Ulang Adat 32:1-52
32 “O langit, dingaka utai ke dipadah aku;O dunya, dingaka utai ke disebut aku.
2 Jaku ajar aku deka labuh baka ujan,Lalu utai ke disebut aku baka ambun ke neritik,Baka ujan ke beberis ke ninggang rumput,Lalu baka ujan ke lebat ke ngemasahka utai tumbuh.
3 Aku deka nusui nama Jehovah.
Aku deka madahka pemesai kuasa Petara kitai!
4 Iya baka Gunung Batu;Semua pengawa Iya sempurna sereta adil.
Iya Petara ti setia sereta enda bepilih mata;Iya Petara ti lurus sereta ngereja utai ti ngena.
5 Kita empu ke udah ngereja utai ti jai.
Ketegal penyalah kita empu, kita ukai anak Petara.
Kita generasi* ti jai sereta penipu!
6 O kita, bansa ke beli sereta enda nemu berunding,Kati nya chara kita ngelayan Jehovah?
Endaka Iya Apai kita ke udah ngaga kita?
Endaka Iya ke udah ngaga kita nyadi siti bansa?
7 Kingatka utai ti udah nyadi dulu kelia;Perundingka pasal generasi ke suba.
Tanya apai kita, lalu iya deka madahka kita;Tanya meh bala tuai kita, lalu sida deka nusui nya ngagai kita.
8 Lebuh Iya ti Pemadu Tinggi meri pesaka ngagai bansa-bansa,Lalu lebuh Iya nyeraraka peturun Adam,*Iya netapka sempadan ke bansa-bansaNitihka penyampau orang Israel.
9 Nembiak Jehovah endang enggi Iya aja;Jakop endang pesaka Iya.
10 Iya tetemuka nembiak Iya ba menua puang,Ba padang pasir endur alai jelu ti liar meraung.
Iya ngelindung sereta ngibun sida;Iya nyaga sida baka Iya ke nyaga igi mata Iya Empu.
11 Baka burung menaul ke kebap-kebapKena ngajar anak iya terebai,Lalu baka burung menaul ke ngerembaika sayap iyaKena mai anak iya ba atas sayap iya,
12 Jehovah Empu ke ngiring nembiak Iya;*Iya nadai ditulung petara bukai.
13 Iya ngasuh sida bekuasa atas endur ti tinggi ba dunya,Ngambika sida ulih makai asil ari ladang sida.
Iya meri sida madu ari gunung batu,Lalu ngasuh minyak mengalir ari batu.
14 Iya meri sida ai tusu ari kambin enggau mentega ari ai tusu sapi.
Iya mega meri sida bedus ti pemadu manahSereta bedus lelaki ari Basan enggau mayuh kambin lelaki.
Iya meri sida gandum ti pemadu manahSereta wain ari buah anggur ke diirup.
15 O Jeshurun,* pengudah nuan nyadi gemu, nuan berengkah ngelaban.
Nuan nyadi gemu, gendut, sereta gentung perut.
Nuan udah ninggalka Petara ke ngaga nuan;Nuan udah ngemaruhka Petara ke baka Gunung Batu, iya nya Petara ke nyelamatka nuan.
16 Sida ngasuh Iya ringat ketegal nyembah petara-petara bukai;Sida ngemediska ati Iya ketegal ngereja utai ti dipegedika Iya.
17 Sida meri pemeri ngagai bala melikat ti jai, ukai ngagai Petara.
Sida nyerahka pemeri ngagai petara-petara ke enda dikelala sida,Iya nya petara-petara ti baru,Petara-petara ke enda dikelala aki ini sida.
18 Kita enda ingatka Petara ke baka Gunung Batu, iya nya Petara ke udah ngaga kita;Kita enda ingatka Petara ke udah ngasuh kita diadaka.
19 Lebuh Jehovah meda nya, Iya nulak sidaLaban bala anak Iya udah ngemediska ati Iya.
20 Nya alai, Petara bejaku: ‘Aku deka ngelalaika mua Aku ari sida,Lalu Aku ingin meda utai ke deka nyadi ba sida,Laban sida generasi ke jaiSereta anak ke enda setia.
21 Sida udah ngasuh Aku ringat ketegal nyembah petara pelesu.
Sida udah ngemediska ati Aku ketegal nyembah patung ke nadai guna.
Nya alai, Aku deka ngasuh sida chemburuka orang ari bansa bukai.
Aku deka ngasuh sida ringat ketegal bansa ke beli.
22 Pengeringat Aku deka mau baka api,Ke deka nganguska semua utai nyentuk ngagai Kubur* ti dalam,Ke deka nganguska dunya enggau asil iya,Ke deka nganguska asas-asas gunung.
23 Aku deka ngasuh mayuh penusah ninggang sida;Aku deka nimbakka semua anak panah Aku ngagai sida.
24 Sida deka lemi tulang ketegal lapar;Sida deka sakit demam panas lalu dipunaska abis lengis.
Aku deka ngasuh jelu liar nyerang sida,Lalu ular* ti bisa ke ngerayap ba tanah mantuk sida.
25 Ba luar rumah, sida deka dibunuh ngena pedang.
Ba dalam rumah, sida deka balat takutEnda ngira sida ke bujang tauka dara,Anak ke agi mit tauka sida ke udah tuai.
26 Aku ulih nyebut: “Aku deka ngachirka sida ngagai menua ti jauh;Aku deka ngasuh orang enda ingatka sida.”
27 Tang enti Aku ngereja nya, munsuh deka ngemaruhka Aku.
Aku enggai sida salah sangka.
