Ulang Adat 26:1-19
26 “Pengudah kita tama ngagai menua ke diberi Petara kita, Jehovah, ngagai kita nyadika pesaka, lalu kita udah nguasa menua nya lalu diau ba dia,
2 kita patut ngumpul sekeda asil ti keterubah ari semua utai ke ditanam kita ari menua ke diberi Petara kita, Jehovah, ngagai kita. Udah nya, kita patut nyimpan semua utai nya dalam bakul lalu mupuk ngagai endur ke udah dipilih Jehovah, Petara kita, kena ngemuliaka nama Iya.
3 Kita mesti betemu enggau imam ke gawa maya nya lalu madah ngagai iya: ‘Seharitu aku deka beterima kasih ngagai Petara kitai, Jehovah, laban aku udah diau ba menua ke diberi Jehovah ngagai kitai, baka ke udah disemayaka Iya ngagai aki ini kitai.’
4 “Udah nya, imam deka ngambi bakul nya ari kita lalu ngengkahka bakul nya ba depan alta, Jehovah, Petara kita.
5 Udah nya, ba depan Jehovah, Petara kita, kita patut bejaku munyi tu: ‘Aki aku nya orang Aram ke suah mindah kin kia.* Iya udah ngagai menua Ejip, lalu diau dia nyadi orang asing begulai enggau ruang bilik iya. Maya nya, penyampau sida mimit. Tang udah nya, sida nyadi siti bansa ti besai sereta kering.
6 Orang Ejip kejam enggau kami sereta ngasuh kami idup merinsa. Sida maksa kami nyadi ulun sida.
7 Nya alai, kami ngangauka Jehovah, Petara aki ini kami. Jehovah mendingka kami lalu meda pemedis, penusah, enggau pemerinsa kami.
8 Jehovah udah ngena jari Iya ti kering sereta bekuasa mai kami pansut ari menua Ejip. Iya mega ngena mayuh tanda, utai ti luar biasa, enggau utai ti balat ngenakutka.
9 Udah nya, Iya mai kami ngagai menua tu lalu meri kami menua tu, iya nya menua ke kaya enggau ai tusu sereta madu.
10 Diatu, aku mai asil ti keterubah ari semua utai tanam aku ti udah diberi Jehovah ngagai aku.’
“Kita mesti ngengkahka bakul nya ba depan Jehovah, Petara kita, lalu besugang ba depan Jehovah, Petara kita.
11 Kita mesti gaga ati ke semua pemanah ti diayanka Petara kita, Jehovah, ngagai kita enggau ruang bilik kita, enggau orang Lewi, sereta orang asing ke diau enggau kita.
12 “Tiap kali kita abis ngumpul 10 peratus ari semua utai ke diketau kita ba taun ti ketiga, kita mesti meri utai nya ngagai orang Lewi, orang asing, anak ke nadai apai,* enggau sida ke balu ke diau ba kuta kita. Sida deka makai sampai sida kenyang.
13 Udah nya, ba depan Petara kita, Jehovah, kita patut bejaku munyi tu: ‘Aku udah mindahka utai ti kudus ari rumah aku, lalu meri semua utai nya ngagai orang Lewi, orang asing, anak ke nadai apai, enggau sida ke balu, baka ke udah diasuh Nuan. Aku ibuhka pesan Nuan, lalu enda ngelanggar iya.
14 Aku enda makai utai nya lebuh aku tusah ati, tauka negu utai nya lebuh aku enda tuchi, tauka meri utai nya ngagai orang ke udah mati. Aku ngasi sereta ngereja semua utai ke diasuh Jehovah, Petara aku.
15 Ari endur alai Nuan diau ti kudus ba serega, palik meh ke baruh lalu berekatka nembiak Nuan, orang Israel, enggau menua ke kaya enggau ai tusu sereta madu tu, iya nya menua ke udah diberi Nuan ngagai kami, baka ke udah disemayaka Nuan ngagai aki ini kami.’
16 “Seharitu, Petara kita, Jehovah, ngasuh kita nitihka atur enggau adat ke udah diberi Iya. Kita mesti ngasika semua nya enggau pengabis ati kita sereta enggau pengabis pengidup kita.
17 Seharitu, Jehovah udah madah ngagai kita, Iya deka nyadi Petara kita seagi-agi kita nitihka jalai Iya, ngasika pesan, atur, adat, sereta mendingka jaku Iya.
18 Seharitu mega, kita udah ngaku ba depan Jehovah, kita deka ngasika semua pesan Iya. Nya alai, kita deka nyadi bansa Iya ti istimewa,* baka ke udah disemayaka Iya ngagai kita.
19 Enti kita nunjukka diri nembiak Jehovah ti kudus, Iya deka ngasuh kita bulih penuduk ti tinggi agi ari bansa ke bukai. Iya mega deka ngasuh kita dipuji, dimuliaka, sereta dipebasa, baka ke udah disemayaka Iya.”
Nota Kaki
^ Tauka engka, “ke nyauka lenyau nyawa.”
^ Tauka “anak yatim.”
^ Tauka “bansa ti berega ba Iya.”
