Ulang Adat 33:1-29
33 Tu meh berekat ke dipadahka Moses, iya nya nembiak Petara ti bendar, ngagai orang Israel sebedau iya mati.
2 Ku Moses madahka:
“Jehovah datai ari Gunung Sinai.Iya manchar bala nembiak Iya ari Seir;Iya mancharka mulia Iya ari kawasan begunung ba Paran.
Bepuluh ribu iku melikat Iya ti kudus bisi enggau Iya,Lalu bala pahlawan Iya bediri ba sepiak kanan Iya.
3 Iya sayauka nembiak Iya;Semua nembiak Iya ti kudus bisi ba jari Iya.
Sida duduk semak kaki Iya;Lalu sida mendingka jaku Iya.
4 (Moses meri kami pesan enggau adat,Ke diempu peturun* Jakop.)
5 Lebuh bala tuai begempuru,Lalu lebuh semua raban bansa Israel enggau sida,Petara nyadi raja ba Jeshurun.*
6 Awakka Reuben mengkang idup lalu enda mati,Lalu awakka penyampau bala iya enda kurang.”
7 Ku Moses merekatka Judah:
“O Jehovah, pendingka meh sada nyawa Judah;Bai meh iya pulai baru ngagai bansa iya.
Lengan iya udah belaban kena ngetanka utai ke enggi iya;Tulung meh iya ngelaban bala munsuh iya.”
8 Ku Moses madah pasal Lewi:
“Urim enggau Tumim* Nuan diempu orang ke setia ngagai Nuan,Ke diuji Nuan ba Masah.
Nuan belaban enggau iya ba Mata Ai Meribah.
9 Iya madah ngagai apai indai iya: ‘Aku enda ibuhka seduai.’
Indah, iya enda pedulika bala menyadi iya empu,Lalu iya enda kiruhka bala anak iya empu.
Sida ngasika jaku Nuan,Lalu nitihka sempekat ke digaga Nuan.
10 Awakka sida ngajar Jakop pasal atur Nuan,Sereta ngajar Israel pasal adat Nuan.
Awakka sida nunu menyan ke bebau rengut ke Nuan,Lalu nyerahka pemeri ba atas alta Nuan.
11 O Jehovah, berekatka meh pengering iya,Lalu awakka Nuan lantang ati ke pengawa iya.
Anchurka kaki* sida ke ngelaban iya,Ngambika sida ke begedika iya enda ulih angkat agi.”
12 Ku Moses madah pasal Benjamin:
“Awakka orang ke dikesayauka Jehovah diau likun enggau Iya,Lalu belindung ba Iya sepemanjai hari,Lalu duduk ba atas bau Iya.”*
13 Ku Moses madah pasal Josep:
“Awakka menua iya diberekat JehovahEnggau utai ti manah ari langit,Enggau ambun sereta enggau mata ai ari baruh tanah,
14 Enggau utai manah ke tumbuh laban mata panas,Enggau asil ti manah ke diulih tiap bulan,
15 Enggau utai ti pemadu manah ari gunung kelia menya,*Enggau utai ti manah ari bukit ke meruan belama iya,
16 Enggau utai manah ari dunya sereta semua utai ke bisi ba dunya,Sereta enggau pemanah ari Petara ke kala ngayanka Diri ba pun kayu ti mit ke beduri.
Awakka semua nya diberi ngagai Josep,Orang ke dipilih ari bala menyadi iya.
17 Mulia iya baka mulia anak tuai sapi lelaki,Lalu tanduk iya baka tanduk sapi lelaki ti liar.
Ngena tanduk nya, iya deka ngeju* orangSampai ngagai ujung dunya.
Tanduk nya baka bepuluh ribu iku orang Efraim,Sereta baka beribu iku orang Manasi.”
18 Ku Moses madah pasal Sebulun:
“O Sebulun, gaga ati meh nuan lebuh nuan mupuk.
O Isakar, gaga ati meh nuan lebuh nuan ba dalam langkau kain nuan.
19 Seduai iya deka ngangauka orang ngagai gunung.
Ba dia meh seduai iya deka nyerahka pemeri ti lurus ba mata Petara.
Seduai iya deka ngulihka pengaya ti belimpah ari tasikSereta reta ke dilalaika ba pasir.”
20 Ku Moses madah pasal Gat:
“Beberekat meh orang ke ngemesaika agi sempadan Gat.
Iya gali baka singa,Ke besedia deka nyarikka lengan enggau pala mansa iya.
21 Iya deka milih menua ti pemadu manah ke iya empu.
Nya meh begian iya ke ditentuka orang ke meri adat.
Bala tuai deka begempuru.
Iya deka ngetanka pengelurus JehovahLalu madahka atur Iya bekaul enggau Israel.”
22 Ku Moses madah pasal Dan:
“Dan nya baka anak singa.
Iya deka merejuk pansut ari Basan.”
23 Ku Moses madah pasal Naptali:
“Naptali puas ati enggau pemanah Jehovah,Sereta penuh laban berekat Iya.
Iya nguasa menua ke ba barat enggau selatan.”
24 Ku Moses madah pasal Aser:
“Awakka Aser diberekat ngambika iya mayuh anak.
Awakka iya dikerinduka bala menyadi iya,Lalu awakka iya nyepuhka kaki iya dalam minyak.
25 Pintu penama nuan deka dikunchi ngena besi enggau temaga,Lalu nuan deka diau likun sepemanjai pengidup nuan.
26 O Jeshurun, nadai petara bukai ke baka Petara nuan.
Iya Petara ti bendar, lalu Iya mansang nengah langit datai nulung nuan,Lalu Iya nepan remang* enggau penuh mulia.
27 Kenyau ari kelia menya, Petara meh ke nyadi endur alai nuan belindung.
Lengan Iya deka seruran nyukung nuan.
Iya deka muru munsuh nuan,Lalu Iya deka madahka: ‘Bunuh sida!’
28 Ba menua ke penuh laban bijirin enggau wain ti baru,Sereta ke seruran basah laban ambun ari langit,Israel deka diau enggau likun,Lalu nadai utai ke deka ngachau peturun* Jakop.
29 O Israel, gaga ati meh nuan!
Nadai orang ke baka nuan,Bansa ke diselamatka Jehovah,Ke nyadi baka terabai ke ngelindung nuan,Ke nyadi baka pedang ti bemulia ke nuan.
Ba depan nuan, bala munsuh nuan deka gegetar takut,Lalu nuan deka ngindik belakang sida.”*
Nota Kaki
^ Jaku Asal, “raban gempuru.”
^ Reti nya “Ke Lurus Ati,” iya nya gelar ke diberi ngagai orang Israel kena nunjukka basa.
^ Peda Penerang Leka Jaku.
^ Tauka “punggung.”
^ Tauka engka, “Awakka orang ke dikesayauka Jehovah diau likun enggau Benjamin, lalu belindung ba Benjamin sepemanjai hari, lalu duduk ba atas bau iya.”
^ Tauka engka, “gunung ba timur.”
^ Tauka “nanduk.”
^ Tauka “awan.”
^ Jaku Asal, “mata ai.”
^ Tauka engka, “ngindik endur sida ti tinggi.”
