Ulang Adat 28:1-68
28 “Enti kita bebendar ngasika Petara kita, Jehovah, lalu enti kita nitihka semua pesan Iya ke dipadahka aku ngagai kita seharitu, Petara kita, Jehovah, tentu deka ngasuh kita bulih penuduk ti tinggi agi ari bansa ke bukai.
2 Enti kita ngasika Jehovah, Petara kita, Iya deka meri kita semua berekat tu:
3 “Lebuh kita ba kuta sereta lebuh kita ba ladang, kita deka diberekat.
4 “Bala anak kita, utai tanam, sereta jelu tupi, nyengkaum sapi enggau bedus kita deka diberekat.
5 “Bakul enggau mangkuk adunan kita deka diberekat.
6 “Enda ngira kini ke penunga kita sereta enda ngira nama pengawa ke dikereja kita, kita deka diberekat.
7 “Jehovah deka ngalahka bala munsuh ke nyerang kita. Sida beserakup deka nyerang kita, tang udah nya sida deka ngachir rari.
8 Semua setor alai nyimpan pemakai kita enggau semua pengawa ke dikereja kita deka diberekat Jehovah. Jehovah, Petara kita, tentu deka merekatka kita ba menua ke deka diberi Iya ngagai kita.
9 Enti kita seruran ngasika pesan Jehovah, Petara kita, lalu nitihka jalai Iya, Jehovah deka ngasuh kita nyadi nembiak Iya ti kudus baka ke udah disemayaka Iya ngagai kita.
10 Semua bansa ba dunya deka nemu kita nembiak ke dikangau ngena nama Jehovah, lalu sida deka takutka kita.
11 “Jehovah deka ngasuh kita bulih mayuh anak, utai tanam, sereta jelu tupi ba menua ke deka diberi Jehovah ngagai kita, baka ke udah disemayaka Iya ngagai aki ini kita.
12 Baka siku lelaki ke muka setor iya ke penuh enggau barang, Jehovah deka muka langit lalu ngasuh ujan labuh ba musin iya, lalu merekatka semua utai ke dikereja kita. Kita deka nyali utai ngagai mayuh macham bansa, tang kita empu enda ibuh nginjau nama-nama utai ari sapa-sapa.
13 Enti kita seruran ngasi sereta ngereja semua pesan ke diasuh Jehovah, Petara kita, ke dipadahka aku ngagai kita seharitu, Jehovah deka ngasuh kita bulih mulia, lalu bansa bukai enda nguasa kita. Kita deka bulih penuduk ti tinggi agi ari bansa bukai, lalu kita deka seruran mujur sereta idup lantang.
14 Anang limpang ari semua pesan ke dipadahka aku ngagai kita seharitu, sekalika ke kiba tauka ke kanan, lalu anang nyembah petara bukai.
15 “Tang enti kita enggai ngasika Jehovah, Petara kita, lalu enggai nitihka semua adat enggau pesan Iya ke dipadahka aku ngagai kita seharitu, Iya deka ngasuh semua penulah tu ninggang kita:
16 “Tulah meh kita lebuh kita ba kuta sereta lebuh kita ba ladang.
17 “Tulah meh bakul enggau mangkuk adunan kita.
18 “Tulah meh bala anak kita, utai tanam, sereta jelu tupi, nyengkaum sapi enggau bedus kita.
19 “Tulah meh kita enda ngira kini ke penunga kita sereta enda ngira nama pengawa ke dikereja kita.
20 “Jehovah deka ngenataika penulah enggau penyarut ba semua utai ke dikereja kita. Iya deka ngukum kita nyentukka kita dipunaska enggau jampat, laban kita udah ngereja utai ti jai lalu ninggalka Iya.
21 Jehovah deka ngenataika penyakit ti balat ngagai kita nyentukka kita dipunaska ari menua ke deka diempu kita nya.
22 Jehovah deka ngukum kita ngena mayuh macham bansa penyakit, baka penyakit tibi,* demam panas, radang,* sereta balat angat. Iya mega deka ngasuh kita diserang bala munsuh. Iya deka ngenataika angin ti angat, lalu ngasuh semua utai ke ditanam kita mati magang. Semua penulah tu deka ninggang kita nyentukka kita mati.
23 Langit kita deka nyadi baka temaga, lalu tanah kita deka nyadi baka besi.
24 Jehovah deka ngasuh pasir enggau debu labuh baka ujan ninggang menua kita, nyentukka kita dipunaska.
25 Jehovah deka ngasuh kita dialahka bala munsuh kita. Kita deka beserakup nyerang sida, tang udah nya kita empu ke deka ngachir rari. Semua perintah ba dunya deka berasai takut lebuh meda utai ke nyadi ba kita.