Sida engka madah: “Kami menang laban kami kering;Ukai Jehovah ke ngereja semua utai tu.”
28 Israel nya bansa ke enda nemu berunding;*Sida enda ulih meretika utai.
29 Endaka manah enti sida pintar? Enggau nya, sida ulih berunding enggau dalam,Lalu mikirka utai ke ulih nyadi ketegal pengawa sida.
30 Baka ni ku siku munsuh ulih tegagaika 1,000 iku orang Israel?
Baka ni ku dua iku munsuh ulih telabanka 10,000 iku orang Israel?
Utai nya ulih nyadi enti Gunung Batu sida ninggalka sida,Lalu enti Aku, Jehovah, nyerahka sida ngagai munsuh.
31 Gunung batu bala munsuh enda baka Gunung Batu orang Israel.
Indah bala munsuh kitai pan nemu pasal tu.
32 Bansa Israel baka pun anggur ari Sodom,Lalu baka pun anggur ari ladang ba Gomorah.
Buah anggur sida beracun,Lalu tangkai anggur sida pait.
33 Wain sida baka bisa ular,Lalu ulih munuh baka racun ular tedung.
34 Semua ulah sida deka disimpan,Lalu dikunchi dalam setor Aku.
35 Aku ke deka malas, lalu Aku ke deka ngukum.
Maya deka datai alai orang ke jai deka labuh;Hari sida dipunaska udah semak,Lalu semua utai ke deka ninggang sida deka datai enggau jampat.’
36 Jehovah deka ngakim nembiak Iya.
Lebuh Iya meda sida nadai pengering,Lalu lebuh Iya meda sida ke lemi sereta ke nadai daya ke agi tinggal,Iya kasihka sida.
37 Ku Iya bejaku: ‘Kini ke tunga bala petara sida,Gunung batu ke alai sida belindung,
38 Ke selalu makai lemak ari pemeri sidaSereta ke ngirup pemeri wain sida?
Awakka petara-petara nya angkat lalu nulung sida,Lalu nyadi endur sida belindung.
39 Diatu, kita nemu Aku meh Petara,Lalu nadai petara bukai kelimpah ari Aku.
Aku munuh orang, lalu Aku ke ngidupka orang.
Aku ngemediska orang, lalu Aku ke ngeraika orang.
Nadai sapa-sapa ke ulih nyelamatka orang bukai ari jari Aku.
40 Aku ngangkatka jari Aku ke langit,Lalu besumpah: “Aku besumpah atas nyawa Aku Empu ke idup belama iya,”
41 Enti Aku ngansah pedang Aku ti bekilat,Lalu besedia deka ngakim,Aku deka ngukum semua munsuh Aku,Lalu malas penyai orang ke begedika Aku.
42 Anak panah Aku deka mabuk enggau darah,Iya nya darah orang ke dibunuh sereta orang ke ditangkap,Lalu pedang Aku deka makai dagin,Iya nya pala bala ketuai munsuh.’
43 O kita orang bansa bukai, gaga ati meh begulai enggau nembiak Petara,Laban Iya deka malas ngarika darah bala nembiak Iya;Iya deka malas penyai semua munsuh Iya,Lalu Iya mega deka nguduska menua nembiak Iya.”
44 Moses enggau Hoshea* anak Nun madahka semua leka lagu nya ngagai semua bansa Israel.
45 Pengudah Moses madahka semua leka lagu nya ngagai semua bansa Israel,
46 ku iya nampung jaku iya: “Simpan semua amaran ke dipadahka aku ngagai kita seharitu ba dalam ati kita, ngambika kita ulih ngajar bala anak kita nitihka semua utai ke dipadah dalam Adat tu.
47 Semua utai ke disebut aku tu ukai jaku ngapa, tang jaku tu deka nulung kita idup. Enti kita ngasika jaku tu, kita ulih idup lama ba menua ke deka diempu kita ba seberai Sungai Jordan.”
48 Ba hari nya mega, Jehovah bejaku ngagai Moses. Ku Iya:
49 “Niki ngagai gunung ba kawasan Abarim, iya nya ngagai Gunung Nebo ba menua Moap ke betunga enggau Jeriko. Ari endur nya, peda meh menua Kanaan ke deka diberi Aku ngagai orang Israel.
50 Udah nya, nuan deka mati ba gunung ke deka ditiki nuan nya, lalu nuan deka dikuburka baka aki ini nuan. Menyadi nuan Aron mega udah dikuburka baka aki ini nuan pengudah iya mati ba Gunung Hor.
51 Tu ketegal seduai enda setia ngagai Aku lebuh ba Mata Ai Meribah ba Kades, ba menua puang Zin. Seduai enda ngemuliaka Aku ba depan orang Israel.
52 Nuan deka meda menua nya ari jauh, tang nuan enda tau tama ngagai menua nya ke deka diberi Aku ngagai orang Israel.”
Nota Kaki
^ Tauka “rebak.”
^ Tauka engka, “nyeraraka bala mensia.”
^ Iya nya, Jakop.
^ Reti nya “Ke Lurus Ati,” iya nya gelar ke diberi ngagai orang Israel kena nunjukka basa.
^ Tauka “Sheol,” iya nya pendam ke mensia. Peda Penerang Leka Jaku.
^ Tauka “reptilia.”
^ Tauka engka, “enda pedulika jaku ajar.”
^ Nama asal Josua. Nama Hoshea nya singkatan ke nama Hosaiah, ke mai reti “Diselamatka Jah; Jah Udah Nyelamatka.”
