bansa utai kena nakar* ba rumah kita, iya nya siti ke besai enggau siti ke mit.
15 Kita patut ngena penimbang enggau bakul kena nakar ti betul. Enggau nya, kita deka idup lama ba menua ke deka diberi Petara kita, Jehovah, ngagai kita.
16 Jehovah, Petara kita, amat begedika orang ke enda jujur.
17 “Kingatka utai ke udah dikereja orang Amalek ngagai kita lebuh kita pansut ari menua Ejip.
18 Sida enda nangika Petara. Sida nyerang bala kita ke tinggal ba belakang lebuh kita lelak sereta lemi maya bejalai.
19 Pengudah Petara kita, Jehovah, udah ngasuh kita likun ari bala munsuh ke ngelingi kita, ba menua ke diberi Petara kita, Jehovah, ngagai kita nyadika pesaka, kita mesti ngemunaska orang Amalek ngambika sida enda dikingatka agi. Anang enda ingat ngereja nya.
Nota Kaki
^ Peda Rujukan B14.
