Ulang Adat 34:1-12
34 Udah nya, Moses mupuk ari menua puang Moap lalu niki Gunung Nebo, nuju ngagai begian atas Pisgah ke betunga enggau Jeriko. Jehovah mandangka serata menua nya ngagai iya, ari Gilead nyentuk ngagai Dan,
2 serata menua Naptali, menua Efraim enggau Manasi, serata menua Judah nyentuk ngagai Tasik Tengah,*
3 serata Negeb enggau kawasan Jordan, ari lebak ba Jeriko, iya nya kuta pun kayu engkerema, nyentuk ngagai Soar.
4 Udah nya, Jehovah bejaku ngagai Moses: “Tu meh menua ke udah disemayaka Aku ngagai Abraham, Isak, enggau Jakop. Ku Aku madah ngagai sida: ‘Aku deka meri menua tu ngagai peturun nuan.’ Aku udah ngasuh nuan meda menua nya, tang nuan enda tau mansang kin.”
5 Udah nya, Moses, nembiak Jehovah nya, mati ba menua Moap, baka ke udah dipadahka Jehovah.
6 Petara nguburka Moses ba siti lebak ba menua Moap, ke betunga enggau Bet-peor. Tang nyentuk ngagai seharitu, nadai orang nemu dini alai kubur iya.
7 Moses beumur 120 taun lebuh iya mati. Mata iya agi lansik, lalu tubuh iya agi kering.
8 Orang Israel nyabakka pemati Moses pengelama 30 hari ba menua puang Moap. Pengudah timpuh nya, sida badu agi nyabakka iya.
9 Josua anak Nun penuh enggau penemu-dalam,* laban Moses udah ngengkahka jari iya ba atas Josua. Orang Israel mendingka Josua, lalu sida ngereja semua utai ke dipadahka Jehovah nengah Moses.
10 Ba Israel, nadai nabi bukai ke baka Moses ke amat rapat enggau Jehovah.*
11 Baka ke diasuh Jehovah, Moses ngaga mayuh tanda sereta ngereja utai ti luar biasa ba Ejip kena ngelaban Firaun, semua pegawai iya, enggau serata menua iya.
12 Ngena kuasa ti ngalitka ati sereta jari ti bekuasa, Moses ngereja semua utai nya ba depan semua orang Israel.
Nota Kaki
^ Iya nya, Tasik Mediterranean.
^ Tauka “penuh enggau penemu-dalam ke datai ari kuasa Petara.”
^ Jaku Asal, “ke dikelala Jehovah betunga mua.”
