Ulang Adat 27:1-26
27 Udah nya, Moses enggau bala tuai orang Israel bediri ba depan semua orang Israel. Ku Moses bejaku: “Titihka semua pesan ke dipadahka aku ngagai kita seharitu.
2 Pengudah kita meraka Sungai Jordan, lalu datai ba menua ke diberi Petara kita, Jehovah, ngagai kita, kita patut nirika beberapa igi batu ti besai, lalu semua batu nya patut diplaster.*
3 Udah nya, tuliska semua utai ke dipadah dalam Adat nya ba semua batu nya ngambika kita ulih tama ngagai menua ke diberi, Jehovah, Petara kita, ngagai kita, iya nya menua ke kaya enggau ai tusu sereta madu, baka ke udah disemaya Jehovah, Petara aki ini kita.
4 Pengudah kita meraka Sungai Jordan, kita patut nugungka beberapa igi batu ti besai ba Gunung Ebal, lalu ngelapis batu nya ngena plaster baka ke diasuh aku kereja kita seharitu.
5 Ba dia mega, kita patut ngaga siti alta ari batu ke Jehovah, Petara kita. Lebuh kita ngaga alta nya, kita enda tau ngena nama-nama utai ke digaga ari besi.
6 Kita enda tau mutung batu ke dikena kita ngaga alta ke Jehovah, Petara kita. Kita mesti nyerahka pemeri tunu ngagai Jehovah, Petara kita, ba alta nya.
7 Kita mega mesti nyerahka pemeri bebaik, lalu makai iya ba dia. Kita mesti gaga ati ba depan Jehovah, Petara kita.
8 Kita mesti nuliska semua utai ke dipadah dalam Adat tu enggau terang ba semua batu nya.”
9 Udah nya, Moses enggau bala imam Lewi bejaku ngagai semua orang Israel. Ku Moses: “Dinga kita orang Israel, seharitu kita udah nyadi nembiak Jehovah, Petara kita.
10 Kita mesti ngasika Jehovah, Petara kita, lalu nitihka semua pesan enggau atur ari Iya ke dipadahka aku ngagai kita seharitu.”
11 Udah nya, Moses madahka pesan tu ngagai orang Israel:
12 “Pengudah kita meraka Sungai Jordan, tu raban bansa ke mesti bediri ba Gunung Gerisim lebuh jaku berekat disebut: Raban bansa Simion, Lewi, Judah, Isakar, Josep, enggau Benjamin.
13 Tu raban bansa ke deka bediri ba Gunung Ebal lebuh jaku sumpah disebut: Raban bansa Reuben, Gat, Aser, Sebulun, Dan, enggau Naptali.
14 Udah nya, orang Lewi deka nyebut utai tu enggau nyawa ti inggar ngagai semua orang Israel:
15 “‘Tulah meh orang ke belalai ngaga patung. Jehovah amat begedika utai ke baka nya.’ (Semua orang Israel deka nyebut: ‘Amin!’*)
16 “‘Tulah meh orang ke ngemaruhka apai indai diri.’ (Semua orang Israel deka nyebut: ‘Amin!’)
17 “‘Tulah meh orang ke mindahka tanda sempadan tanah orang bukai.’ (Semua orang Israel deka nyebut: ‘Amin!’)
18 “‘Tulah meh orang ke ngasuh orang buta tesat ba jalai.’ (Semua orang Israel deka nyebut: ‘Amin!’)
19 “‘Tulah meh orang ke enda adil ngagai orang asing, anak ke nadai apai,* tauka sida ke balu.’ (Semua orang Israel deka nyebut: ‘Amin!’)
20 “‘Tulah meh orang ke ngereja pengawa seks enggau bini apai iya, laban nya deka ngemaluka apai iya empu.’ (Semua orang Israel deka nyebut: ‘Amin!’)
21 “‘Tulah meh orang ke ngereja pengawa seks enggau jelu.’ (Semua orang Israel deka nyebut: ‘Amin!’)
22 “‘Tulah meh orang ke ngereja pengawa seks enggau menyadi indu iya, enda ngira iya anak indu apai iya tauka anak indu indai iya.’ (Semua orang Israel deka nyebut: ‘Amin!’)
23 “‘Tulah meh orang ke ngereja pengawa seks enggau entua indu diri empu.’ (Semua orang Israel deka nyebut: ‘Amin!’)
24 “‘Tulah meh orang ke ngenyit nyerang lalu munuh orang bukai.’ (Semua orang Israel deka nyebut: ‘Amin!’)
25 “‘Tulah meh orang ke nerima duit kena munuh orang bukai ke nadai penyalah.’ (Semua orang Israel deka nyebut: ‘Amin!’)
26 “‘Tulah meh orang ke enggai nitihka sereta enggai bepegai rat ba semua utai ke ditulis dalam Adat tu.’ (Semua orang Israel deka nyebut: ‘Amin!’)
Nota Kaki
^ Semua batu nya dilapis enggau utai ke digaga ari batu kapur, batu karang, tauka kulit lukan.
^ Tauka “Awakka nya nyadi!”
^ Tauka “anak yatim.”
