Ulang Adat 9:1-29
9 “Dinga kita orang Israel, seharitu kita deka meraka Sungai Jordan. Kita deka tama lalu ngempu menua ke diempu bansa ti kering sereta ke mayuh agi ari kita. Sida bisi kuta ti besai, lalu dinding kuta nya teguh sereta tinggi sampai ke langit.
2 Kita pan nemu, peturun Enak ke diau ba dia besai sereta tinggi. Kita mega kala ninga orang madah: ‘Nadai orang ulih ngelaban orang Enak.’
3 Kita patut nemu, seharitu Jehovah, Petara kita, deka bejalai dulu ari kita. Iya deka ngemunaska sida baka api ke nganguska utai abis lengis. Ba depan mata kita, Jehovah deka ngalahka sida, ngambika kita ulih muru sida enggau jampat lalu ngemunaska sida, baka ke udah disemaya Iya ngagai kita.
4 “Pengudah Jehovah, Petara kita, muru sida ari kita, anang nyebut munyi tu dalam ati kita: ‘Jehovah udah mai kami ngagai menua tu, lalu ngasuh kami ngempu menua tu laban kami udah ngereja utai ti betul.’ Kebendar iya, Jehovah muru sida ari kita laban sida bansa ti jai.
5 Jehovah ngasuh kita ngempu menua nya, ukai ketegal kita ngereja utai ti betul tauka ngereja utai ti lurus. Tang Jehovah udah muru sida ari kita ketegal sida jai, sereta ketegal Iya deka ngamatka semaya ke udah digaga Iya enggau aki ini kita, iya nya Abraham, Isak, enggau Jakop.
6 Nyadi kita patut nemu, Jehovah meri kita menua ke bisi tanah ti subur, ukai ketegal kita udah ngereja utai ti betul. Kebendar iya, kita bansa ti degil.
7 “Anang enda ingat, kita udah ngasuh Petara kita, Jehovah, ringat lebuh kita ba menua puang. Kenyau ari maya kita pansut ari menua Ejip nyentukka kita datai ditu, kita agi ngelaban Jehovah.
8 Indah lebuh ba Horeb pan, kita ngasuh Jehovah ringat. Jehovah balat amat ringat, nyentukka Iya deka ngemunaska semua kita.
9 Aku udah niki ngagai gunung nya deka nerima lampang batu, ke udah alai Jehovah nuliska sempekat ke digaga Iya enggau kita. Aku ba atas gunung nya pengelama 40 hari enggau 40 malam. Lalu sepemanjai timpuh nya, aku nadai makai tauka ngirup.
10 Udah nya, Jehovah meri ngagai aku dua iti lampang batu nya, ke ditulis Iya ngena jari Iya Empu. Ba lampang batu nya, Jehovah udah nulis jaku ke disebut Iya ngagai kita ari dalam api, lebuh kita begempuru ba kaki gunung nya.
11 Ba pengujung 40 hari enggau 40 malam, Jehovah meri ngagai aku dua iti lampang batu nya, iya nya lampang batu ke ngembuan sempekat.
12 Udah nya, Jehovah bejaku ngagai aku. Ku Iya: ‘Alai nuan, jampat nurun, laban bansa ke dibai nuan pansut ari menua Ejip udah ngereja dosa ti besai. Jampat amat sida limpang ari jalai ke udah diasuh Aku titihka sida. Sida udah ngaga siti patung besi ke sida empu.’
13 Jehovah mega madah ngagai aku: ‘Sida tu sigi orang ke degil.
14 Awakka Aku ngemunaska sida lalu ngasuh nama sida enda dikingatka agi. Manah agi Aku ngaga peturun nuan nyadi bansa ti kering agi sereta besai agi ari sida.’
15 “Udah nya, aku nurun ari gunung nya sambil mai dua iti lampang batu ke ngembuan sempekat Petara. Maya nya, gunung nya mau laban api.
16 Udah nya, aku meda kita udah bedosa ngelaban Jehovah, Petara kita. Kita udah ngaga patung anak sapi ari besi. Jampat amat kita limpang ari jalai ke udah diasuh Jehovah titihka kita.
17 Aku lalu ngempaska lampang batu ke dibai aku, nyentukka lampang batu nya pechah ba depan kita.
18 Udah nya, sekali agi aku besugang ba depan Jehovah pengelama 40 hari enggau 40 malam. Aku mega enda makai tauka ngirup. Aku ngereja nya ketegal kita udah bedosa. Kita udah ngereja utai ti jai ba mata Jehovah, lalu ngasuh Iya ringat.
19 Aku amat takut laban Jehovah balat ringat ngagai kita, nyentukka Iya deka ngemunaska semua kita. Taja pia, maya nya, Jehovah agi ka mendingka aku.
20 “Jehovah mega balat ringat ngagai Aron, nyentukka Iya pan deka munuh Aron. Tang maya nya, aku besampika Aron ngambika Petara enda munuh iya.
21 Udah nya, aku ngambi patung anak sapi ke udah ngasuh kita bedosa. Aku nunu patung nya, nganchurka iya, lalu nutuk iya sampai nyadi serbuk. Udah nya, aku nikauka serbuk nya ngagai sungai ke mengalir ari gunung.
22 “Kita mega udah ngasuh Jehovah ringat lebuh kita ba Taberah, Masah, enggau ba Kibrot-hataabah.
23 Jehovah udah ngasuh kita mupuk ari Kades-barnea, lalu bejaku ngagai kita: ‘Alai mupuk, lalu ambi menua ke deka diberi Aku ngagai kita!’ Tang sekali agi kita ngelaban Petara kita, Jehovah. Kita enda ngasika pesan Iya, lalu enda manggaika pengarap ba Iya.
24 Kenyau ari aku udah ngelala kita, kita seruran ngelaban Jehovah.
25 “Nya alai, aku majak besugang ba depan Jehovah pengelama 40 hari enggau 40 malam. Aku ngereja nya laban Jehovah udah madahka deka ngemunaska semua kita.
26 Nya alai, aku lalu besampi ngagai Jehovah: ‘O Jehovah, Tuan ti Pemadu Tinggi, anang ngemunaska nembiak Nuan. Sida nembiak ke diempu Nuan,* lalu Nuan udah mai sida pansut ari menua Ejip ngena jari Nuan ti bekuasa. Nuan udah nebus sida ngena kuasa Nuan ti besai.
27 Kingatka nembiak Nuan Abraham, Isak, enggau Jakop. Anang meda dosa, penyai, enggau ulah orang Israel ti degil.
28 Enti Nuan ngemunaska sida, orang Ejip engka deka bejaku munyi tu: “Nadai Jehovah ulih mai sida ngagai menua ke udah disemayaka Iya ngagai sida, laban Iya begedika sida. Iya mai sida ngagai menua puang laban Iya deka munuh sida.”
29 Sida nembiak ke diempu Nuan,* ke udah dibai Nuan pansut ngena jari Nuan ti kering sereta bekuasa.’
