Ulang Adat 29:1-29
29 Kelimpah ari ngaga sempekat enggau orang Israel ba Horeb, Jehovah mega ngasuh Moses ngaga siti agi sempekat enggau sida ba Moap.
2 Moses ngangauka orang Israel lalu ngasuh sida begempuru. Ku Moses bejaku ngagai sida: “Ba Ejip, kita udah meda utai ke digaga Jehovah ngagai Firaun, semua bala pegawai iya, enggau serata menua iya.
3 Kita empu udah meda Petara ngukum sida ngena mayuh tanda sereta utai ti luar biasa.
4 Tang nyentukka seharitu, Jehovah bedau meri kita ati ke ulih meretika utai, mata ke ulih meda, sereta pending ke ulih ninga.
5 ‘Pengelama 40 taun Aku ngiring kita ba menua puang, lalu sepemanjai timpuh nya, gari enggau selipar ke dikena kita enda jai.
6 Kita nadai makai roti, nadai ngirup wain, tauka ai bisa ke bukai, tang Aku agi ibuhka kita ngambika kita nemu, Aku tu Jehovah, Petara kita.’
7 Lebuh kita datai ba endur tu, Raja Sihon ari Hesbon enggau Raja Og ari Basan datai nyerang kita, tang kita ngalahka sida.
8 Udah nya, kita ngambi menua sida lalu meri menua nya ngagai raban bansa Reuben, raban bansa Gat, enggau setengah ari raban bansa Manasi nyadika pesaka.
9 Nya alai, titihka semua utai ke dipadah dalam sempekat tu ngambika kita mujur dalam semua utai ke dikereja kita.
10 “Seharitu, semua kita bediri ba depan Jehovah, Petara kita, enda ngira kita nya tuai raban bansa, bala tuai, bala pegawai, bala lelaki Israel,
11 bala anak, bala bini, sereta orang asing ke diau ba kem orang Israel, nyengkaum orang ke ngumpul kayu enggau orang ke nyauk ai.
12 Kita begempuru ba ditu kena nunjukka diri setuju enggau sempekat ke digaga Jehovah enggau kita ngena jaku sumpah, iya nya sempekat ke digaga Petara kita, Jehovah, enggau kita seharitu.
13 Enggau nya, Iya nyadi Petara kita lalu kita nyadi nembiak Iya, baka ke udah disemayaka Iya ngagai kita sereta ngagai aki ini kita, iya nya Abraham, Isak, enggau Jakop.
14 “Sempekat ke digaga enggau jaku sumpah tu ukai digaga enggau kita aja,
15 ke bediri ba depan Jehovah, Petara kita, seharitu. Tang mega enggau bala peturun kita ke jemah ila.*
16 (Kita tentu nemu baka ni pengidup kita ba menua Ejip suba sereta baka ni kita bejalai nengah menua orang bansa bukai.
17 Kita udah meda patung ke digaga sida ke dipegedika* Petara, ke digaga ari kayu, batu, pirak, enggau emas.)
18 Bejimat ngambika nadai siku pan ari bala kita, enda ngira lelaki tauka indu, diri sebilik, tauka raban bansa kita, limpang ari Jehovah, Petara kita, lalu nyembah petara orang bansa bukai. Orang ke baka nya baka urat ari utai tumbuh ke pait sereta berachun.
19 “Tang, enti bisi orang ninga jaku sumpah nya lalu enggau sumbung bejaku dalam ati diri: ‘Nadai utai jai nyadi ba aku taja pan aku bekeras ngereja utai nitihka peneka ati aku,’ lalu pengawa iya nya ngenusahka iya empu sereta orang bukai,
20 Jehovah enggai sekali-kali ngampunka iya. Jehovah deka balat ringat ngagai iya, lalu semua penulah ke ditulis dalam bup tu tentu deka ninggang iya. Jehovah mega deka muai nama iya ari dunya.
21 Jehovah deka nyeraraka iya ari semua raban bansa orang Israel, lalu ngenataika penusah ngagai iya nitihka semua penulah ke ditulis dalam bup Adat tu.
22 “Bala peturun kita ke jemah ila enggau orang asing ari menua ti jauh, deka meda semua penulah enggau bencana ti dikenataika Jehovah ngagai menua kita.
23 Iya deka ngasuh menua kita ditunu sereta dilamun garam enggau merirang, nyentukka tanah ba menua kita enda ulih alai nanam nama-nama utai, baka ke nyadi ba Sodom, Gomorah, Admah, enggau Seboim, ke udah dianchurka Jehovah ketegal Iya balat ringat.
24 Bala peturun kita, orang asing, enggau semua orang bansa bukai deka nanya: ‘Nama kebuah Jehovah ngereja utai baka nya ngagai menua tu? Nama utai ke ngasuh Iya balat ringat?’
25 Udah nya, orang deka nyaut: ‘Tu ketegal sida udah ngelanggar sempekat enggau Jehovah, Petara aki ini sida. Iya udah ngaga sempekat nya enggau sida lebuh Iya mai sida pansut ari menua Ejip.
26 Tang, sida nyau nyembah sereta besugang ngagai petara bukai, iya nya petara ke enda dikelala sida sereta ke enda diasuh Iya sembah sida.*
27 Nya alai, Jehovah balat ringat ngagai menua nya lalu ninggang menua nya ngena semua penulah ti ditulis dalam bup tu.
28 Ketegal Jehovah balat ringat, Iya nyabut sida ari menua nya lalu muai sida ngagai menua bukai, iya nya endur sida diau diatu.’
29 “Jehovah, Petara kita, nemu semua resia. Tang, Iya udah mandangka mayuh pekara nitihka peneka Iya ngagai kita sereta ngagai bala peturun kita belama iya, ngambika kita ulih nitihka semua utai ke dipadah dalam Adat tu.
Nota Kaki
^ Jaku Asal, “enggau semua orang ke nadai ba ditu enggau kita seharitu.”
^ Leka jaku Hebrew nya engka bekaul enggau leka jaku “tai” kena nunjukka asai ati ti balat keji.
^ Jaku Asal, “ke enda diberi Iya ngagai sida.”
