Ulang Adat 5:1-33
5 Udah nya, Moses ngempuruka semua orang Israel lalu bejaku ngagai sida: “O orang Israel, pendingka semua adat enggau atur ke dipadahka aku ngagai kita seharitu. Kita patut bebendar belajar lalu nitihka semua adat enggau atur nya.
2 Jehovah, Petara kitai, udah ngaga sempekat enggau kitai ba Horeb.
3 Jehovah ukai ngaga sempekat nya enggau aki ini kitai, tang enggau semua kitai. Iya udah ngaga sempekat nya enggau semua kitai ke idup seharitu.
4 Jehovah bejaku betunga mua enggau kita ba gunung nya ari dalam api.
5 Maya nya suba, kita takutka api nya lalu enggai niki ngagai gunung nya. Nya alai, aku bediri entara kita enggau Jehovah, lalu madahka jaku Jehovah ngagai kita. Ku Iya:
6 “‘Aku tu meh Petara kita, Jehovah, ke udah mai kita pansut ari Ejip, menua alai kita nyadi ulun.
7 Anang nyembah petara-petara bukai.* Semina Aku aja ke patut disembah kita.
8 “‘Anang ngaga patung tauka utai bukai ke nunda gamal nama-nama utai ke bisi ba langit, ba dunya, tauka ba dalam ai.
9 Anang besugang ngagai utai nya tauka tetarit ati deka nyembah utai nya, laban Aku tu meh Jehovah, Petara kita. Sembah meh Aku siku aja. Enti bisi orang ke ngereja penyalah sereta begedika Aku, Aku deka ngukum anak, uchu, enggau ichit iya.
10 Tang, Aku deka setia ngayanka pengerindu Aku ngagai orang ke rinduka Aku enggau ngasika pesan Aku. Aku indah deka ngayanka pengerindu tu ngagai semua bala peturun iya, nyentuk ngagai beribu-ribu generasi* iya.
11 “‘Anang ngena nama Aku, Jehovah, enggau chara ti enda bebasa,* laban Aku, Jehovah, Petara kita, deka ngukum sapa-sapa ke ngena nama Aku baka nya.
12 “‘Anang enda ingat ngintu Hari Sabat, lalu tentuka hari nya kudus baka ke udah diasuh Aku, Jehovah, Petara kita.
13 Kita tau gawa dalam enam hari.
14 Tang hari ketujuh nya Hari Sabat ke Aku, Petara kita, Jehovah. Ba hari nya, kita enda tau gawa, pia mega enggau anak kita, bala ulun kita, sapi kita, keledai kita, jelu tupi kita, enggau orang asing ke diau ba kuta kita.
15 Anang enda ingat, suba kita kala nyadi ulun ba menua Ejip, lalu Aku, Jehovah, udah mai kita pansut ari menua nya ngena jari Aku ti kering sereta bekuasa. Nya meh kebuah Aku, Jehovah, ngasuh kita ngintu Hari Sabat.
16 “‘Bebasaka apai indai kita baka ke udah diasuh Aku, Jehovah, Petara kita, ngambika kita panjai umur sereta idup lantang ba menua ke diberi Aku, Petara kita, Jehovah.
17 “‘Anang munuh orang.
18 “‘Anang ngereja ulah seks enggau orang ke ukai kaling pengidup diri.
19 “‘Anang ngenchuri.
20 “‘Anang bula lebuh meri saksi pasal orang bukai.
21 “‘Anang inginka nama-nama utai ke diempu orang bukai, sekalika nya bini iya, rumah iya, ladang iya, ulun iya, sapi iya, tauka keledai iya.’
22 “Jehovah udah meri semua pesan nya ngagai kita, lebuh kita begempuru ba gunung nya. Iya bejaku enggau nyawa ti inggar ari dalam api sereta mua hari ti chelum. Iya nadai nyebut pesan bukai, lalu Iya nuliska semua pesan nya ba dua iti lampang batu lalu meri nya ngagai aku.
23 “Lebuh kita ninga munyi nyawa nya bejaku ari mua hari ti chelum, lebuh bukit nya diempa api, semua bala tuai raban bansa kita enggau bala tuai orang Israel datai ngagai aku.
24 Ku kita bejaku: ‘Jehovah, Petara kitai, udah ngayanka pemesai mulia enggau kuasa Iya ngagai semua kitai. Kitai udah ninga nyawa Iya ari dalam api nya. Seharitu, kitai udah meda mensia agi ulih mengkang idup, taja pan Petara bejaku enggau iya.
25 Taja pia, kami takut enggaika kami mati, laban api ti besai nya ulih nganguska kami. Enti kami majak ningaka nyawa Jehovah, Petara kitai, kami tentu mati.
26 Kati bisi mensia ke agi mengkang idup baka kitai, pengudah ninga munyi nyawa Petara bejaku ari dalam api?
27 Alai nuan empu mansang semak ngagai Jehovah, Petara kitai. Pendingka semua utai ke disebut Iya. Udah nya, padahka ngagai kami semua utai ke disebut Jehovah ngagai nuan. Kami deka mending lalu ngasika semua utai ke disebut Iya.’
28 “Jehovah ninga semua utai ke disebut kita. Lalu ku Jehovah bejaku ngagai aku: ‘Aku udah ninga semua utai ke disebut sida ngagai nuan. Manah cadangan sida nya.
29 Aku ngarapka sida seruran nangika Aku ari ati, lalu ngasika semua pesan Aku. Enggau nya, sida enggau bala peturun sida deka idup lantang belama iya.
30 Padah ngagai sida: “Pulai meh ngagai langkau kain kita.”
31 Tang nuan patut tinggal ditu. Aku deka madah ngagai nuan semua pesan, adat, enggau atur ke patut diajar nuan ngagai sida. Sida patut ngasika semua nya ba menua ke deka diberi Aku ngagai sida.’
32 Tentuka semua kita nitihka tiap iti utai ke diasuh Jehovah, Petara kita. Anang limpang ke kiba tauka ke kanan.
33 Titihka jalai ke udah dipesanka Jehovah ngagai kita. Enggau nya, kita ulih idup lantang lalu diau lama ba menua ke deka alai kita diau.
Nota Kaki
^ Tauka “nyembah petara-petara bukai laban deka ngelaban Aku.”
^ Tauka “serak.”
^ Tauka “chara ti salah.”
