Ulang Adat 8:1-20
8 “Kita patut ngasika enggau manah semua pesan ke diberi aku ngagai kita seharitu, ngambika kita ulih mengkang idup lalu majak mayuh, sereta ulih tama lalu ngempu menua ke udah disemayaka Jehovah ngagai aki ini kita.
2 Kingatka, Jehovah, Petara kita, udah ngiring kita bejalai jauh ba menua puang pengelama 40 taun kena Iya ngemaruhka ati kita. Iya nguji kita kena nemu utai ke bisi ba ati kita, sekalika kita ngasika pesan Iya tauka enda.
3 Iya udah ngemaruhka ati kita, lalu nejuka kita lapar. Iya meri kita manna, iya nya pemakai ke enda kala dipeda kita sereta aki ini kita. Iya ngereja nya ngambika kita nemu, mensia enda ulih beridup ba roti aja, tang beridup ba genap leka jaku ti pansut ari mulut Jehovah.
4 Dalam 40 taun nya, gari ke dikena kita enda jai, lalu kaki kita pan enda kembai.
5 Kita empu udah nemu, Jehovah, Petara kita, udah ngerara kita baka apai ke ngerara anak diri.
6 “Nya alai, kita mesti ngasika semua pesan Jehovah, Petara kita. Titihka semua jalai Iya sereta nangika Iya.
7 Jehovah, Petara kita, deka mai kita ngagai menua ke bisi tanah ti subur. Menua nya bisi mayuh sungai* enggau pun penatai ai ke mengalir ngagai kawasan lebak ti rata sereta ngagai kawasan ke begunung.
8 Ba dia mega bisi gandum, barli, pun anggur, pun kayu ara, pun kayu delima, pun kayu kana, enggau madu.
9 Ba menua nya, kita enda suntuk pemakai lalu kita bisi semua utai. Batu ba dia bisi besi, lalu kita ulih ngulihka temaga ari gunung ba dia.
10 “Pengudah kita makai sampai kenyang, kita mesti muji Jehovah, Petara kita, laban Iya udah meri menua ke bisi tanah ti subur nya ngagai kita.
11 Anang enda ingatka Jehovah, Petara kita. Kita mesti ngasika semua pesan, atur, enggau adat Iya, ke dipadahka aku ngagai kita seharitu.
12 Enti kita udah makai sampai kenyang, lalu udah ngaga rumah ti manah ke alai kita diau,
13 lalu enti jelu tupi kita betambah, pia mega enti emas, pirak, enggau semua utai ke dikemisi kita majak mayuh,
14 anang nyadi sumbung lalu enda ingatka Jehovah, Petara kita, ke udah mai kita pansut ari Ejip, iya nya menua alai kita nyadi ulun.
15 Kingatka, Iya meh ke udah ngiring kita bejalai nengah menua puang ti luas sereta ngenakutka. Menua nya bisi mayuh ular bisa enggau kala. Endur nya rangkai sereta nadai ai. Tang Iya meh ke udah mansutka ai ari batu.
16 Iya mega udah meri kita manna, iya nya pemakai ke enda kala dipeda aki ini kita. Iya ngereja nya kena ngemaruhka ati kita sereta kena nguji kita, ngambika kita bulih penguntung dudi hari.
17 Anang nyebut tu dalam ati kita: ‘Aku bulih pengaya tu ketegal kuasa enggau pengering aku empu.’
18 Kingatka, Jehovah meh ke meri kita pengering sereta ngasuh kita nyadi kaya. Iya ngereja nya kena ngamatka sempekat ke udah digaga Iya enggau aki ini kita, baka ke dikereja Iya sampai ke seharitu.
19 “Aku meri kita amaran tu: Enti kita enda ingatka Jehovah, Petara kita, lalu besugang sereta nyembah petara bukai, kita tentu deka dipunaska.
20 Enti kita enda mendingka Jehovah, Petara kita, Jehovah deka ngemunaska kita sama baka Iya ngemunaska bansa bukai.
Nota Kaki
^ Tauka “wadi.”