26 Bangkai kita deka diempa burung ba langit enggau jelu ba darat, lalu nadai orang muru sida.
27 “Jehovah deka ngasuh kita kena pisa ke kala nyadi ba orang Ejip, buasir, gatal kulit, enggau kurap. Semua penyakit nya enda ulih digeraika.
28 Jehovah deka ngasuh kita gila, buta, enggau bingung.
29 Kita deka gama-gama maya siang hari baka orang buta ke gama-gama dalam pemetang. Kita enda ulih mujur dalam semua utai ke dikereja kita. Kita mega deka seruran ditipu sereta dirumpak, lalu nadai orang deka nulung kita.
30 Kita betunang enggau indu, tang lelaki bukai deka ngerugul indu nya. Kita deka ngaga rumah, tang kita enda diau ba rumah nya. Kita deka nanam anggur, tang kita enda makai asil iya.
31 Sapi kita deka disayat ba depan kita, tang kita enda makai dagin sapi kita. Keledai kita deka dichuri ba depan kita, lalu keledai nya enda dipulaika ngagai kita. Bedus kita deka diambi bala munsuh kita, tang nadai orang ke deka nulung kita.
32 Bala anak kita deka diserahka ngagai bansa bukai ba depan kita. Kita deka seruran lelengauka sida, tang kita enda ulih ngereja nama-nama utai.
33 Asil tanah kita enggau semua utai ke diasilka kita deka diempa orang ke enda dikelala kita. Kita deka seruran ditipu sereta diperinsa.
34 Kita deka nyadi gila ketegal meda semua utai ke nyadi ba kita.
35 “Jehovah deka ngukum kita ngena pisa ti balat pedis ba patung enggau ba kaki kita. Pisa nya enda ulih diubat. Pisa nya bisi ba semua tubuh kita ari tapa kaki sampai punjung pala kita.
36 Jehovah deka muru kita enggau raja ke dilantik kita ngagai menua ke enda ditemu kita tauka aki ini kita. Ba din, kita deka nyembah petara bukai ke digaga ari kayu enggau batu.
37 Lebuh Jehovah muru kita ngagai menua nya, semua orang ke diau ba dia deka takut meda pendiau kita. Sida deka ngemaruhka kita sereta ngeleseka kita.
38 “Kita deka nabur mayuh leka benih, tang asil iya mimit aja laban diempa buntak.
39 Kita deka nanam anggur lalu ngintu ladang anggur nya, tang kita enda ngirup wain tauka bulih nama-nama asil, laban pun anggur kita diempa ulat.
40 Kita deka bisi mayuh pun kayu kana ba serata menua kita, tang kita nadai bulih minyak kana ke dikena ngunsut tubuh diri, laban semua buah kana kita deka rarah magang.
41 Kita deka bisi anak lelaki enggau anak indu, tang sida enda ulih mengkang begulai enggau kita, laban sida deka dibai nyadi orang tangkap.
42 Bala raban indu utai deka makai semua bansa pun kayu enggau utai ke ditanam kita.
43 Orang asing ke diau enggau kita deka majak bekuasa, tang kita deka majak lemi.
44 Sida deka nyali utai ngagai kita, tang kita nadai utai ke ulih dijali ngagai sida. Sida deka nyadi ketuai kita, lalu kita deka nitihka sida.
45 “Semua penulah nya tentu deka ninggang kita, lalu kita enda ulih ngerarika diri ari semua penulah nya nyentukka kita punas. Nya ketegal kita enda ngasika Jehovah, Petara kita, lalu enda nitihka semua adat enggau pesan Iya.
46 Semua penulah nya deka ninggang kita enggau semua peturun kita. Semua nya deka nyadi amaran ngagai semua orang belama iya,
47 laban taja pan kita udah diberekat dalam semua utai, tang kita agi enda nyembah Petara kita, Jehovah, enggau ati ti gaga sereta lantang.
48 Jehovah deka ngasuh bala munsuh kita nyerang sereta nguasa kita. Kita deka berasai lapar, aus, nadai gari, sereta suntuk semua utai lebuh kita nyadi ulun sida. Kita deka balat diperinsa* nyentukka kita mati.
49 “Jehovah deka ngasuh siti bansa ke diau jauh ba ujung dunya datai nyerang kita, iya nya siti bansa ke enda ditemu kita bansa jaku sida. Sida deka nyambar kita baka burung menaul ke nyambar mansa iya.
50 Sida bansa ti ganas sereta kejam. Sida nadai kasihka orang ke tuai tauka orang ke biak.
51 Sida deka makai jelu tupi kita sereta asil utai ke ditanam kita nyentukka kita punas. Sida nadai ninggalka bijirin, minyak, wain ti baru, anak sapi, tauka anak bedus ke kita nyentukka sida ngemunaska kita.
52 Sida deka ngelulung semua kuta ba menua ke diberi Petara kita, Jehovah, ngagai kita, nyentukka dinding kuta kita ti tinggi sereta teguh runtuh magang. Sida tentu deka ngelulung kita ba semua kuta ke diberi Iya nya.
53 Ketegal bala munsuh kita balat nyerang sereta nekan kita, kita terpaksa makai anak kita empu, iya nya anak ke diberi Jehovah, Petara kita.
54 “Lelaki ke nelap sereta ke teleba idup nyamai pan, enda kasihka bala menyadi iya empu, tauka bini ke dikesayauka iya, tauka bala anak iya ke agi idup.
55 Iya deka makai anak iya empu, lalu iya enggai bekunsika dagin anak iya enggau orang bukai ketegal nadai pemakai, sereta ketegal iya balat diserang sereta ditekan bala munsuh ba kuta kita.
56 Indu ke nelap sereta ke teleba idup nyamai, lalu enda kala ngindikka kaki iya ngagai tanah pan, enda kasihka laki ke dikesayauka iya tauka bala anak iya.
57 Iya deka belalai makai anak iya empu, indah makai temuni anak iya empu,* ketegal iya balat diserang sereta ditekan bala munsuh ba kuta kita.
58 “Enti kita enda ngasika utai ke dipadah ba Adat ke ditulis dalam bup tu, lalu enti kita enda bebasaka nama Petara kita ti mulia sereta ngalitka ati, iya nya Jehovah,
59 Jehovah deka ngukum kita ngena penulah ti balat ngagai kita enggau peturun kita. Iya mega deka ngasuh penyakit ti balat sereta enda ulih digeraika ninggang kita enggau peturun kita.
60 Iya deka ngenataika semua penyakit ke diketakutka kita ba Ejip suba. Kita enda ulih gerai ari semua penyakit nya.
61 Jehovah mega deka ngenataika mayuh macham penyakit sereta penulah ke enda kala ditulis dalam bup Adat tu nyentukka kita dipunaska.
62 Taja pan penyampau kita udah ngemayuh bintang ba langit, tang semina mimit aja ari bala kita ke deka idup, laban kita enda ngasika Petara kita, Jehovah.
63 “Baka Jehovah ke berasai gaga ati ngasuh kita idup lantang sereta nambahka penyampau kita, Jehovah mega deka berasai gaga ati lebuh ngemunaska kita. Kita deka diburu ari menua ke deka diempu kita.
64 “Jehovah deka ngasuh kita ngachir ngagai semua bansa, ari ujung dunya siti ngagai ujung dunya ke bukai. Ba din, kita terpaksa nyembah petara ke digaga ari kayu enggau batu, iya nya petara ke enda dikelala kita tauka aki ini kita.
65 Lebuh kita begulai enggau semua bansa nya, kita nadai pengelantang tauka nadai tempat alai berehat. Jehovah deka ngasuh kita irau, putus asa, sereta ngasuh mata kita kabur.
66 Siang malam kita deka berasai takut. Pengidup kita seruran dalam bahaya, lalu kita enda nemu sekalika kita deka selamat tauka enda.
67 Maya siang hari, kita deka nyebut: ‘Endaka manah enti diatu malam!’ Lalu maya malam hari, kita deka nyebut: ‘Endaka manah enti diatu siang!’ Kita deka seruran berasai takut ketegal meda semua utai ke nyadi ba kita.
68 Jehovah tentu deka mai kita pulai baru ngagai menua Ejip ngena kapal, taja pan aku kala madah: ‘Kita nadai meda menua nya agi.’ Ba din, kita terpaksa nyual diri nyadi ulun ngagai bala munsuh kita, tang nadai orang ke deka meli kita.”
Nota Kaki
^ Tauka “batuk rangkai.”
^ Iya nya, kembai ba sekeda begian tubuh.
^ Tauka “Sida deka ngengkahka tangkun besi ba rekung kita.”
^ Tauka “indah makai nama-nama utai ke pansut ari sarang anak iya lebuh iya ngadaka anak iya.”
